Monday, January 24

ഇന്ത്യയില്‍ ഒരാള്‍ വിചാരിച്ചാലും ഒരു ബാങ്കിനെ മുക്കാം: പിഎന്‍ബി തട്ടിപ്പ് നല്‍കുന്ന പാഠങ്ങള്‍

ഇന്ത്യന്‍ ബാങ്കിംഗ് സംവിധാനത്തില്‍ നിലനില്‍ക്കുന്ന തട്ടിപ്പുകളിലേക്കും പഴുതുകളിലേക്കും വിരല്‍ ചൂണ്ടുന്നതാണ് നീരവ് മോദി കേസുമായി ബന്ധപ്പെട്ട് പഞ്ചാബ് നാഷണല്‍ ബാങ്ക് അധികൃതര്‍ നടത്തിയ ആഭ്യന്തര അന്വേഷണ ഫലങ്ങള്‍. പഞ്ചാബ് നാഷണല്‍ ബാങ്കില്‍ നിന്നും നീരവ് മോദി 13,500 കോടി രൂപ തട്ടിയതുമായി ബന്ധപ്പെട്ട് നടക്കുന്ന അന്വേഷണമാണ് നമ്മുടെ ബാങ്കിംഗ് സംവിധാനത്തിന്റെ വിശ്വാസ്യതയെ തന്നെ ചോദ്യം ചെയ്യുന്ന വിവരങ്ങള്‍ പുറത്തുകൊണ്ടുവന്നിരിക്കുന്നത്.
തട്ടിപ്പ് നടന്ന ബാങ്കിന്റെ മുംബെ ബ്രാഡി ഹൗസ് ശാഖയില്‍ 2010 മുതല്‍ 2017 വരെ ഡപ്യൂട്ടി ജനറല്‍ മാനേജരായി പ്രവര്‍ത്തിച്ചിരുന്ന പ്രതികളില്‍ ഒരാളായ ഗോകുല്‍നാഥ് ഷെട്ടിയെ ചോദ്യം ചെയ്തപ്പോഴാണ് പുതിയ വിവരങ്ങള്‍ ലഭ്യമായത്. 10 ലക്ഷത്തിനും 25 ലക്ഷത്തിനും ഇടയ്ക്കുള്ള ഇടപാടുകള്‍ മാത്രം കൈകാര്യം ചെയ്യാന്‍ അധികാരമുള്ള ആളായിരുന്നു ഷെട്ടി. എന്നാല്‍ ബാങ്കില്‍ ഉണ്ടായിരുന്ന ഏഴ് വര്‍ഷങ്ങള്‍ക്കിടയില്‍ ഒരു കോടിയോ അതില്‍ കൂടുതലോ രൂപയുടെ കൈമാറ്റം നടക്കുന്ന 13,501 ഇടപാടുകളാണ് ഷെട്ടി പാസാക്കിയത്. 2015 ജൂണില്‍ ഷെട്ടി പാസാക്കിയ 212 കോടിയുടെ ഇടപാടാണ് ഇതില്‍ ഏറ്റവും വലുത്.
ബാങ്കിന്റെ സോഫ്റ്റുവെയര്‍ ഷെട്ടിയ്ക്കുള്ള വിജ്ഞാനമാണ് ഇത്ര വലയ തട്ടിപ്പ് നടത്താന്‍ അയാളെ പ്രാപ്തനാക്കിയത്. ഷെട്ടി പാസാക്കുന്ന ഇടപാടുകള്‍ പരിശോധിക്കുന്നതും അയാള്‍ തന്നെയായിരുന്നു. അതുകൊണ്ടുതന്നെ തട്ടിപ്പ് കണ്ടുപിടിക്കാന്‍ ബാങ്കിലെ മറ്റ് ജീവനക്കാര്‍ക്ക് സാധിച്ചില്ല. ദൈംദിന ഇടപാടുകള്‍ അവലോകനം ചെയ്യുന്ന കമ്പ്യൂട്ടര്‍ സിസ്റ്റം റിപ്പോര്‍ട്ടുകള്‍ സഹപ്രവര്‍ത്തകര്‍ പരിശോധിച്ചിരുന്നെങ്കില്‍ തട്ടിപ്പ് നേരത്തെ തന്നെ കണ്ടുപിടിക്കാന്‍ സാധിക്കുമായിരുന്നു.
ഡല്‍ഹിയിലുള്ള ബാങ്കിന്റെ ആസ്ഥാനത്തെ ട്രഷറി ഡിവിഷനിലേക്ക് ഷെട്ടി ബാങ്കിന്റെ പ്രവര്‍ത്തനസമയത്തിന് ശേഷം ഏറ്റവും കുറഞ്ഞത് മുപ്പത്തഞ്ച് ഇ-മെയിലുകളെങ്കിലും അയച്ചിട്ടുണ്ടെന്ന് അന്വേഷണത്തില്‍ വെളിവായി. ഇതെല്ലാം ഇടപാടുകളുമായി ബന്ധപ്പെട്ടായിരുന്നു. ഇതില്‍ 22 ഇ-മെയിലുകളും അദ്ദേഹത്തിന്റെ വ്യക്തിഗത വിലാസത്തില്‍ നിന്നാണ് അയച്ചിരിക്കുന്നത്. ഇതില്‍ പല മെയിലുകളും നീരവ് മോദിയുമായി ബന്ധപ്പെട്ട ഇടപാടുകളെ കുറിച്ചുള്ളതായിരുന്നു എന്നതും ശ്രദ്ധേയമാണ്.
മൂ്ന്ന് പ്രാവശ്യം സ്ഥലംമാറ്റപ്പെട്ടെങ്കിലും ബ്രാഡി ഹൗസ് ശാഖയിലുള്ള മുതിര്‍ ഉദ്യോഗസ്ഥരുമായി ഷെട്ടി നല്ല ബന്ധമാണ് പുലര്‍ത്തിയിരുന്നത്. ബ്രാഡി ഹൗസ് ശാഖയില്‍ മൂന്ന് വര്‍ഷം പൂര്‍ത്തിയാക്കിയ 2013 ഏപ്രില്‍ ഒന്നിനാണ് ആദ്യത്തെ സ്ഥലംമാറ്റ ഉത്തരവ് ഷെട്ടിക്ക് ലഭിക്കുന്നത്. ഉത്തരവ് ലഭിച്ചിട്ടും ഷെട്ടി അതേ ശാഖയില്‍ തന്നെ തുടര്‍ന്നു. അതേ വര്‍ഷം ജൂലൈ ഒന്നിന് ഷെട്ടിയെ പിഎന്‍ബിയുടെ ഹൗസ് ബ്രാഞ്ചിലേക്ക് മാറ്റി. അഞ്ച് മാസങ്ങള്‍ക്ക് ശേഷം ബാങ്കിന്റെ ഫോര്‍ഷോര്‍ റോഡ് ശാഖയിലേക്കും. ഇതിനൊക്കെ ശേഷവും ഷെട്ടി ബ്രാഡി ഹൗസ് ശാഖയില്‍ തന്നെ തുടര്‍ന്നു.
2015 ജൂലൈ ഒന്നിന് ഷെട്ടിയെ മുംബെയിലുള്ള ഓപ്പറ ഹൗസ് ശാഖയിലേക്ക് മാറ്റിക്കൊണ്ടുള്ള ഉത്തരവ് വന്നു. എന്നാല്‍ രണ്ട് ദിവസങ്ങള്‍ക്ക് ശേഷം ഷെട്ടിയെ ബ്രാഡി ഹൗസ് ശാഖയില്‍ തന്നെ തുടരാന്‍ അനുമതി നല്‍കികൊണ്ടുള്ള പുതിയ ഉത്തരവിറങ്ങി. ഓരോ തവണയും ഉത്തരവുകള്‍ റദ്ദാക്കുന്നതിന് പ്രത്യേകിച്ച് ഒരു കാരണവും ബാങ്കിന്റെ സര്‍ക്കിള്‍ ഓഫീസ് ചൂണ്ടിക്കാട്ടിയിരുന്നില്ല.
ഇതുകൂടാതെ SWIFT ഇടപാടുകളുടെ പാസ്വേര്‍ഡ് ഷെട്ടി മറ്റ് ചിലര്‍ക്ക് കൈമാറിയിരുന്നു. അയാള്‍ ലീവിലായിരിക്കുമ്പോള്‍ മറ്റുള്ളവര്‍ക്ക് അന്താരാഷ്ട്ര പണമടവുകള്‍ സാക്ഷ്യപ്പെടുത്താന്‍ ഇതുമൂലം സാധിച്ചു. ഇത് അങ്ങേയറ്റം നിയമവിരുദ്ധമായ നടപടിയാണെന്നും അന്വേഷണ ഉദ്യോഗസ്ഥര്‍ ചൂണ്ടിക്കാണിക്കുന്നു.

Spread the love
Read Also  പഞ്ചാബ് നാഷണൽ ബാങ്കിൽ വീണ്ടും തട്ടിപ്പ്; ഇത്തവണ നഷ്ടപെട്ടത് 3800 കോടി രൂപ

Leave a Reply