Sunday, November 29

നടിയെ ആക്രമിച്ച കേസിൽ പ്രദീപിന്റെ പങ്ക് ; കൂടുതൽ പ്രമുഖർ കുടുങ്ങാൻ സാധ്യത

 

നടനും എം എൽ യുമായ ഗണേഷ് കുമാറിന്റെ ഡ്രൈവർ പ്രദീപ് കോട്ടത്തലയ്‌ക്കെതിരെ  നടിയെ ആക്രമിച്ച കേസിലെ മാപ്പുസാക്ഷിയെ ഭീഷണിപ്പെടുത്തിയെന്ന കേസിൽ പ്രദീപ് കോട്ടത്തലയ്ക്കെതിരെയുള്ളത് ഗുരുതര കണ്ടെത്തലുകൾ. ജനുവരിയിൽ എറണാകുളത്ത് നടന്ന യോഗമാണ് ഗൂഢാലോചനയ്ക്ക് പിന്നിലെന്നാണ് പൊലീസ് കണ്ടെത്തൽ. കേസ് അട്ടിമറിക്കാൻ കോടികൾ ചെലവഴിക്കാൻ ശേഷിയുള്ളവരാണ് പ്രതികളെന്ന് അന്വേഷണസംഘം കാസർകോട് ജില്ലാ സെഷൻസ് കോടതിയിൽ റിപ്പോർട്ട് നൽകി.

സാക്ഷികളെക്കൊണ്ടു ദിലീപിന് അനുകൂലമായി മൊഴി മാറ്റുന്നതിന് വേണ്ടി ഒരുസംഘം ജനുവരി 20ന് എറണാകുളത്ത് യോഗം ചേർന്നു. കേസിലെ മാപ്പുസാക്ഷിയായ വിപിൻ ലാലിന് പുറമെ മറ്റു സാക്ഷികളെയും ദിലീപിന് അനുകൂലമായി മൊഴി നൽകുന്നതിന് വേണ്ടി സ്വാധീനിക്കാൻ ശ്രമിച്ചു. ദിലീപിൻറെ ഡ്രൈവർ അപ്പുണ്ണി എന്നു വിളിക്കുന്ന സുനിൽ രാജുമായി ഫോണിൽ പ്രദീപ് ബന്ധപ്പെട്ടതായി സംശയിക്കുന്നു.

സംഭവവുമായി ബന്ധപ്പെട്ട് സാക്ഷിക്ക് കോൾ വന്ന ദിവസം പ്രദീപിൻറെ പഴ്സനൽ നമ്പരും സാക്ഷിയെ വിളിച്ച നമ്പരും കൊല്ലം ജില്ലയിലെ വിളക്കുടി എന്ന ടവർ ലൊക്കേഷനിലാണ്. തിരുനെൽവേലിയിൽനിന്ന് സിം കാർഡ് എത്തിച്ചത് പ്രദീപിൻറെ സുഹൃത്ത് മനോജ് വഴി മുത്തുപാണ്ഡ്യൻ എന്നയാളാണ്. ദിലീപ് ജയിലിലായിരുന്നപ്പോൾ ആലുവ സബ് ജയിലിൽ ഗണേഷ് കുമാറിനൊപ്പം പ്രദീപ് സന്ദർശിച്ചിട്ടുണ്ട്. സോളർ കേസിൻറെ വിചാരണയ്ക്കിടെ പ്രതിയെ സ്വാധീനിച്ച് തെളിവുകൾ നശിപ്പിക്കാൻ ശ്രമിച്ചതിന് കമ്മിഷൻ വിസ്തരിച്ചിരുന്നു.

കേസിൽ സാക്ഷിയെ സ്വാധീനിക്കാനും കേസ് അട്ടിമറിക്കാനും പ്രതി കോടികൾ ചെലവാക്കുമെന്നതിൽ സംശയമില്ല. നടിയെ ആക്രമിച്ച കേസ് അട്ടിമറിക്കാൻ രാഷ്ട്രീയ–സിനിമാ രംഗത്തെ ഉന്നതരുടെ വൻ ഗൂഢാലോചന നടന്നതായാണ് നിഗമനം. പ്രദീപിന് സാക്ഷിയെ സ്വാധീനിക്കേണ്ട ആവശ്യമില്ലെന്നും പിന്നിൽ വൻസംഘമുണ്ടെന്നും അവരെ കണ്ടെത്തണമെന്നും പ്രോസിക്യൂഷൻ കോടതിയിൽ വാദിച്ചു.

Spread the love