ప్రతిపక్షం, ఆగస్టు 21: చెవులు మనకు శబ్దాలను వినిపించడమే కాకుండా శరీర సమతుల్యతను కాపాడటంలోనూ కీలక పాత్ర పోషిస్తాయని నిపుణులు చెబుతున్నారు. చెవిలో ఉండే వెస్టిబ్యులర్ వ్యవస్థ తల కదలికలు, శరీరం ఏ స్థితిలో ఉందనే సమాచారాన్ని మెదడుకు చేరవేస్తుంది. ఈ వ్యవస్థ పనితీరులో సమస్యలు తలెత్తితే శరీర సమతుల్యత దెబ్బతినే అవకాశం ఉంటుంది.
చెవుల పనితీరు ప్రభావితమైనప్పుడు కొందరిలో తల తిరగడం, నడుస్తున్నప్పుడు తూలడం, అకస్మాత్తుగా అదుపు తప్పి కిందపడిపోవడం వంటి సమస్యలు కనిపించవచ్చు. ముఖ్యంగా వయసు పెరిగే కొద్దీ ఇలాంటి సమస్యల విషయంలో మరింత జాగ్రత్తగా ఉండాలని నిపుణులు సూచిస్తున్నారు.
చెవుల ఆరోగ్యాన్ని కాపాడుకోవడానికి పెద్ద శబ్దాలకు ఎక్కువసేపు దూరంగా ఉండాలని చెబుతున్నారు. హెడ్ఫోన్లు, ఇయర్ఫోన్లను అధిక శబ్దంతో ఎక్కువసేపు ఉపయోగించకపోవడం మంచిదని సూచిస్తున్నారు. అలాగే చెవిలో గుల్లలు, పిన్నులు, ఇతర వస్తువులతో శుభ్రం చేయడానికి ప్రయత్నించకూడదని హెచ్చరిస్తున్నారు.
చెవులను పరిశుభ్రంగా, పొడిగా ఉంచుకోవడంతో పాటు వినికిడి తగ్గడం, తరచూ తల తిరగడం లేదా సమతుల్యత కోల్పోవడం వంటి లక్షణాలు కనిపిస్తే నిర్లక్ష్యం చేయకుండా వైద్యులను సంప్రదించాలని నిపుణులు సూచిస్తున్నారు.
