Wednesday, January 19

നീയാര്? സുന്ദരരാമസ്വാമിയുടെ കവിത; പരിഭാഷ: പി.രാമൻ

സുന്ദരരാമസ്വാമി.(തമിഴ്)
പരിഭാഷ: പി.രാമൻ

നീയാര്?
മനുഷ്യൻ തന്നെയോ?
എങ്കിൽ ഏതു നാട്?
ഏതു ഭാഷ?
ഏതു ജാതി?
ഉപജാതി?
മതത്തിന്റെ ഉൾപ്പിരിവേത് ?
ഉയരം എത്ര സെ.മീ.?
നിറമെന്ത്?
കൃഷ്ണമണിയുടെ നിറം?
ചുവപ്പോ മഞ്ഞയോ കറുപ്പോ
വറുത്ത കാപ്പിക്കുരുവിന്റെയോ?
പറയൂ, ഓരോന്നോരോന്നും
കൃത്യമായിപ്പറയൂ.
നിന്റെ ആചാരങ്ങൾ എന്ത്?
അനുഷ്ഠാനങ്ങളെന്ത് ?
സസ്യഭുക്കോ മാംസഭുക്കോ?
നിന്റെ ദൈവമാര്?
നിന്റെ ദൈവത്തിനും എന്റെ ദൈവത്തിനുമുള്ള
വ്യത്യാസമെന്ത്?
പറയൂ.
ഓരോന്നോരോന്നും
കൃത്യമായിപ്പറയൂ.
മരിച്ചാൽ കുഴിച്ചിടുമോ?
അതോ കത്തിക്കുമോ?
കുറ്റബോധമുണ്ടോ?
ചെയ്യുന്ന വേലകളിൽ
ഉയർച്ചതാഴ്ചയുണ്ടോ?
പാപബോധമുണ്ടോ?
അപകർഷതാബോധം ?
നിന്റെ കൈവിലങ്ങുകൾ ഞാൻ കാണട്ടെയോ?
നിന്റെ കാൽച്ചങ്ങലകൾ കാണിക്കുമോ?
നിന്റെ കൺപട്ടകൾ
വായ്പൂട്ടുകൾ
ഞാൻ കാണട്ടെയോ?
നിന്നെ നട്ടുവെച്ച
ഈ കുഴിയുടെ ആഴം
ഞാൻ കാണട്ടെയോ?
നീയാര്?
മനുഷ്യൻ തന്നെയോ?
അല്ലെങ്കിൽ
മനുഷ്യനെപ്പോലെത്തന്നെയോ?
എങ്കിൽ ഏതു നാട്?
ഏതു ജാതി?
പറയൂ, ഓരോന്നോരോന്നും
കൃത്യമായിപ്പറയൂ.

ചിത്രം: ഹൃദയ്
Spread the love
Read Also  പേരറ്റ കവിത ; മലൈച്ചാമി, പരിഭാഷ: പി.രാമൻ