హైదరాబాద్, ప్రతిపక్షం స్టేట్బ్యూరో: లోక్సభ ఎన్నికల అభ్యర్థుల ఎంపికలో విపక్ష బీఆర్ఎస్పార్టీ ఇటు అధికార కాంగ్రెస్తో పాటు బీజేపీ కన్న ముందుంది. గత అసెంబ్లీ ఎన్నికల్లో ఓడిపోయి కొంత ఢీలా పడ్డప్పటికి లోక్సభ ఎన్నికల్లో పార్టీని విజయతీరం వైపు తీసుకపోయేందుకు గులాబిబాస్, మాజీ సీఎం కేసీఆర్ వ్యూహాత్మకంగా ముందుకు సాగుతున్నారు. అయితే ముందుగ ఊహించిన అభ్యర్థులకు బదులుగా పార్టీకి కట్టుబడి ఉన్న వారిని లోక్సభ బరిలోకి దించారు. అసెంబ్లీ ఎన్నికలకు ముందు లోక్సభ ఎన్నికల్లో పోటీ చేసేందుకు పోటీపడ్డ పలువురు నేతలు (వ్యాపారులు) పార్టీ ఓడిపోయిన వెంటనే పోటీకి అనాసక్తి కనబరచడంతో పాటు అధికార పార్టీలోకి దూకేశారు. దీంతో నియోజకవర్గం ముఖ్యనేతల సమావేశాలు నిర్వహించి అందరి ఆమోధయోగ్యంతోనే గులాబిబాస్ అభ్యర్థులను ఖరారు చేశారు.
ఇప్పటికి 14 నియోజకవర్గాలలో అభ్యర్థులను ప్రకటించగా, హైదరాబాద్, నల్గొండ, భువనగిరి లోక్సభ స్థానాల్లో గెలుపు వీరుల కోసం ప్రయత్నిస్తున్నారు. ఈ నియోజకవర్గ ముఖ్యనేతల సమావేశం నిర్వహించి అభ్యర్థిని త్వరలో ఎంపిక చేయనున్నారు. ఇప్పటి వరకు ప్రకటించిన వారిలో ఖమ్మం : నామా నాగేశ్వర్ రావు, మహబూబాబాద్ (ఎస్టీ ) : మాలోత్ కవిత, కరీంనగర్ : బోయినిపల్లి వినోద్ కుమార్ , పెద్దపల్లి(ఎస్ .సి ): -కొప్పుల ఈశ్వర్ , మహబూబ్ నగర్ : మన్నె శ్రీనివాస్ రెడ్డి , చేవెళ్ల : -కాసాని జ్ఞానేశ్వర్ , వరంగల్ (ఎస్ .సి): డాక్టర్ కడియం కావ్య , నిజామాబాద్ : బాజి రెడ్డి గోవర్ధన్ , జహీరాబాద్ : గాలి అనిల్ కుమార్ , ఆదిలాబాద్(ఎస్టీ ): ఆత్రం సక్కు , మల్కాజ్ గిరి : రాగిడి లక్ష్మా రెడ్డి , మెదక్ పి : వెంకట్రామి రెడ్డి , నాగర్ కర్నూల్ (ఎస్సీ ): ఆర్ .ఎస్ .ప్రవీణ్ కుమార్ , సికింద్రాబాద్ : తీగుళ్ల పద్మారావు గౌడ్ ఉన్నారు.
విస్తృత ప్రచారం..
లోక్సభ ఎన్నికల్లో కనీసం మూడు, నాలుగింటిలో గెలుపొందాలని కేసీఆర్ బావిస్తున్నారు. ఇందుకోసం విస్తృతంగా ప్రచారం నిర్వహించాలని నిర్ణయించారు. ప్రతీ పార్లమెంట్ నియోజవర్గంలో కేసీఆర్ బహిరంగ సభలు ఏర్పాటు చేయనున్నారు. అలాగే రాష్ట్ర వ్యాప్తంగా ప్రతీ నియోజకవర్గంలో పార్టీ నేతలు కేటీఆర్, హరీశ్రావులు రోడ్షోలు నిర్వహించాలని నిర్ణయించారు. మూణ్ణెళ్లకు కాంగ్రెస్పార్టీ భ్రష్టుపట్టిన పాలన, కేంద్రంలో బీజేపీ ప్రభుత్వం ప్రజలపై పన్నుల బాధుడుతో పాటు విపక్షాలపై అక్రమ కేసులు బనాయించడం తదితర అంశాలను ప్రచార అస్త్రాలుగా చేసుకొననున్నారు.
