ప్రతిపక్షం, సెప్టెంబర్ 14: ఆదిలాబాద్ జిల్లా కేస్లాపూర్లోని ప్రసిద్ధ నాగోబా ఆలయ ప్రధాన పూజారి మేస్రం ఆనందరావు తెలంగాణ రక్షణ సేన పార్టీలో చేరారు. ఆదివారం పార్టీ కార్యాలయంలో నిర్వహించిన కార్యక్రమంలో పలువురు సర్పంచులు, ముఖ్య నాయకులతో కలిసి ఆయన పార్టీలో చేరగా.. పార్టీ అధ్యక్షురాలు కల్వకుంట్ల కవిత వారికి కండువాలు కప్పి సాదరంగా ఆహ్వానించారు. మేస్రం ఆనందరావు చేరికతో ఆదిలాబాద్ ప్రాంతంలో పార్టీకి మరింత బలం చేకూరిందని కవిత పేర్కొన్నారు.
ఈ సందర్భంగా కవిత మాట్లాడుతూ.. తాను నాగోబా స్వామి భక్తురాలినని తెలిపారు. ఆదిలాబాద్ జిల్లాకు వెళ్లిన ప్రతిసారీ నాగోబా ఆలయాన్ని దర్శించుకుని ప్రత్యేక పూజలు నిర్వహిస్తానని చెప్పారు. నాగోబా ఆలయ ప్రధాన పూజారి మేస్రం ఆనందరావు తమ పార్టీలో చేరడం సంతోషంగా ఉందని, ఆయన రాకతో పార్టీ బలం మరింత పెరిగిందని పేర్కొన్నారు.
ఆదివాసీ సమాజంలో నాగోబా దేవాలయానికి ఉన్న ప్రత్యేక ప్రాధాన్యాన్ని దృష్టిలో ఉంచుకుని మేస్రం ఆనందరావు వంటి ముఖ్యమైన వ్యక్తి తమ పార్టీలో చేరడం రాజకీయంగా ప్రాధాన్యం సంతరించుకుంది. ఆయనతో పాటు పలువురు స్థానిక ప్రజాప్రతినిధులు, నాయకులు కూడా పార్టీలో చేరడం ద్వారా ఆదిలాబాద్ జిల్లాలో తమ కార్యకలాపాలను మరింత విస్తరించేందుకు అవకాశం ఏర్పడిందని పార్టీ వర్గాలు భావిస్తున్నాయి.
ఇదిలా ఉండగా.. తెలంగాణ రక్షణ సేనను ప్రజల్లోకి మరింత విస్తృతంగా తీసుకెళ్లేందుకు వరుసగా బహిరంగ సభలు నిర్వహించనున్నట్లు కవిత ప్రకటించారు. ఈ నెల 20న కోస్గిలో భారీ బహిరంగ సభ నిర్వహించనున్నట్లు తెలిపారు. ఈ సభకు పార్టీ నాయకులు, కార్యకర్తలు, స్థానిక ప్రజలు పెద్ద సంఖ్యలో హాజరయ్యేలా ఏర్పాట్లు చేయనున్నట్లు చెప్పారు.
కోస్గి సభ అనంతరం ఆదిలాబాద్ జిల్లా ఇంద్రవెల్లిలో పాంచజన్య సంకల్ప సభ నిర్వహించనున్నట్లు కవిత వెల్లడించారు. పార్టీ విస్తరణ, ప్రజా సమస్యలు, స్థానిక అంశాలపై ఈ సభల ద్వారా ప్రజల్లోకి వెళ్లాలని తెలంగాణ రక్షణ సేన భావిస్తోంది. ముఖ్యంగా ఉత్తర తెలంగాణలో పార్టీకి బలమైన పునాది ఏర్పాటు చేసేందుకు వరుస కార్యక్రమాలు నిర్వహిస్తున్నట్లు తెలుస్తోంది.
నాగోబా ఆలయ ప్రధాన పూజారి మేస్రం ఆనందరావు చేరికతో పాటు పలువురు స్థానిక నాయకులు పార్టీలో చేరడం తెలంగాణ రక్షణ సేనకు కొత్త ఉత్సాహాన్ని ఇచ్చిందని పార్టీ వర్గాలు చెబుతున్నాయి. రాబోయే రోజుల్లో మరింత మంది నాయకులు, ప్రజాప్రతినిధులు పార్టీలో చేరే అవకాశం ఉందని పేర్కొంటున్నాయి. కోస్గి, ఇంద్రవెల్లి సభల ద్వారా పార్టీ రాజకీయ ప్రస్థానాన్ని మరింత వేగవంతం చేయాలని కవిత భావిస్తున్నట్లు తెలుస్తోంది.
