Wednesday, January 19

അന്ന സ്വിർന്റെ രണ്ടു കവിതകൾ

 

മൂന്നാം നിലയിൽ നിന്ന് അച്ഛൻ ചാടിയില്ല.

അന്ന സ്വിർ (പോളണ്ട്, 1909-1984)

പരിഭാഷ: പി.രാമൻ

 

രണ്ടാം ലോകയുദ്ധം.
വാഴ്സ.
തീയേറ്റർ ചത്വരത്തിൽ
ഇന്നു രാത്രി അവർ ബോംബിട്ടു.

അവിടെയാണ്
അച്ഛന്റെ പണിയാല.
പെയിന്റിങ്ങുകൾ.
നാല്പതു കൊല്ലത്തെ പ്രയത്നം.

പിറ്റേന്നു രാവിലെ അച്ഛൻ
തീയേറ്റർ ചത്വരത്തിലെത്തി;
കണ്ടു:

മേൽക്കൂരയില്ലാത്ത
ചുമരുകളില്ലാത്ത
തറയില്ലാത്ത
തന്റെ പണിയാല.

അച്ഛൻ മൂന്നാം നിലയിൽ നിന്ന്
എടുത്തു ചാടിയില്ല.
വീണ്ടും തുടങ്ങി,
ആദ്യം  മുതൽ

 

ഒരു സൈനികൻ മരിക്കുമ്പോൾ

സ്ട്രെച്ചറിനരികെ നിലത്ത്
ഞാൻ മുട്ടുകുത്തി
അവനോടു ചേർന്നിരുന്നു.
അകക്കുപ്പായത്തിന്മേൽ
ഉമ്മ വെച്ചു.
ഞാൻ പറഞ്ഞു കൊണ്ടിരുന്നു,
നീയെത്ര സുന്ദരൻ
എന്തോരം സന്തോഷം തരാൻ
നിനക്കു കഴിയും, നിനക്കു തന്നെ അറിയില്ലത്.
നിനക്കൊന്നും പറ്റില്ല, എന്റെ സുന്ദരൻ ചുണക്കുട്ടാ.

അവൻ ചിരിച്ചു, ശ്രദ്ധിച്ചു.
കൺപോളകൾ കനത്തുകനത്തു വന്നു
ഒരു സൈനികനോട് ഇത്തരം വാക്കുകൾ പറയുന്നത്
മരിക്കുമ്പോൾ മാത്രമാണെന്ന്
അവനറിഞ്ഞതേയില്ല.

വര: ഹൃദയ്

Spread the love
Read Also  ബാസിൽ ഫെർണാണ്ടോയുടെ രണ്ടു കവിതകൾ ; പരിഭാഷ: പി.രാമൻ