Thursday, January 20

ഒരു സ്ത്രീയുടെ ശരീരം; പാബ്ലോ നെരൂദയുടെ കവിത

പരിഭാഷ: വി ആർ സന്തോഷ്

ഒരു സ്ത്രീയുടെ ശരീരം, വെളുത്ത കുന്നുകൾ, വെളുത്ത തുടകൾ
കീഴടങ്ങിക്കിടക്കുന്ന നിന്നെക്കണ്ടാൽ ഒരു ഭൂമി പോലെ.
എന്റെ മെരുങ്ങാത്ത കർഷക ഉടൽ നിന്നിലേക്കാഴ്ന്നിറങ്ങുകയും
ഭൂമിയുടെ ആഴത്തിൽ നിന്ന് എന്റെ മകനെ കിളച്ചെടുക്കുകയും ചെയ്യുന്നു.
ഞാൻ ഒരു തുരങ്കം പോലെ തനിച്ചായിരുന്നു.എന്നിൽ നിന്ന്

പക്ഷികൾ പറന്നകന്നു,

തകർത്ത് തരിപ്പണമാക്കി രാത്രി എന്നിൽ പതിയ്ക്കുമ്പോൾ
നിന്നിൽ നിന്ന് അതിജീവിക്കാൻ ഒരായുധം പോലെ ഉലയിൽ നിന്ന്

ഞാൻ കാച്ചിയെടുക്കുന്നു.
എന്റെ വില്ലിലെ ഒരമ്പു പോലെ,
എന്റെ കവിണയിലെ കല്ലു പോലെ …
പക്ഷെ പ്രതികാരത്തിന്റെ നിമിഷം നിന്നോടുള്ള
പ്രണയമായ് മാറുന്നു.
ത്വക്കിന്റെ , പായലിന്റെ,

ആസക്തിയുടെ, തനിപ്പാലിന്റെ ഉടൽ.
ഓ,നിന്റെ മുലകളുടെ പാനപാത്രങ്ങൾ!

ഓ, അസാന്നിധ്യത്തിന്റെ മിഴികൾ!
ഓ, ഗുഹ്യഭാഗത്തെ ഇളം ചുവപ്പ്

പനീർപ്പൂക്കൾ! ഓ, നിന്റെ മന്ദവും

ദുഃഖിതവുമായ നിസ്വനങ്ങൾ!
എന്റെ സത്രീയുടെ ശരീരം, നിന്റെ

ചാരുതയിൽ ഞാൻ നിലനില്ക്കും.
എന്റെ ദാഹം, എന്റെ അതിരറ്റ മോഹം,

മാറുന്ന എന്റെ വഴി
ഇരുണ്ട നദീതടങ്ങൾ, നിത്യദാഹം

അതിലൊഴുകുന്നു
ക്ഷീണവും അനന്തമായ വേദനയും.

Spread the love
Read Also  'മരപ്പൊത്ത്' സൂരജ് കല്ലേരിയുടെ കവിത