ప్రతిపక్షం, జూన్ 01: తెలంగాణలో రైతుల విద్యుత్ అంశంపై రాజకీయ వేడి మరింత పెరిగింది. రైతు విద్యుత్ పంపిణీ సంస్థ ఏర్పాటుపై రాష్ట్ర ప్రభుత్వాన్ని మాజీ మంత్రి కేటీఆర్ తీవ్రంగా విమర్శించారు. ఎన్నికల సమయంలో ఇచ్చిన హామీలను పూర్తిగా అమలు చేసిన తర్వాతే ఎన్నికల్లో పోటీ చేస్తానని ముఖ్యమంత్రి ప్రకటించే ధైర్యం ఉందా అని సవాల్ విసిరారు. సికింద్రాబాద్ కంటోన్మెంట్లో జరిగిన పార్టీ కార్యకర్తల సమావేశంలో మాట్లాడిన ఆయన, ఎన్నికల సమయంలో ప్రకటించిన వందలాది హామీలు, ఆరు ప్రధాన హామీల అమలుపై ప్రభుత్వం ప్రజలకు స్పష్టత ఇవ్వాలని డిమాండ్ చేశారు. హామీల అమలులో విఫలమైన ప్రభుత్వం కొత్త అంశాలను తెరపైకి తెచ్చి ప్రజల దృష్టి మళ్లించే ప్రయత్నం చేస్తోందని ఆరోపించారు.రైతుల విద్యుత్ మోటార్లకు మీటర్లు బిగించే అంశంపై ముఖ్యమంత్రి చేసిన వ్యాఖ్యలను ప్రస్తావిస్తూ, రైతుల పట్ల నిజమైన చిత్తశుద్ధి ఉంటే ముందుగా ఇచ్చిన హామీలను నెరవేర్చాలని అన్నారు. రైతుల పేరుతో కొత్త విద్యుత్ పంపిణీ సంస్థను ఏర్పాటు చేయడం వెనుక వేరే ఉద్దేశాలు ఉన్నాయనే అనుమానాలు వ్యక్తమవుతున్నాయని వ్యాఖ్యానించారు.గత ప్రభుత్వ హయాంలో రైతులకు నిరంతరాయ ఉచిత విద్యుత్ అందించామని గుర్తు చేసిన ఆయన, ప్రస్తుతం ప్రతిపాదిస్తున్న విధానం రైతుల ప్రయోజనాలకు విరుద్ధంగా మారే ప్రమాదం ఉందని అన్నారు. రైతుల సంక్షేమం పేరుతో తీసుకొస్తున్న నిర్ణయాలపై ప్రభుత్వం పూర్తి వివరాలు వెల్లడించాలని కోరారు.రాష్ట్రంలో రైతులు పంటల ధరలు, సాగునీరు, రుణభారం, ఎరువుల కొరత వంటి సమస్యలతో ఇబ్బందులు పడుతున్నారని, వాటి పరిష్కారంపై ప్రభుత్వం దృష్టి పెట్టాల్సిన అవసరం ఉందన్నారు. ప్రజలకు ఇచ్చిన హామీల అమలుపై సమాధానం చెప్పకుండా కొత్త చర్చలు తెరపైకి తేవడం సరైంది కాదని విమర్శించారు.
