ప్రతిపక్షం, ఢిల్లీ: కేంద్ర ఎన్నికల సంఘంలోని కమిషనర్ల పదవుల ఖాళీల భర్తీని సుప్రీంకోర్టు 2023 తీర్పుకు లోపడి చేపట్టేలా ఆదేశాలు ఇవ్వాలని కోరుతూ కాంగ్రెస్ పార్టీ వ్యాజ్యం దాఖలు చేసింది. ఈ నియామకాలకు సంబంధించి పార్లమెంట్ లో చట్టం అయ్యేవరకు, ప్రధాన మంత్రి నేతృత్వంలో లోక్ సభలో విపక్షనేత, సుప్రీంకోర్టు ప్రధాన న్యాయమూర్తితో కూడిన బృందం ఈ ప్రక్రియను పూర్తి చేయాలని సర్వోన్నత న్యాయస్థానం గత ఏడాది తీర్పు చెప్పింది. అయితే ప్రధాని, విపక్షనేత, కేంద్ర మంత్రి సభ్యులగా గల కమిటీ ఈ నియామకాలపై కసరత్తు చేస్తున్నట్లు వస్తున్న వార్తల నేపథ్యంలో మధ్యప్రదేశ్ కు చెందిన కాంగ్రెస్ నాయకుడు జయాఠాకూర్ సుప్రీంకోర్టుల ఈ వ్యాజ్యం దాఖలు చేశారు. ఒక కమిషనర్ అనూప్ చంద్రపాండే గత నెల పదవీ విరమణ చేయగా, మరో కమిషనర్ అరుణ్ గోయల్ ఇటీవల రాజీనామా చేశారు. లోక్ సభ, ఐదు రాష్ట్రాల శాసనసభ ఎన్నికలకు షెడ్యూల్ త్వరలో విడుదల కావలసి ఉంది.
