ప్రతిపక్షం, ఆగస్టు 28, హైదరాబాద్: రాఖీ పౌర్ణమి సందర్భంగా సోదర, సోదరీమణుల మధ్య ప్రేమ, అనుబంధాన్ని చాటుకునేందుకు దేశవ్యాప్తంగా వివిధ సంప్రదాయాలు పాటిస్తారు. అయితే తెలుగు రాష్ట్రాలైన ఆంధ్రప్రదేశ్, తెలంగాణలో రాఖీ కట్టే విధానంతో పాటు ఆ తర్వాత పాటించే ఆచారాల్లో ఆసక్తికరమైన తేడా కనిపిస్తుంది.
ఆంధ్రప్రదేశ్లో సాధారణంగా సోదరి తన సోదరుడికి రాఖీ కట్టిన అనంతరం అతడి పాదాలకు నమస్కరించి ఆశీర్వాదం తీసుకునే సంప్రదాయం కొన్ని కుటుంబాలు, ప్రాంతాల్లో కనిపిస్తుంది. తనకు జీవితాంతం అన్నగా అండగా నిలవాలని, కష్టసుఖాల్లో రక్షణగా ఉండాలని సోదరి ఆకాంక్షిస్తుంది. అనంతరం సోదరుడు తన సోదరికి ప్రేమతో బహుమతులు అందించి, ఎల్లప్పుడూ అండగా ఉంటానని భరోసా ఇస్తాడు.
తెలంగాణలో మాత్రం కొన్ని కుటుంబాలు, ప్రాంతాల్లో ఇందుకు భిన్నమైన ఆచారం కనిపిస్తుంది. రాఖీ కట్టిన సోదరి కాళ్లకు సోదరుడు నమస్కరించడం ప్రత్యేక సంప్రదాయంగా చెబుతారు. సోదరి వయసుతో సంబంధం లేకుండా ఆమె పట్ల గౌరవం, కృతజ్ఞతను చాటుతూ సోదరుడు ఆశీర్వాదం తీసుకుంటాడు. జీవితాంతం తనకు అండగా ఉంటానని, సోదర బంధాన్ని గౌరవిస్తానని ఈ ఆచారం ద్వారా తెలియజేస్తారు.
అయితే ఈ సంప్రదాయాలు ప్రతి కుటుంబంలో ఒకే విధంగా ఉండవు. ప్రాంతం, కుటుంబ ఆచారాలు, స్థానిక సంప్రదాయాలను బట్టి రాఖీ పౌర్ణమి వేడుకల్లో విధానాలు మారుతూ ఉంటాయి. ఆచారం ఏదైనా.. రాఖీ పండుగ ప్రధాన ఉద్దేశం మాత్రం సోదర, సోదరీమణుల మధ్య ప్రేమ, ఆప్యాయత, పరస్పర నమ్మకం, జీవితాంతం ఒకరికొకరు అండగా నిలిచే బంధాన్ని గుర్తుచేసుకోవడమే.
