ప్రతిపక్షం, ఆగస్టు 21: దక్షిణాది రాష్ట్రాల్లో రాజకీయ ప్రాతినిధ్యంపై ప్రభావం చూపే అవకాశమున్న నియోజకవర్గాల పునర్విభజన అంశంపై సదరన్ జోనల్ కౌన్సిల్ సమావేశంలో వాడీవేడి చర్చ జరిగినట్లు సమాచారం. జనాభా ప్రాతిపదికన లోక్సభ నియోజకవర్గాల పునర్విభజన చేపడితే జనాభా నియంత్రణలో ముందున్న దక్షిణాది రాష్ట్రాలకు అన్యాయం జరుగుతుందని పలువురు ముఖ్యమంత్రులు ఆందోళన వ్యక్తం చేసినట్లు తెలుస్తోంది.
ప్రస్తుతం ఉన్న లోక్సభ స్థానాల సంఖ్యను కొంతకాలం వరకు యథాతథంగా కొనసాగించాలని, అదే సంఖ్య ఆధారంగా మహిళా రిజర్వేషన్లను అమలు చేయాలని కర్ణాటక ముఖ్యమంత్రి డీకే శివకుమార్ ప్రతిపాదించినట్లు సమాచారం. జనాభా నియంత్రణలో దక్షిణాది రాష్ట్రాలు ముందంజలో ఉన్నాయని, అందుకు ప్రతిఫలంగా వాటి రాజకీయ ప్రాతినిధ్యం తగ్గడం సమంజసం కాదని ఆయన అభిప్రాయపడినట్లు తెలుస్తోంది.
తమిళనాడు ముఖ్యమంత్రి ఎం.కె. స్టాలిన్ కూడా డీలిమిటేషన్ అంశంపై ఆందోళన వ్యక్తం చేసినట్లు సమాచారం. కుటుంబ నియంత్రణ, జనాభా నియంత్రణను సమర్థంగా అమలు చేసిన రాష్ట్రాలకు ఈ ప్రక్రియ శిక్షగా మారకూడదని ఆయన పేర్కొన్నట్లు తెలుస్తోంది. జనాభా ఆధారంగా స్థానాల పునర్విభజన జరిగితే దక్షిణాది రాష్ట్రాల లోక్సభ ప్రాతినిధ్యం తగ్గే అవకాశం ఉందన్న ఆందోళన సమావేశంలో ప్రధానంగా చర్చకు వచ్చినట్లు సమాచారం.
అయితే ఈ అంశంపై కేరళ ప్రతిపక్ష నేత వీడీ సతీశన్, తెలంగాణ ఉపముఖ్యమంత్రి మల్లు భట్టి విక్రమార్క్ పెద్దగా స్పందించకపోవడం రాజకీయ వర్గాల్లో చర్చకు దారితీసింది. సమావేశంలో దక్షిణాది రాష్ట్రాల ప్రయోజనాలపై చర్చ జరిగినప్పటికీ వారి నుంచి స్పష్టమైన వైఖరి బయటకు రాకపోవడం ఆసక్తికరంగా మారింది.
డీలిమిటేషన్తో దక్షిణాది రాష్ట్రాల రాజకీయ ప్రాతినిధ్యంలో మార్పులు వస్తే కేంద్ర నిధుల పంపిణీ, పార్లమెంటులో రాష్ట్రాల ప్రభావం వంటి అంశాలపైనా భవిష్యత్తులో ప్రభావం పడే అవకాశం ఉందనే చర్చ సాగుతోంది. దీంతో ఈ అంశంపై దక్షిణాది రాష్ట్రాలు ఏకాభిప్రాయంతో ముందుకు వస్తాయా? కేంద్రం ఎలాంటి నిర్ణయం తీసుకుంటుందన్నది ఆసక్తికరంగా మారింది.
