ప్రతిపక్షం, సెప్టెంబర్ 10: తెలంగాణ శాసనసభ సమావేశాలు అధికార కాంగ్రెస్, బీఆర్ఎస్ సభ్యుల మధ్య తీవ్ర వాగ్వాదాలు, ఆరోపణలు, ప్రత్యారోపణలతో కొనసాగుతున్న వేళ మాజీ మంత్రి హరీశ్రావు ముఖ్యమంత్రి రేవంత్రెడ్డిపై తీవ్రస్థాయిలో మండిపడ్డారు. బీఆర్ఎస్కు చెందిన వ్యక్తిగా పేర్కొంటూ ఓ ఫేక్ సామాజిక మాధ్యమ ఖాతాను చూపించి ముఖ్యమంత్రి శాసనసభలో ఆరోపణలు చేయడం సరికాదని ఆయన విమర్శించారు. ముఖ్యమంత్రి స్థాయిలో ఉన్న వ్యక్తి నకిలీ ఖాతాల ఆధారంగా సభలో మాట్లాడటం శాసనసభ గౌరవాన్ని దెబ్బతీసే చర్య అని హరీశ్రావు అన్నారు.
తమ పార్టీకి చెందిన అంతర్జాతీయ ప్రధాన కార్యదర్శి పేరుతో ఎలాంటి వ్యక్తి లేరని, ఆ పదవే బీఆర్ఎస్లో లేదని హరీశ్రావు స్పష్టం చేశారు. సంధ్యారావు పేరుతో కొనసాగుతున్న ఖాతా బీఆర్ఎస్కు చెందినది కాదని, కాంగ్రెస్ పార్టీయే ఆ నకిలీ ఖాతాను నిర్వహిస్తోందని ఆయన ఆరోపించారు. బీఆర్ఎస్పై తప్పుడు ఆరోపణలు చేయడానికి, వాటికి ఆధారాలు ఉన్నట్లుగా చూపించడానికి ఫేక్ ఖాతాను సృష్టించారని ఆయన మండిపడ్డారు.
ఇలాంటి ఖాతాలోని పోస్టును సాక్ష్యంగా తీసుకుని శాసనసభలో చదివి వినిపించడం ఏమిటని హరీశ్రావు ప్రశ్నించారు. ప్రజా సమస్యలు, విధానపరమైన అంశాలపై చర్చించాల్సిన పవిత్రమైన శాసనసభను రాజకీయ ఆరోపణలకు వేదికగా మార్చవద్దని ఆయన అన్నారు. ముఖ్యమంత్రి రేవంత్రెడ్డి ఈ వ్యవహారంపై బాధ్యత వహించి తెలంగాణ ప్రజలకు క్షమాపణ చెప్పాలని డిమాండ్ చేశారు.
సభను తప్పుదోవ పట్టించేందుకే ఫేక్ ఖాతాల వ్యవహారాన్ని తెరపైకి తీసుకొచ్చారని హరీశ్రావు ఆరోపించారు. సంధ్యారావు పేరుతో ఉన్న ఖాతా నిజమైనదా? దాన్ని ఎవరు నిర్వహిస్తున్నారు? దాని వెనుక ఎవరున్నారు? అనే అంశాలపై సమగ్ర విచారణ జరపాలని ఆయన కోరారు. నకిలీ ఖాతాల ద్వారా రాజకీయ ఆరోపణలు చేయడం ప్రజల్లో తప్పుడు సమాచారాన్ని వ్యాప్తి చేయడమే అవుతుందని పేర్కొన్నారు.
ఈ వ్యవహారంపై ప్రభుత్వం వెంటనే విచారణ చేపట్టాలని హరీశ్రావు డిమాండ్ చేశారు. లేదంటే ముఖ్యమంత్రి వ్యవహారంపై శాసనసభా హక్కుల ఉల్లంఘన నోటీసులు ఇస్తామని హెచ్చరించారు. సభలో ప్రస్తావించిన ఆధారాల ప్రామాణికతను కూడా పరిశీలించాలని ఆయన కోరారు.
మరోవైపు శాసనసభలో ముఖ్యమంత్రి ప్రస్తావించిన మరో అంశంపై కూడా రాజకీయ దుమారం కొనసాగుతోంది. శాసనసభ స్పీకర్ గడ్డం ప్రసాద్కుమార్ను బీఆర్ఎస్ నేతలు కులం పేరుతో అవమానించారని ఆరోపిస్తూ కాంగ్రెస్ నాయకులు కేసీఆర్ ఫాంహౌస్ వద్ద నిరసనలు చేపట్టిన విషయం తెలిసిందే. ఈ నేపథ్యంలో దళితులు అక్కడికి వచ్చిన తర్వాత ఆ ప్రాంతాన్ని బీఆర్ఎస్ నేతలు పసుపు నీళ్లతో శుద్ధి చేశారని ముఖ్యమంత్రి రేవంత్రెడ్డి సభలో ఆరోపించారు.
ఈ ఆరోపణలకు ఆధారంగా సంధ్యారావు పేరుతో ఉన్న సామాజిక మాధ్యమ ఖాతాలో చేసినట్లు పేర్కొంటున్న ఓ పోస్టును ముఖ్యమంత్రి సభలో ప్రస్తావించారు. ఆ పోస్టుకు సంబంధించిన తెరచిత్ర ప్రతిని సభలో చూపిస్తూ, కేసీఆర్ ఆదేశాల మేరకే ఈ చర్య జరిగిందని సంధ్యారావు తన ఖాతాలో పేర్కొన్నట్లు రేవంత్రెడ్డి ఆరోపించారు.
అయితే ఈ ఖాతా, పోస్టు నిజానిజాలపైనే ఇప్పుడు ప్రధాన వివాదం నెలకొంది. ముఖ్యమంత్రి సభలో చూపించిన ఆధారమే నకిలీదని హరీశ్రావు ఆరోపిస్తుండగా.. మరోవైపు ఆ పోస్టును ఆధారంగా చేసుకుని ముఖ్యమంత్రి బీఆర్ఎస్పై విమర్శలు చేశారు. దీంతో అధికార, ప్రతిపక్ష పార్టీల మధ్య ఈ అంశం మరింత రాజకీయ వేడిని పెంచే అవకాశం కనిపిస్తోంది. సభలో ప్రస్తావించిన సామాజిక మాధ్యమ ఖాతా నిజమైనదా, నకిలీదా అన్నది అధికారిక విచారణలో తేలాల్సి ఉంది.
