Wednesday, January 19

“മനുഷ്യരെ വലിച്ചടുപ്പിക്കുന്ന കാന്തമായിരുന്നു ബ്രിട്ടോ ” -എം എ ബേബി

ബ്രിട്ടോക്കും എനിക്കും ഒരേ വയസ്സാണ്.

1954 മാർച്ച് 24ന് ബ്രിട്ടോയും പത്തു ദിവസം കഴിഞ്ഞ് ഞാനും ജനിച്ചു. ഒരുമിച്ചു വിദ്യാർത്ഥി പ്രവർത്തകരായി, ഒരേ രാഷ്ട്രീയം പങ്കു വച്ചു, ഒരുമിച്ചു വായിച്ചു, ഒരുമിച്ചു പഠിച്ചു. അസാധാരണമായ ഒരു ആത്മബന്ധവുമുണ്ടായിരുന്നു ഞങ്ങൾ തമ്മിൽ. കൂടെ നിന്ന ബ്രിട്ടോ പക്ഷേ, ഇത്രവേഗം പോകാമെന്നത് എൻറെ ചിന്തയിൽ വന്നതേയില്ല. ജീവിച്ചിരിക്കാനായി വലിയ ഇച്ഛാശക്തിയോടെ പതിറ്റാണ്ടുകൾ പൊരുതിയവനാണ് ബ്രിട്ടോ. ഈ ശാരീരിക പരിമിതികൾക്കിടയിൽ സാധാരണ മനുഷ്യർ ചെയ്യാനിടയില്ലാത്ത ഒരുപാടു കാര്യങ്ങൾ ബ്രിട്ടോ ചെയ്തു. എൻറെ അനുശോചനം ചോദിച്ച ടെലിവിഷൻ ചാനലുകളോടും പത്രങ്ങളോടും ഞാൻ ഒന്നും പറഞ്ഞില്ല. എപ്പോഴും വരാവുന്ന ഒരു ഫോൺവിളിയായി ഇനി ബ്രിട്ടോ ഇല്ല എന്ന യാഥാർത്ഥ്യവുമായി പൊരുത്തപ്പെടുക എളുപ്പമായിരുന്നില്ല.

മനുഷ്യരെ വലിച്ചടുപ്പിക്കുന്ന കാന്തമായിരുന്നു ബ്രിട്ടോ .

1977 ൽ അടിയന്തിരാവസ്ഥയ്ക്ക് ശേഷമുള്ള ആദ്യ എസ്എഫ്ഐ സംസ്ഥാന സമ്മേളനം ഫോർട്ട് കൊച്ചിയിൽ വച്ചാണ് നടക്കുന്നത്. അന്നു മുതൽ ബ്രിട്ടോയെ പരിചയമുണ്ട്. പിന്നെ എസ്എഫ്ഐ പ്രവർത്തനങ്ങളുമായി എപ്പോഴൊക്കെ എറണാകുളത്തു പോയിട്ടുണ്ടോ, അപ്പോഴൊക്കെ ബ്രിട്ടോ അവിടെ ഉണ്ടാകും, എറണാകുളത്തെ ജില്ലാതല നേതാവായി. പിന്നെ സംസ്ഥാന കമ്മിറ്റി അംഗവും വൈസ് പ്രസിഡണ്ടുമായി. ബ്രിട്ടോയുടെ പ്രത്യേകത അന്ന് ഫാഷനായിരുന്ന ബെൽബോട്ടം പാൻറാണ്. വളരെ നിറങ്ങളുള്ള വസ്ത്രങ്ങളാണ് ധരിക്കുക. ഏത് ആൾക്കൂട്ടത്തിലും ശ്രദ്ധിക്കപ്പെടുന്ന വ്യക്തിത്വം. ബ്രിട്ടോക്ക് പഠിത്തത്തിനിടയിൽ ചില തടസ്സങ്ങളുണ്ടായി, പലയിടത്തും പഠിക്കാൻ പോയി. അതാണ് ഞങ്ങൾ ഒരേ പ്രായക്കാരാണെങ്കിലും ബ്രിട്ടോ എസ്എഫ്ഐയിൽ എൻറെ അടുത്ത തലമുറയിൽ വരുന്നത്.

1983 ഒക്ടോബർ 14ന് പഴനിയിൽ നടന്ന എസ്എഫ്ഐയുടെ തമിഴ്നാട് സംസ്ഥാന സമ്മേളനത്തിൽ ഞാൻ സംസാരിച്ചുകൊണ്ടു നില്ക്കുമ്പോഴാണ് ഒരു സഖാവ് വേദിയിലേക്ക് ഒരു കുറിപ്പ് തന്നത്. സഖാവ് സൈമൺ ബ്രിട്ടോയെ ഗുരുതരമായി കുത്തി പരിക്കേല്പിച്ചിരിക്കുന്നു. അപ്പുറത്തേക്കോ ഇപ്പുറത്തേക്കോ എന്ന നിലയിൽ എറണാകുളത്തെ മെഡിക്കൽ ട്രസ്റ്റ് ആശുപത്രിയിലാണ് സഖാവ്. അന്ന് ഞാൻ എസ് എഫ് ഐ അഖിലേന്ത്യാ പ്രസിഡണ്ട് ആണ്. ഉടൻ എറണാകുളത്തെത്തി ബെറ്റിയും നട ദുവ്വുരിയുമായാണ് ആശുപത്രിയിൽ പോയി ബ്രിട്ടോയെ കണ്ടത്. ബ്രിട്ടോ ജീവിക്കുമോ മരിക്കുമോ എന്നതിൽ ഏതാനും ദിവസം ഉറപ്പില്ലായിരുന്നു. നട്ടെല്ലിനാണ് അഞ്ച് കുത്തേറ്റത്. കൊല്ലണം എന്നു തീരുമാനിച്ച് വന്ന് പിടിച്ചു വച്ച് കുനിച്ചു നിറുത്തി പിന്നിൽ നിന്ന് ആവർത്തിച്ച് കുത്തുകയായിരുന്നു. മെഡിക്കൽ ട്രസ്റ്റിൽ അന്ന് ഡോ. പുളിക്കൻ ഉള്ള കാലമാണ്. സഖാവ് എ പി വർക്കി പാർടി ജില്ലാ സെക്രട്ടറിയും. ബ്രിട്ടോയെ നോക്കുന്നതിൻറെ ഉത്തരവാദിത്തം സഖാവ് എ പി നേരിട്ട് ഏറ്റെടുത്തു. എന്തു ക്ലേശിച്ചും ജീവൻ രക്ഷിക്കേണ്ട ആളാണിത് എന്നാണ് ഡോ. പുളിക്കനോട് സഖാവ് എ പി പറഞ്ഞത്. ഡോക്ടർമാരുടെ മുഴുവൻ ശക്തിയും എടുത്തു. ഒടുവിൽ ബ്രിട്ടോ ജീവിതത്തിലേക്ക് തിരിച്ചു വരിക തന്നെ ചെയ്തു.

മനുഷ്യരെ തന്നിലേക്കാകർഷിക്കാനുള്ള ഒരു കാന്തിക സ്വഭാവം ബ്രിട്ടോക്ക് ഉണ്ടായിരുന്നു. പാർടിക്കു വേണ്ടി വിട്ടുവീഴ്ച ഇല്ലാത്ത നിലപാട് എടുക്കുന്ന ആളായിരുന്നു ബ്രിട്ടോ. സാധാരണ സഖാക്കളിലും കവിഞ്ഞ ആത്മാർത്ഥത, എല്ലാവരോടുമുള്ള നിറഞ്ഞ സ്നേഹം, വായിച്ച് പഠിച്ചാണ് അഭിപ്രായം പറയുക, സഖാക്കൾക്ക് ക്ലാസെടുക്കേണ്ട കേഡർ എന്ന നിലയിലാണ് ബ്രിട്ടോ പ്രവർത്തിച്ചിരുന്നത്. ഈ സ്വഭാവങ്ങൾ കൊണ്ടാണ് ബ്രിട്ടോയോട് സഖാക്കൾക്കെല്ലാം അസാധാരണമായ ആദരവ് ഉണ്ടായത്.

കേരളത്തിലെ കാമ്പസുകളിൽ എസ്എഫ്ഐ വളരുന്ന കാലമായിരുന്നു അത്. അറുപതുകളിൽ കേരള വിദ്യാർത്ഥി ഫെഡറേഷൻ എന്നപേരിൽ ഉശിരൻ സമരങ്ങളിലുടെ അവകാശ ബോധമുള്ള വിദ്യാർത്ഥികളുടെ മനസ്സിൽ ഇടം നേടിയെങ്കിലും പരിമിത സ്വാധീനം മാത്രമേ സംഘടനക്കുണ്ടായിരുന്നുള്ളു . സംസ്ഥാന തലങ്ങളിൽ പ്രവർത്തിച്ചിരുന്ന സംഘടനകൾ സംയോജിച്ച് തിരുവനന്തപുരത്തുവച്ച്1970ൽ സ്ഥാപിക്കപ്പെട്ട എസ്എഫ്ഐ 1980 ആവുമ്പോഴേക്കും കേരളത്തിലെ ഏറ്റവും വലിയ വിദ്യാർത്ഥി സംഘടന ആയി. കോൺഗ്രസിൻറെ വിദ്യാർത്ഥി സംഘടന ആയിരുന്ന കെ എസ് യു ആയിരുന്നു അന്ന് കാമ്പസ്സുകൾ അട ക്കിവാണിരുന്നത്. നീചമായ ശാരീരിക ആക്രമണങ്ങളിലൂടെ ആണ് എസ് എഫ് ഐ യുടെ മുന്നേറ്റത്തെ അവർ നേരിട്ടത്. നിരന്തരം സഖാക്കൾ ആക്രിമിക്കപ്പെട്ടു, കൊല്ലപ്പെട്ടു. ഇതേസമയം തന്നെ അക്രമം നടത്തുന്ന കമ്യൂണിസ്റ്റുകാർ, സമാധാന കാംക്ഷികളായ ബൂർഷ്വാ പാർടികൾ എന്ന പ്രതീതി കേരളത്തിലാകെ ഉണ്ടാക്കാൻ മാധ്യമ ധാർമികത തീരെയില്ലാത്ത മലയാള പത്രങ്ങൾ നിരന്തരം ആസൂത്രിത ശ്രമം തുടർന്നു. ആ കാലത്തെ കെ എസ് യു അക്രമത്തിൻറെ ഇരയാണ് സൈമൺ ബ്രിട്ടോയും. കാമ്പസുകളിലെ ഏറ്റവും പ്രതിഭാശാലികളെ കൂട്ടത്തിലണി നിരത്തിയാണ് എസ്എഫ്ഐ ഈ അക്രമത്തെ അതിജീവിച്ചത്, തിരിച്ച് ഒരാളെ പോലും കൊല്ലാതെ. കാമ്പസിലെ പ്രതിഭാശാലികളെ വലിച്ചടുപ്പിക്കുന്ന കൂട്ടത്തിൽ എസ് എഫ് ഐയിൽ വന്നു ചേർന്ന മിടുക്കനാണ് ബ്രിട്ടോയും. കമ്യൂണിസ്റ്റ് പാർടിക്കു നേരെയാണ് ഏറ്റവുമധികം അക്രമം ഉണ്ടായതെന്നതിന് നേരിട്ടുള്ള തെളിവാണ് ഞാൻ എന്ന് നിയമസഭയിൽ ബ്രിട്ടോ പ്രസംഗിച്ചിട്ടുമുണ്ട്.

Read Also  സ്വപ്ന സുരേഷ് മൊഴി നൽകിയത് പ്രലോഭനം മൂലമാണെന്ന് എം എ ബേബി

അതിരില്ലാത്ത പാർട്ടിക്കൂറും രാഷ്ട്രീയ പക്വതയും

ശാരീരിക അവശതകളും ക്ലേശങ്ങളും മറ്റും ബ്രിട്ടോയെ ഒരിക്കലും പാർടിക്ക് എതിരെ ഒരു നിലപാട് എടുക്കുന്നതിൽ എത്തിച്ചില്ല. പലപ്പോഴും മനസ്സ് ആഗ്രഹിക്കുന്നതുപോലെ ശരീരം ചലിക്കാതിരിക്കുമ്പോൾ പലർക്കും നിരാശയുണ്ടാവും, കുട്ടികളാണെങ്കിൽ മാതാപിതാക്കളോടും സഹോദരങ്ങളോടും കലഹമുക്കുണ്ടാക്കും. ബ്രിട്ടോ പാർടിയെ ഒരിക്കലും എതിർത്തില്ല. നയപരമായ കാര്യങ്ങളിൽ പാർടി തീരുമാനമെടുക്കുമ്പോൾ, പാർടി ഇക്കാര്യം ശ്രദ്ധിക്കണം, ഇന്ന വിഷയത്തിൽ പാർടി ഒരു തീരുമാനമെടുക്കുമ്പോൾ, ഇങ്ങനെ ഒരു അപകടത്തിലേക്ക് പോകാനുള്ള സാധ്യത ഉണ്ട്, അതുണ്ടാകാതെ നോക്കണം, ഇങ്ങനെ പാർടി നയവുമായും പാർടി തീരുമാനങ്ങളുമായി ബന്ധപ്പെട്ട് ബ്രിട്ടോയെ അലട്ടുന്ന ആശങ്കകളും സംശയങ്ങളും പറയാനായി എപ്പോഴും വിളിക്കുമായിരുന്നു. ഉദാഹരണത്തിന് എവിടെയെങ്കിലും വിദ്യാർത്ഥികളുമായി ബന്ധപ്പെട്ട പ്രശ്നങ്ങളുണ്ടെങ്കിൽ ബ്രിട്ടോ വിളിക്കും. മഹാരാജാസ് കോളേജിൽ വിദ്യാർത്ഥികൾ സമരത്തിലായിരുന്നപ്പോൾ, പാർടി ഇത്ര ശ്രദ്ധിച്ചാൽ പോര, പാർടി കൂടുതൽ ശ്രദ്ധിക്കണം. ജില്ലയിലെസഖാക്കൾ ശ്രദ്ധിക്കുന്നുണ്ട് ; എന്നാൽസഖാവും ശ്രദ്ധിക്കണം എന്നതരത്തിലാവും ജാഗ്രതപ്പെടുത്തൽ. അങ്ങനെയെല്ലാമുള്ള കാര്യങ്ങൾ ഓരോരുത്തരെയും വിളിച്ച് ബ്രിട്ടോ സംസാരിക്കുമായിരുന്നു. ഈ കരുതലാണ് അഭിമന്യുവിനെപ്പോലുള്ള ഇന്നത്തെ വിദ്യാർത്ഥി സഖാക്കളുമായി ഊഷ്മളമായ ഒരു ഹൃദയബന്ധം സ്ഥാപിക്കുവാൻബ്രിട്ടോക്ക് സ്വാഭാവികമായിസാധിക്കുന്നസാഹചര്യം രൂപപ്പെടുത്തിയത്.

നയവുമായി ബന്ധപ്പെട്ട പ്രശ്നം വരുമ്പോഴും തൻറെ പാർടി ഘടകത്തിൽ ബ്രിട്ടോ സംസാരിക്കുകയും ഞങ്ങളെപ്പോലെ ചിലരോട് ഫോണിൽ വിളിച്ച് സംസാരിക്കാനുള്ള സ്വാതന്ത്ര്യം ഉപയോഗപ്പെടുത്തുകയും ചെയ്യും. തൻറെ ചിന്തകൾ പാർടി ഘടകത്തിൽ പങ്കു വയ്ക്കുക ; പാർടി സഖാക്കളുമായി പങ്കു വയ്ക്കുക ,അതാണ് തൻറെ ഉത്തരവാദിത്തം എന്ന് ബ്രിട്ടോ എന്നും കരുതിയിരുന്നു. ഏതു ഘടകത്തിൽ പ്രവർത്തിക്കുന്ന പാർടി പ്രവർത്തകരുമായും സംസാരിക്കാനുള്ള സ്വാതന്ത്ര്യം ബ്രിട്ടോക്ക് ഉണ്ടായിരുന്നു. സഖാവ് പിണറായിയെയൊക്കെ ചില സമയത്ത് വിളിക്കാറുണ്ടായിരുന്നു. സഖാവ് കോടിയേരിയുമായി ഒരുമിച്ചൊരു കമ്മിറ്റിയിൽ ഉണ്ടായിരുന്നതു മുതലുള്ള ബന്ധമാണ്. എസ് എഫ് ഐയിൽ സമകാലികരായിരുന്ന സുരേഷ് കുറുപ്പ്, തോമസ് ഐസക്ക്, മത്തായിചാക്കോ, ചന്ദ്രചൂടൻ, അശോക് എം ചെറിയാൻ , പി .കെ ഹരികുമാർ, ഷീബാതോമസ് , സി പി ജോൺ തുടങ്ങി ഒട്ടനവധി പേരുമായി ആത്മബന്ധം പുലർത്തുകയും രാഷ്ട്രീയമായി വ്യത്യസ്ഥതകളുണ്ടായാലും വ്യക്തിബന്ധം കാത്തുസൂക്ഷിക്കുകയും ചെയ്യുന്ന പ്രകൃതമായിരുന്നു ബ്രിട്ടോയുടേത്. ഇത്തരംബന്ധങ്ങൾ ദീർഘമായ ടെലിഫോൺചർച്ചകൾക്കും വഴിവക്കും.

കമ്യൂണിസ്റ്റ് പാർടിക്ക് ,സവിശേഷ രാഷ്ട്രീയ സന്ധി ആവശ്യപ്പെടുന്ന നിലപാടുകൾ അപ്പപ്പോൾ എടുക്കേണ്ടി വരും. അതിൽ വൈകാരികമായി തന്നെ സഖാക്കൾക്ക് പലതും തോന്നാം. എന്നാൽ ഉയർന്ന രാഷ്ട്രീയബോധം ഉണ്ടെങ്കിൽ മാത്രമേ എന്തുകൊണ്ട് എങ്ങനെ ഇത്തരം ഒരു രാഷ്ട്രീയ നിലപാട് എടുത്തു എന്നത് ബോദ്ധ്യമാവുകയുള്ളു ; ആ നയം സ്വന്തം കാഴ്ചപ്പാടായിസ്വാംശീകരിക്കപ്പെടുകയുള്ളു. എത്ര വൈകാരികമായ സന്ദേഹങ്ങൾ കണ്ടാലും ബ്രിട്ടോ ഒടുവിൽ പാർടിയുടെ തീരുമാനങ്ങൾ അംഗീകരിച്ചു.

ബ്രിട്ടോ പാർടി ലോക്കൽ കമ്മിറ്റി മെമ്പറായിരുന്നു. ഒരുപാട് യാത്രയും മറ്റും വന്നിട്ട് ലോക്കൽക്കമ്മിറ്റി അംഗമായി പ്രവർത്തിക്കാൻ തനിക്ക് സൌകര്യക്കുറവുണ്ട്, പാർടി അംഗമായി തുടർന്നാൽ മതി എന്നു തീരുമാനിച്ചത് സഖാവ് ബ്രിട്ടോ തന്നെയാണ്. ലോക്കൽ കമ്മിറ്റി അംഗമെന്ന നിലയിൽ ചുമതലകൾ വരികയും മറ്റും ചെയ്യുമ്പോൾ എപ്പോഴും നാട്ടിൽ ഉണ്ടാവണമല്ലോ, അതൊരു ആലങ്കാരിക പദവി അല്ലല്ലോ. നിയമസഭയിലെ ഇടപെടലുകളും ബ്രിട്ടോ വളരെ പഠിച്ചു തന്നെയാണ് ചെയ്തിരുന്നത്. ഞങ്ങൾ നിയമസഭാംഗങ്ങളായിരുന്നതും ഒരുമിച്ചാണ്- 2006 മുതൽ 11 വരെ പന്ത്രണ്ടാം നിയമസഭയിൽ. തിരുവനന്തപുരത്ത് ഇത്രയും വലിയ നിയമസഭാ സമുച്ചയം ഉണ്ടാക്കിയിട്ടും അതിൽ അംഗപരിമിതി ഉള്ളവർക്ക് കയറാൻ വഴിയുണ്ടാക്കണമെന്ന് ആലോചിച്ചിരുന്നില്ല. നിയമസഭാംഗമായി ബ്രിട്ടോ വന്നപ്പോഴാണ് അങ്ങനെ ഒരു പ്രശ്നം ഉയർന്നു വന്നത്. ബ്രിട്ടോയുടെ ശ്രമഫലമായാണ് കേരള നിയമസഭയെ അംഗപരിമിതി ഉള്ളവർക്കു സൌഹൃദപൂർണമാക്കുന്നത്. അത്തരമൊരു അനീതിയും അപാകതയും ഉള്ളിടത്തെത്തിയാൽ അത് ചോദ്യം ചെയ്യാതെ വിടുക ബ്രിട്ടോയുടെ രീതി അല്ലായിരുന്നു.

Read Also  കേരളം പന്ത്രണ്ടാം നൂറ്റാണ്ടിൽ തന്നെ മനിതിയോടു കാണിച്ചത് നെറികേട് ; രഘു നന്ദനൻ എഴുതുന്നു

എഴുത്തുകാരനായ ബ്രിട്ടോ

കുത്തേറ്റ ശേഷം ശാരീരികമായ പ്രതിസന്ധി ഉണ്ടായപ്പോൾ വായനയിലേക്കും എഴുത്തിലേക്കും കൂടുതൽ മുഴുകുകയാണ് ബ്രിട്ടോ ചെയ്തത്. പരിമിതികൾ മറികടന്ന് അസാധ്യമെന്നു കരുതാവുന്ന സഞ്ചാരങ്ങൾ നടത്തി, ബ്രിട്ടോ. ഉത്തരേന്ത്യ മുഴുവൻ യാത്ര ചെയ്തു, ഹിമാലയത്തിൽ പോയി. യുവസംഗീതജ്ഞൻ പോളി വർഗീസുമായി ചേർന്ന് ഉത്തരേന്ത്യ മുഴുവൻ വിശദമായൊരു യാത്ര ചെയ്യാനുള്ള പരിപാടിയിലായിരുന്നു. അത് നിർവഹിക്കാനായില്ല. ബംഗാളിലൂടെ വിശദമായ വേറൊരു യാത്ര ആയിരുന്നു ഒരു ആഗ്രഹം. ചൈനീസ് ബുദ്ധ സന്യാസി ആയിരുന്ന ഹു യാൻ സാങിൻറെ യാത്രവിവരണം വായിച്ചിട്ട് ആ യാത്രാപഥത്തിലൂടെയുള്ള ഹിമാലയം കടക്കുന്ന ഒരുയാത്രയുംആയിരുന്നു മനസ്സിലെ മറ്റൊരുപരിപാടി. യാത്രയ്ക്കുള്ള ഒരവസരവും ബ്രിട്ടോ മുടക്കിയില്ല. കേരളത്തിനകത്തും പാർടി പരിപാടികൾക്കും അല്ലാതെയുമായി ബ്രിട്ടോ നിരന്തരം യാത്ര ചെയ്തു. കൊല്ലത്ത് കഴിഞ്ഞ തെരഞ്ഞെടുപ്പിൽ ഞാൻ മത്സരിച്ചപ്പോൾ നാലഞ്ചു ദിവസമാണ് ബ്രിട്ടോ വന്നു നിന്ന് പ്രചാരണം നടത്തിയത്. അതിനു മുമ്പ് 2006ൽ നിയമസഭയിലേക്ക് മത്സരിച്ചപ്പോൾ പത്തു ദിവസം കുണ്ടറയിൽ താമസിച്ച് വിപുലമായി യോഗങ്ങളിൽ സംസാരിച്ചു. വളരെ വികാരംകൊണ്ടായിരുന്നു ബ്രിട്ടോയുടെ ഓരോ പ്രസംഗവും. മനുഷ്യൻറെ ഇച്ഛാശക്തിയുടെ ജീവിക്കുന്ന ഉദാഹരണമായി സഖാവ് ബ്രിട്ടോ കത്തിജ്വലിച്ചു നില്ക്കുകയായിരുന്നു.

മാഗ്നം ഓപ്പസ് എഴുതാൻ പറ്റാതെയാണ് ബ്രിട്ടോ മരിച്ചത്. അഗ്രഗാമി, മഹാരൌദ്രം എന്നീ നോവലുകളാണ് പ്രധാന കൃതികൾ. നോവൽ എഴുതുക എന്നത് വളരെ ശ്രമകരമായ ഒരു ജോലിയാണല്ലോ. അത് ചെയ്യുക, മലയാള സാഹിത്യത്തിൽ ശ്രദ്ധിക്കപ്പെടുന്ന കൃതി കൾ എഴുതുക എന്നത് അത്ര ലഘുവായ കൃത്യമല്ല. ബ്രിട്ടോയുടെ രചനകൾ മഹത്തായ കൃതികൾ ആണോ എന്നതൊക്കെ നിരൂപകർ പറയണം. പക്ഷേ, അവ അവഗണിക്കാനാവുന്നവയല്ല. താൻ ജീവിക്കുന്ന കാലഘട്ടത്തെ നോവലിലൂടെ ആവിഷ്കരിക്കുക എന്നത് സർഗാത്മകത ആവശ്യപ്പെടുന്ന ഒരു കാര്യമാണ്. സാധാരണ ഒരു പുസ്തകം എഴുതുന്ന പോലല്ലല്ലോ നോവലെഴുത്ത്. കടുത്ത ശാരീരിക വയ്യായ്കകൾക്കിടയിലും ബ്രിട്ടോ നോവലുകൾ എഴുതി ശ്രദ്ധേയനായി. എന്നു മാത്രമല്ല, നോവലിനുവേണ്ട അനുഭവങ്ങൾ ശേഖരിക്കുന്നതിനായി ഇന്ത്യ മുഴുവൻ സഞ്ചരിക്കുക, അവ ഉരുക്കിയൊഴിച്ച് വീണ്ടും എഴുതുക. അതിനു വേണ്ടി ചരിത്രം പഠിക്കുക, ഇവയൊക്കെ ചെയ്തു, ശാരീരിക അവശതകൾ വെല്ലുവിളിയായെടുത്തുകൊണ്ട്.

ബ്രിട്ടോയുടെ വിവാഹം

ബ്രിട്ടോ വിവാഹിതനാവാൻ തീരുമാനിച്ചപ്പോൾ പല സ്നേഹിതർക്കും വേണ്ടപ്പെട്ടവർക്കും സഖാക്കൾക്കും സംശയമായിട്ടുണ്ടാവാം, ഈ ശാരീരികാവസ്ഥയിൽ ബ്രിട്ടോ ഒരു കുടുംബജീവിതത്തിലേക്ക് പോകണോ? എന്നാൽ പാർടിയിൽ ആരെങ്കിലും നിരുത്സാഹപ്പെടുത്തി എന്ന് ബ്രിട്ടോ എന്നോടൊരിക്കലും പറഞ്ഞിട്ടില്ല. എന്നോട് ഈ വിഷയം അവതരിപ്പിച്ചപ്പോൾ, ബ്രിട്ടോ ആണ് ഇക്കാര്യത്തിൽ തീരുമാനമെടുക്കേണ്ടത് എന്നാണ് ഞാൻ മറുപടി പറഞ്ഞത്. ബ്രിട്ടോക്ക് ഏതാണ് ശരിയാണെന്നു തോന്നുന്നുവോ ആ തീരുമാനത്തിൽ ധൈര്യമായി മുന്നോട്ട് പോവുക. ബ്രിട്ടോ ഇങ്ങനെ ചെയ്യുന്നത് ശരിയാണോ അല്ലയോ എന്നു ഞാൻ തീരുമാനിക്കുന്നത് ശരിയല്ലല്ലോ.
ഇതുപോലൊരു സാഹചര്യത്തിൽ സഖാവു പറഞ്ഞ മറുപടി തന്നെയാവും ഞാനും പറയുമായിരുന്നത് എന്ന് ബ്രിട്ടോ പിന്നീടൊരിക്കൽ എന്നോടുപറഞ്ഞു.
രാഷ്ട്രീയ നിശ്ചയദാർഢ്യത്തോടെയുള്ള സീനയുടെ തീരുമാനമായിരുന്നു ഇതിൽ കൂടുതൽ നിർണായകമെന്നതും നാം ഓർക്കണം. ബ്രിട്ടോയും സീനയും നിലാവും ചേർന്ന ഒരു മാതൃകാ രാഷ്ട്രീയ കുടുംബത്തിനാണവർ രൂപം നൽകിയത്.
ബ്രിട്ടോയുടെ മാതാപിതാക്കളും കുടുംബാംഗങ്ങളും വിസ്തൃതകുടുംബമായ പാർടിയും സുഹൃത്തുക്കളും അളവറ്റ സ്നേഹവും കരുതലും അവനെന്നും നൽകി. അത് അനിവാര്യം. കാരണം അപരിചിതർക്കുപോലും ബ്രിട്ടൊ നൽകിയ അഭയവും സ്നേഹവും അപാരമായിരുന്നല്ലോ.

മരിച്ചിട്ട് ജീവിച്ച ബ്രിട്ടോ, 

ജീവിച്ചിരിക്കുന്ന രക്തസാക്ഷിയായിരുന്ന ബ്രിട്ടോ ഇനിയോരുമിത്താവാം; പഴയകഥകൾ പറഞ്ഞു കൊടുക്കുന്നവരുടെ. പക്ഷേ ബ്രിട്ടോയുടെ സഖാക്കൾക്ക് അവൻ എന്നും , തളരുമ്പോൾ കരുത്തുപകരുന്ന ,ഒരിക്കലും വറ്റാത്ത ഉണർവിന്റെ ഉറവിടമായിരിക്കും.

courtesy FB 

Spread the love

Leave a Reply