ప్రతిపక్షం, వెబ్‌డెస్క్: తెలంగాణలో భానుడి భగభగలు కొనసాగుతున్నాయి.. ఒక్క మాటలో చెప్పాలంటే రాష్ట్రం నిప్పుల గుండంలా మారింది. గురువారం రికార్డు స్థాయిలో ఉష్ణోగ్రతలు నమోదు కాగా.. ఏకంగా ఆరు జిల్లాలు 45 డిగ్రీలకు పైగా ఉష్ణోగ్రతలు రికార్డయ్యాయి. రాష్ట్రంలోనే అత్యధికంగా నల్గొండ జిల్లా మాడుగులపల్లి మండలం, మంచిర్యాల జిల్లా హాజిపూర్‌ మండలాల్లో 45.2 డిగ్రీల ఉష్ణోగ్రత నమోదైంది. ఏప్రిల్‌ నెలకు సంబంధించి నల్గొండ జిల్లాలో గత పదేళ్లలో ఇదే అత్యధిక ఉష్ణోగ్రత అని తెలుస్తోంది. మరో ఐదు జిల్లాల్లో 44.9 డిగ్రీలు, నాలుగు జిల్లాల్లో 44.8 డిగ్రీలు నమోదు కావడంతో పరిస్థితి ఎలా ఉందో అర్థం చేసుకోవచ్చు. గురువారం ఆరు జిల్లాల్లోని 17 మండలాల్లో వడగాలులు వీచాయి. నల్గొండ జిల్లా అనుముల హాలియా, నాంపల్లి, తిరుమలగిరి(సాగర్‌). సూర్యాపేట జిల్లా మఠంపల్లి, పాలకేడు, నూతన్‌కల్‌, మునగాల. వరంగల్‌ జిల్లా ఖిల్లా వరంగల్‌, దూగొండి, చెన్నారావుపేట. సిద్దిపేట జిల్లా ధూల్‌మిట్ట, సిద్దిపేట పట్టణం. భద్రాద్రి జిల్లా సుజాతనగర్‌, కొత్తగూడెం, చండ్రుగొండ. జయశంకర్‌ భూపాలపల్లి జిల్లా చేర్యాల, రేగొండ మండలాల్లో వడగాలులు నమోదయ్యాయి.
తెలంగాణలో రికార్డు స్థాయిలో ఉష్ణోగ్రతలు నమోదు కావడంతో వాతావరణశాఖ ఆరెంజ్‌ అలర్ట్ జారీ చేసింది. ఈ నెల 19, 20 తేదీల్లో అన్ని జిల్లాల్లో 41-44 డిగ్రీల మధ్య ఉష్ణోగ్రతలు నమోదవుతాయని హెచ్చరించింది. 21న గద్వాల, మహబూబ్‌నగర్‌, నాగర్‌కర్నూల్‌, నారాయణపేట, వనపర్తి జిల్లాల్లో.. 22న ఈ జిల్లాలతో పాటు హైదరాబాద్‌, కామారెడ్డి, వికారాబాద్‌, రంగారెడ్డి, సిరిసిల్ల, పెద్దపల్లి, నిజామాబాద్‌, మేడ్చల్‌ మల్కాజిగిరి, కరీంనగర్‌, జగిత్యాల జిల్లాల్లో 40 డిగ్రీలలోపు నమోదయ్యే అవకాశాలు ఉన్నాయని ఎల్లో అలర్ట్ జారీ చేసింది. 19, 20, 21 తేదీల్లో పలు ప్రాంతాల్లో ఉరుములు, మెరుపులు, ఈదురుగాలులతో కూడిన ఓ మోస్తరు వర్షాలు కురుస్తాయని అంచాన వేస్తున్నారు. మరోవైపు వడదెబ్బతో రాష్ట్రవ్యాప్తంగా వడదెబ్బతో ఐదుగురు చనిపోయినట్లు తెలుస్తోంది. 45 డిగ్రీల ఉష్ణోగ్రత దాటిన జిల్లాల్లో వృద్ధులు, చిన్నారులు, రోగులకు ముప్పు పొంచి ఉందని రాష్ట్ర విపత్తు నిర్వహణ విభాగం అధికారులు హెచ్చరించారు. వడదెబ్బకు గురయ్యే ప్రమాదం ఉందని.. తగు జాగ్రత్తలు తీసుకోవాలని సూచించింది. అత్యవసరమైతే తప్ప సాధ్యమైనంత వరకు బయటకు రాకపోవడం మంచిదంటున్నారు. నీళ్లు, మజ్జిగ, కొబ్బరి నీళ్లు వంటివి తాగడం మంచిందని సూచిస్తున్నారు.
