ప్రతిపక్షం, జూలై 08: కాళేశ్వరం ప్రాజెక్టు అంశంపై రాష్ట్ర ప్రభుత్వం పారదర్శకంగా వ్యవహరిస్తుందని, అవసరమైతే శాసనసభ ప్రత్యేక సమావేశాలు నిర్వహించి ప్రస్తుత పరిస్థితిపై సమగ్ర చర్చకు సిద్ధంగా ఉన్నామని ముఖ్యమంత్రి ఎ. రేవంత్ రెడ్డి ప్రకటించారు. మహాత్మా జ్యోతిబా ఫూలే ప్రజాభవన్లో నిర్వహించిన “కూలిన కాళేశ్వరం – వైఫల్యాల నుంచి పునర్నిర్మాణం వైపు” అవగాహన కార్యక్రమంలో ఆయన మాట్లాడారు.
ప్రతిపక్ష నాయకుడు కోరిన తేదీన అసెంబ్లీ లేదా అసెంబ్లీ–మండలి సంయుక్త సమావేశం నిర్వహించేందుకు ప్రభుత్వం సిద్ధంగా ఉందని సీఎం స్పష్టం చేశారు. కాళేశ్వరం ప్రాజెక్టుపై ప్రతిపక్షం నిపుణులను, మేధావులను నమ్మించేలా శాస్త్రీయ పరిష్కారం చూపగలిగితే, పునరుద్ధరణ పనుల బాధ్యత వారికే అప్పగించేందుకు కూడా ప్రభుత్వం వెనుకాడదని తెలిపారు.
నిపుణుల నివేదికలు, భూగర్భ పరిస్థితులపై సమగ్ర పరిశీలన పూర్తికాకుండా ప్రాజెక్టులో నీటిని నిల్వ చేయడం ప్రమాదకరమని హెచ్చరించారు. లక్ష కోట్లకు పైగా వ్యయంతో నిర్మించిన ఈ ప్రాజెక్టును కాపాడాలన్నదే ప్రభుత్వ లక్ష్యమని, కానీ ప్రజల ప్రాణాలతో రాజీ పడబోమని స్పష్టం చేశారు.
ప్రాణహిత–చేవెళ్ల ప్రాజెక్టు నుంచి కాళేశ్వరం వరకు జరిగిన పరిణామాలను వివరించిన సీఎం, మొదట గ్రావిటీ ఆధారంగా సాగునీరు అందించే ప్రణాళికను రీడిజైన్ పేరుతో పూర్తిగా మార్చారని విమర్శించారు. రూ.38 వేల కోట్లతో పూర్తయ్యే ప్రాజెక్టు వ్యయం రూ.1.47 లక్షల కోట్లకు పెరిగిందని, అయినా ఆశించిన ఆయకట్టు అభివృద్ధి జరగలేదని పేర్కొన్నారు.
మేడిగడ్డ, అన్నారం, సుందిళ్ల బ్యారేజీల నిర్మాణంలో భూగర్భ పరీక్షలు సరిగా నిర్వహించకపోవడం, నాణ్యత ప్రమాణాలు పాటించకపోవడం, నిర్వహణలో నిర్లక్ష్యం కారణంగానే ప్రాజెక్టు దెబ్బతిన్నట్లు జాతీయ డ్యామ్ భద్రతా సంస్థ (NDSA) సహా పలు సంస్థలు తమ నివేదికల్లో స్పష్టం చేశాయని సీఎం తెలిపారు. 2020లోనే మేడిగడ్డలో లోపాలపై అధికారులు హెచ్చరించినా చర్యలు తీసుకోకపోవడంతో పరిస్థితి విషమించిందన్నారు.
ప్రజల్లో భ్రమలు సృష్టించే రాజకీయాలకు తావులేదని, శాస్త్రీయ అధ్యయనం ఆధారంగానే నిర్ణయాలు తీసుకుంటామని రేవంత్ రెడ్డి చెప్పారు. కాళేశ్వరం వల్ల నిజంగా ప్రజలకు ప్రయోజనం ఉంటే ప్రభుత్వం తప్పకుండా వినియోగిస్తుందని, కానీ నిపుణుల సూచనలు లేకుండా ముందుకు వెళ్లబోదని స్పష్టం చేశారు.
గత ప్రభుత్వం కాళేశ్వరం కోసం చేసిన భారీ అప్పులను ప్రస్తుత ప్రభుత్వం చెల్లిస్తూనే సంక్షేమ, అభివృద్ధి కార్యక్రమాలను కొనసాగిస్తోందని సీఎం పేర్కొన్నారు. రైతు రుణమాఫీ, రైతు భరోసా, సన్నవడ్లకు బోనస్, మహిళలకు ఆర్టీసీలో ఉచిత ప్రయాణం, రూ.500 గ్యాస్ సిలిండర్, భారీ స్థాయిలో ప్రభుత్వ ఉద్యోగాల భర్తీ వంటి కార్యక్రమాలను ఈ సందర్భంగా ప్రస్తావించారు.
అలాగే రాష్ట్రంలోని ప్రతి కుటుంబానికి రూ.5 లక్షల జీవిత బీమా కల్పించే పథకాన్ని మాజీ ప్రధాని ఇందిరా గాంధీ జయంతి సందర్భంగా ప్రారంభిస్తామని ముఖ్యమంత్రి ప్రకటించారు. ప్రభుత్వం ప్రజల ప్రయోజనాలే లక్ష్యంగా పారదర్శకంగా ముందుకు సాగుతుందని ఆయన స్పష్టం చేశారు.
