ఖమ్మం నుంచి లోక్సభకు పోటీ..?
నేడో, రేపో వెలువడనున్న ప్రకటన
హైదరాబాద్, ప్రతిపక్షం స్టేట్బ్యూరో: అసెంబ్లీ ఎన్నికల్లో గెలుపుతో ఊపుమీద ఉన్న కాంగ్రెస్ మరో రెండింతల ఊపుమీద లోక్సభ ఎన్నికల బరిలోకి దిగేందుకు సిద్ధం అయ్యింది. గత అసెంబ్లీ ఎన్నికల్లో ఇచ్చిన ఆరు గ్యారెంటీలలో ఇప్పటికే నాలుగు గ్యారంటీలను అమలు చేసి, అయిదో గ్యారంటీ అయిన ఇందిరమ్మ ఇళ్ల పథకానికి శ్రీకారం చుట్టనుంది. గత అసెంబ్లీ ఎన్నికలను పోలిస్తే రాష్ట్రంలో కాంగ్రెస్ మరింత బలోపేతం అయ్యింది. ఆరో గ్యారంటీ రూ.2లక్షల వ్యవసాయ రుణం ఒకే సారి మాఫీ చేస్తామంటూ సీఎం రేవంత్రెడ్డి ఇటీవల ప్రకటించడంతో రైతన్నలు సైతం కాంగ్రెస్పార్టీకి జయకొట్టనున్నారు.
ఇదిలా ఉంటే త్వరలో జరిగే లోక్సభ ఎన్నికల్లో పలు నియోజకవర్గాల నుంచి పోటీ చేసే అభ్యర్థుల ఎంపిక దాదాపు పూర్తి చేసింది. పార్టీ పట్ల ప్రజలు పూర్తి విశ్వాసాన్ని వ్యక్తం చేస్తుండడంతో తెలంగాణ నుంచి పోటీ చేసేందుకు పార్టీ ఆగ్రనేత రాహుల్గాంధీ ఉత్సాహంగా ఉన్నట్లు తెలుస్తోంది. ఇప్పటికే ఇక్కడి నుంచి పోటీ చేయాలంటూ ఆగ్రనేతలైన సోనియాగాంధీ, రాహుల్గాంధీకి టీపీసీసీ ఆహ్వానించిన విషయం తెలిసిందే!. అయితే సోనియగాంధీ ఇటీవల ఎంపీ నుంచి రాజ్యసభకు ఎన్నికకాగా రాహుల్గాంధీ మాత్రం ఎక్కడి నుంచి పోటీ చేస్తారన్నది తెలియరాలేదు. ఇప్పటికే తెలంగాణాతో పాటు కర్నాటక నుంచి సైతం పోటీ చేయాలంటూ ఆ రాష్ట్ర కాంగ్రెస్పార్టీ కూడా కోరినట్లు సమాచారం. అయితే కర్నాటక నుంచి పోటీ చేసేందుకు రాహుల్ విముకత చూపారని, తెలంగాణ నుంచి పోటీ చేసేందుకు సుముకంగా ఉన్నట్లు టీపీసీసీ వర్గాలు తెలిపాయి.
