ప్రతిపక్షం, జూలై 13: కాళేశ్వరం ప్రాజెక్టుపై నేషనల్ డ్యామ్ సేఫ్టీ అథారిటీ (ఎన్డీఎస్ఏ) నివేదికను బీఆర్ఎస్ వర్కింగ్ ప్రెసిడెంట్ కేటీఆర్ తీవ్రంగా విమర్శించారు. కరీంనగర్లో మీడియాతో మాట్లాడిన ఆయన, ఇది సాంకేతిక నివేదిక కాదని, రాజకీయ ఉద్దేశాలతో రూపొందించిన “ఎన్డీఏ రిపోర్ట్” అని ఆరోపించారు.
మేడిగడ్డ బ్యారేజీతో సంబంధం లేకుండానే అన్నారం, సుందిళ్ల బ్యారేజీల ద్వారా నీటిని ఎత్తిపోసే అవకాశం ఉందని కేటీఆర్ పేర్కొన్నారు. ఆ అవకాశాన్ని వినియోగించకుండా ప్రభుత్వం ఉద్దేశపూర్వకంగా నిర్లక్ష్యం చేస్తోందని విమర్శించారు.
ఎల్లంపల్లి ప్రాజెక్టుకు నీటి ప్రవాహం నిలిచిపోతే హైదరాబాద్కు తాగునీటి సరఫరాపై తీవ్ర ప్రభావం పడే ప్రమాదం ఉందని కేటీఆర్ హెచ్చరించారు. నగర ప్రజలకు భవిష్యత్తులో తాగునీటి ఇబ్బందులు ఎదురయ్యే అవకాశం ఉందని ఆయన అన్నారు.
కాళేశ్వరం ప్రాజెక్టుపై వాస్తవాలను పక్కనబెట్టి ప్రభుత్వం తప్పుడు ప్రచారం చేస్తోందని ఆరోపించిన కేటీఆర్, రాజకీయ కక్షతో రైతులు, ప్రజల ప్రయోజనాలను దెబ్బతీసే విధంగా వ్యవహరిస్తోందని విమర్శించారు. ప్రాజెక్టును పూర్తిస్థాయిలో వినియోగంలోకి తీసుకురావడానికి ప్రభుత్వం తక్షణ చర్యలు చేపట్టాలని ఆయన డిమాండ్ చేశారు.
