ప్రతిపక్షం, జూలై 25: కేంద్ర విద్యాశాఖ మంత్రి పదవికి రాజీనామా చేసిన అనంతరం ధర్మేంద్ర ప్రధాన్ భావోద్వేగ ప్రకటన విడుదల చేశారు. దేశ యువత ఆకాంక్షలు, వారి కలలను గౌరవిస్తూ ఈ నిర్ణయం తీసుకున్నానని తెలిపారు. భారత ప్రజాస్వామ్య వ్యవస్థపై తనకు అపారమైన విశ్వాసం ఉందని పేర్కొంటూ, యువతే దేశ భవిష్యత్తు మాత్రమే కాదు, నూతన భారత నిర్మాణానికి వారసులని అన్నారు.
తన ప్రకటనలో గత పది రోజులుగా చోటుచేసుకున్న పరిణామాలు తనను తీవ్రంగా కలిచివేశాయని ధర్మేంద్ర ప్రధాన్ వెల్లడించారు. విద్యార్థుల ఆందోళనలు, దేశవ్యాప్తంగా వ్యక్తమైన ఆందోళనల నేపథ్యంలో బాధ్యతాయుత నిర్ణయంగా కేంద్ర మంత్రి పదవికి రాజీనామా చేస్తున్నట్లు తెలిపారు. విద్యా వ్యవస్థపై ప్రజల్లో నెలకొన్న ఆందోళనలను తాను గౌరవిస్తున్నానని, విద్యార్థుల భవిష్యత్తు ఎల్లప్పుడూ తనకు అత్యంత ప్రాధాన్యమని పేర్కొన్నారు.
దేశ యువతపై తనకు పూర్తి నమ్మకం ఉందని, వారి ఆశయాలు నెరవేరేలా వ్యవస్థ మరింత బలోపేతం కావాలని ఆకాంక్షించారు. విద్యా రంగంలో సంస్కరణలు కొనసాగాలని, విద్యార్థుల ప్రయోజనాలే ప్రభుత్వాల ప్రధాన లక్ష్యంగా ఉండాలని అన్నారు. తన పదవీకాలంలో సహకరించిన ఉపాధ్యాయులు, విద్యార్థులు, అధికారులకు కృతజ్ఞతలు తెలిపారు.
అలాగే, తనపై విశ్వాసం ఉంచి కేంద్ర మంత్రివర్గంలో అవకాశం కల్పించిన ప్రధాని నరేంద్ర మోదీకి ప్రత్యేకంగా ధన్యవాదాలు తెలిపారు. దేశ సేవకు తాను ఎప్పటికీ కట్టుబడి ఉంటానని, ప్రజా జీవితంలో తన బాధ్యతలను కొనసాగిస్తానని స్పష్టం చేశారు. ధర్మేంద్ర ప్రధాన్ రాజీనామా నేపథ్యంలో కేంద్ర రాజకీయాల్లో కీలక పరిణామాలు చోటుచేసుకుంటుండగా, విద్యాశాఖ బాధ్యతలను తదుపరి ఎవరికి అప్పగిస్తారన్న అంశంపై ఆసక్తి నెలకొంది.
