ప్రతిపక్షం, సెప్టెంబర్ 10, హైదరాబాద్: తెలంగాణ శాసనసభ వద్ద చోటుచేసుకున్న ఉద్రిక్తతల నేపథ్యంలో బీఆర్ఎస్ నేతలు కేటీఆర్, హరీశ్రావు, సుధీర్రెడ్డి, నవీన్కుమార్రెడ్డి తదితరులపై సైఫాబాద్ పోలీసులు కేసు నమోదు చేశారు. అసెంబ్లీ గేటు వద్ద విధుల్లో ఉన్న మహిళా పోలీసులతో దురుసుగా ప్రవర్తించారని, వారి విధులకు ఆటంకం కలిగించారని ఆరోపిస్తూ మహిళా కానిస్టేబుల్ ఇచ్చిన ఫిర్యాదు ఆధారంగా ఈ కేసు నమోదైనట్లు పోలీసులు తెలిపారు.
సెప్టెంబర్ 7న అసెంబ్లీ సమావేశాల సందర్భంగా బీఆర్ఎస్ ప్రజాప్రతినిధులు నల్ల టీషర్టులు ధరించి, రాజకీయ నినాదాలతో కూడిన దుస్తులు, ప్లకార్డులతో అసెంబ్లీ ప్రాంగణంలోకి వెళ్లేందుకు ప్రయత్నించిన సమయంలో వివాదం చోటుచేసుకున్నట్లు ఫిర్యాదులో పేర్కొన్నారు. రాజకీయ నినాదాలు ఉన్న టీషర్టులు, ప్లకార్డులతో అసెంబ్లీ ప్రాంగణంలోకి అనుమతి లేదని పోలీసులు చెప్పడంతో ఇరువర్గాల మధ్య వాగ్వాదం జరిగినట్లు సమాచారం.
ఈ సందర్భంగా హరీశ్రావు, కేటీఆర్ మహిళా పోలీసులను ఉద్దేశించి అభ్యంతరకరంగా మాట్లాడారని ఫిర్యాదులో ఆరోపించారు. మహిళా పోలీసులను అడ్డుపెట్టుకుని తమను నిలువరిస్తున్నారంటూ నాయకులు వ్యాఖ్యలు చేసినట్లు ఫిర్యాదులో పేర్కొన్నారు. అనంతరం హరీశ్రావు తన టీషర్ట్ విప్పి పోలీసుల వైపు విసిరారని, మహిళా పోలీసుల ముందు అర్ధనగ్నంగా నిలబడ్డారని ఆరోపణలు వచ్చాయి. ఆయన వెంట మరికొందరు నాయకులు కూడా టీషర్టులు విప్పినట్లు ఫిర్యాదులో పేర్కొన్నారు.
అదేవిధంగా అసెంబ్లీలోకి వెళ్లేందుకు ప్రయత్నించే సమయంలో మహిళా పోలీసులను నెట్టడం, తోపులాటకు పాల్పడటం, విధుల్లో ఉన్న సిబ్బందిని బెదిరించేలా వ్యవహరించడం జరిగిందని ఫిర్యాదుదారు ఆరోపించినట్లు పోలీసులు తెలిపారు. ఈ ఘటనతో కొంతమంది మహిళా పోలీసులకు శారీరకంగా, మానసికంగా ఇబ్బందులు ఎదురయ్యాయని, వైద్య చికిత్స కూడా తీసుకున్నట్లు ఫిర్యాదులో పేర్కొన్నట్లు సమాచారం.
ఈ ఫిర్యాదు ఆధారంగా భారతీయ న్యాయ సంహితలోని 74, 75(1), 79, 121(1), 130, 132, 296, 351(2), 352 సెక్షన్లతో పాటు 3(5) సెక్షన్ కింద కేసు నమోదు చేసినట్లు పోలీసు వర్గాలు వెల్లడించాయి. మహిళపై నేరపూరిత బలప్రయోగం, లైంగిక వేధింపులు, విధులకు ఆటంకం, బెదిరింపులు తదితర ఆరోపణలకు సంబంధించిన నిబంధనలు ఇందులో ఉన్నాయి.
అయితే ఈ ఆరోపణలన్నీ ఫిర్యాదులో పేర్కొన్నవేనని, అవి దర్యాప్తులో నిర్ధారించాల్సి ఉందని పోలీసులు స్పష్టం చేస్తున్నారు. ఘటనకు సంబంధించిన సీసీటీవీ దృశ్యాలు, మీడియా కెమెరాల్లో నమోదైన వీడియోలు, ఫొటోలు, వైద్య రికార్డులను పరిశీలించాలని ఫిర్యాదులో కోరినట్లు సమాచారం. దీంతో దర్యాప్తులో భాగంగా అందుబాటులో ఉన్న ఆధారాలను పోలీసులు పరిశీలించే అవకాశం ఉంది.
ఇప్పటికే అసెంబ్లీ సమావేశాల సందర్భంగా బీఆర్ఎస్ సభ్యులు, పోలీసుల మధ్య జరిగిన ఘర్షణ రాజకీయంగా తీవ్ర దుమారం రేపుతోంది. మహిళా ప్రజాప్రతినిధులను పోలీసులు అడ్డుకున్నారంటూ బీఆర్ఎస్ నేతలు ఆరోపిస్తుండగా, మరోవైపు విధుల్లో ఉన్న మహిళా పోలీసులతో బీఆర్ఎస్ నాయకులు దురుసుగా ప్రవర్తించారని అధికార కాంగ్రెస్ వర్గాలు ఆరోపిస్తున్నాయి. ఈ నేపథ్యంలో తాజాగా నమోదైన కేసు తెలంగాణ రాజకీయాల్లో మరింత చర్చకు దారితీసింది.
