ప్రతిపక్షం, జూలై 28: హైడ్రా కమిషనర్ పదవి నుంచి తనను తొలగించాలని తెలంగాణ హైకోర్టు ఇచ్చిన ఆదేశాల నేపథ్యంలో హైడ్రా కమిషనర్ ఎ.వి. రంగనాథ్ స్పందించారు. తాను ఎలాంటి వ్యక్తిగత ప్రయోజనాల కోసం కాకుండా రాజ్యాంగ స్ఫూర్తితో, చట్టబద్ధంగా విధులు నిర్వర్తిస్తున్నానని స్పష్టం చేశారు. ప్రభుత్వ భూములు, చెరువులు, ప్రజా ఆస్తులను రక్షించడమే హైడ్రా ప్రధాన లక్ష్యమని పేర్కొన్నారు.
గత రెండేళ్లుగా హైడ్రా చేపట్టిన చర్యలతో భారీ స్థాయిలో ప్రభుత్వ ఆస్తులను కాపాడగలిగామని రంగనాథ్ తెలిపారు. మార్కెట్ విలువ ప్రకారం సుమారు రూ.1.50 లక్షల కోట్ల విలువైన ప్రభుత్వ భూములు, చెరువులు, ప్రజా ఆస్తులను ఆక్రమణల నుంచి రక్షించినట్లు వెల్లడించారు. పలువురు ప్రభావశీలులు, ల్యాండ్ మాఫియా సభ్యులు ప్రభుత్వ భూములను ఆక్రమించి అక్రమ లావాదేవీలకు పాల్పడుతున్నారని ఆరోపించారు.
హైడ్రా చేపడుతున్న చర్యలకు అడ్డుకట్ట వేయాలనే ఉద్దేశంతో కొందరు భూకబ్జాదారులు కోర్టులను ఆశ్రయిస్తున్నారని ఆయన అన్నారు. కోర్టుల ముందు అసలు వాస్తవాలను దాచిపెట్టి తప్పుడు సమాచారం అందించడం వల్లే పలు వివాదాలు తలెత్తుతున్నాయని పేర్కొన్నారు. హైడ్రాపై నమోదైన కోర్టు ధిక్కరణ పిటిషన్ల వెనుక కూడా భూకబ్జాదారుల ప్రయోజనాలే ఉన్నాయని ఆరోపించారు.
లోతుకుంట భూముల వ్యవహారాన్ని ప్రస్తావిస్తూ, శాంతా శ్రీరామ్ సంస్థకు చెందిన వ్యక్తులు సుమారు రూ.10 వేల కోట్ల విలువైన ప్రభుత్వ భూమిని స్వాధీనం చేసుకునేందుకు ప్రయత్నించారని రంగనాథ్ ఆరోపించారు. ఆ భూమిని కాపాడేందుకు హైడ్రా చట్టపరమైన చర్యలు తీసుకుందని, ప్రభుత్వ ఆస్తులను రక్షించడం తమ రాజ్యాంగబద్ధ బాధ్యత అని స్పష్టం చేశారు.
హైడ్రా చర్యలు పూర్తిగా ప్రజా ప్రయోజనాల కోసమేనని, చెరువులు, ప్రభుత్వ భూములు, ప్రజా ఆస్తులను పరిరక్షించడంలో ఎలాంటి రాజీ ఉండదని రంగనాథ్ తెలిపారు. భూకబ్జాలు, అక్రమ నిర్మాణాలపై చట్టప్రకారం చర్యలు కొనసాగుతాయని చెప్పారు.
తనపై వచ్చిన విమర్శలు, ఆరోపణలపై స్పందిస్తూ, తాను ఎక్కడా కోర్టు ధిక్కరణకు పాల్పడలేదని మరోసారి స్పష్టం చేశారు. ప్రభుత్వం తనకు ఏ బాధ్యత అప్పగించినా అదే నిబద్ధతతో పనిచేస్తానని, ప్రజా ఆస్తుల పరిరక్షణ కోసం చట్టపరమైన పోరాటం కొనసాగిస్తానని రంగనాథ్ పేర్కొన్నారు.
