Wednesday, January 19

കവിതാ ചോരണം ; ദീപാ നിശാന്ത് ‘ന്യായീകരണ’വുമായി രംഗത്ത്

കവിത കോപ്പിയടിച്ചു പ്രസിദ്ധീകരിച്ചു എന്ന ആരോപണത്തിന് വിധേയയായ ദീപ നിശാന്ത് വാർത്ത വന്നപ്പോൾ ഫെയ്സ് ബുക്കിലൂടെ  വീണിടത്തു കിടന്നുരുളുന്നു. സ്വന്തം കവിത എഴുതുന്നതിനുമുമ്പ് എസ് കലേഷ്  7 വർഷം മുമ്പ് കോപ്പിയടിച്ചു എന്ന് സഹൃദയർ കരുതിക്കൊള്ളണം. ഈ രീതിയിലാണ് കുറിപ്പ് എഴുതിയിരിക്കുന്നത്. കമൻ്റുകളിൽ വായനക്കാർ ദീപയെ നന്നെ പരിഹസിക്കുന്നുണ്ട്. കവിത തൻ്റെ തട്ടകമല്ല എന്ന് ദീപ പറയുന്നുണ്ട്. പിന്നെന്തിനാണ് ഡി സി ബുക്സിലൂടെ ഒരു കവിതാ സമാഹാരം പ്രസിദ്ധീകരിച്ചിരിക്കുന്നത് എന്ന ചോദ്യം പ്രസക്തം. എന്തൊരു സാംസ്കാരിക ദുരന്തം. 

ദീപ നിശാന്തിൻ്റെ ഫെയ്സ് ബുക്ക് പോസ്റ്റ്

കവിത മോഷ്ടിച്ചവൾ എന്നൊരു തസ്തിക കൂടി ഇന്ന് പുതുതായി ലഭിച്ചിട്ടുണ്ട്. എസ് കലേഷ് മുൻപെഴുതിയ ഒരു കവിത ഞാൻ മോഷ്ടിച്ച് പ്രസിദ്ധീകരിച്ചു എന്നാണ് ഒരുപാട് പേർ ആർത്തുവിളിക്കുന്നത്. കിട്ടിയ സന്ദർഭം മുതലാക്കി മുൻപു മുതലേ എന്റെ നിലപാടുകളിൽ അമർഷമുള്ളവരും ആഘോഷം തുടങ്ങിയിട്ടുണ്ട്. അവസരം മുതലാക്കി ആർപ്പുവിളിക്കുന്നവരോട് ഒന്നേ പറയാനുള്ളൂ. ഒരു സർവ്വീസ് മാസികയുടെ താളിൽ ഒരു കവിത മോഷ്ടിച്ചു നൽകി എഴുത്തുകാരിയാകാൻ മോഹിക്കുന്ന ഒരാളാണ് ഞാനെന്ന് വിശ്വസിക്കുന്നവർ അങ്ങനെ വിശ്വസിക്കുക. തെളിവുകളാണല്ലോ സുപ്രധാനം. ചില എഴുത്തുകൾക്കു പുറകിലെ വൈകാരികപരിസരങ്ങളെ നമുക്ക് അക്കമിട്ട് നിരത്തി തെളിയിക്കാനാകില്ല.

കവിത എന്റെ സ്ഥിരം തട്ടകമേയല്ല. കവിതയിലല്ല ദീപാനിശാന്ത് എന്ന പേര് ഇന്ന് ആരും അറിയുന്നതും. ഒരു സർവ്വീസ് പ്രസിദ്ധീകരണത്തിനായി സ്വന്തം ആധികാരികത മുഴുവൻ ചോദ്യം ചെയ്യുന്ന ഒരു പ്രവൃത്തി ഞാൻ ചെയ്യും എന്നു കരുതുന്നുണ്ടെങ്കിൽ അങ്ങനെ തന്നെ മുന്നോട്ട് പോകുക.

ഞാനിതിൽ വീണുപോകും എന്ന് ആരും മോഹിക്കേണ്ടതില്ല. കഴിഞ്ഞ കുറേക്കാലമായി പരിഹാസങ്ങൾക്കും അപവാദങ്ങൾക്കും മധ്യേയാണ് എന്റെ ജീവിതം കടന്നു പോയത്. ഇതും അതിലൊരധ്യായം എന്നേ കരുതുന്നുള്ളൂ. എന്റെ സർഗാത്മക ജീവിതവും രാഷ്ട്രീയ ജീവിതവുമെല്ലാം ശിരസ്സുയർത്തിപ്പിടിച്ചു തന്നെ ഇനിയും തുടരും.

എന്റേതല്ലാത്ത ഒരു വരിയും ഇന്നുവരെ എന്റേതെന്ന് അവകാശപ്പെടാതിരുന്നിട്ടും എനിക്ക് ഇന്ന് സംഭവിച്ച ദുഃഖത്തിൽ ഒപ്പം നിൽക്കുന്ന എല്ലാവരോടും നന്ദിയുണ്ട്.

ഇക്കാര്യത്തിൽ എന്റെ ആദ്യത്തെയും അവസാനത്തെയും വിശദീകരണമാണിത്. ഇതിൽ കൂടുതലായി ഒന്നും പറയാനില്ല. ചില അനുഭവങ്ങൾ ഇങ്ങനെയും ബാക്കിയുണ്ടാവും എന്നു മാത്രം കരുതുന്നു.

Spread the love
Read Also  ആലായാൽ തറവേണമുൾപ്പടെയുള്ള പാട്ടുകൾക്ക് പിന്നിലുള്ള പ്രേംനാഥിൻ്റെ പേര് കാവാലം പറയാതിരുന്നതിന് കാരണം ജാതി തന്നെയാണ് -പ്രമീള പ്രേംനാഥ്

Leave a Reply