ప్రతిపక్షం, జూలై 06: సైబరాబాద్ పోలీసుల యాంటీ హ్యూమన్ ట్రాఫికింగ్ యూనిట్ (AHTU) చేపట్టిన భారీ ఆపరేషన్లో హైదరాబాద్ కేంద్రంగా కార్యకలాపాలు సాగిస్తున్న అంతర్రాష్ట్ర మానవ అక్రమ రవాణా, వ్యభిచార ముఠా గుట్టురట్టైంది. ఆధునిక సాంకేతికతను వినియోగిస్తూ వెబ్సైట్లు, వాట్సాప్ గ్రూపులు, సోషల్ మీడియా, కాల్ సెంటర్ల ద్వారా నిర్వహిస్తున్న ఈ అక్రమ నెట్వర్క్పై పోలీసులు ఏకకాలంలో దాడులు నిర్వహించి 17 మంది నిందితులను అరెస్ట్ చేశారు. ఈ చర్యల్లో వ్యభిచార వలలో చిక్కుకున్న 1,419 మంది మహిళలను గుర్తించి వారికి విముక్తి కల్పించినట్లు సైబరాబాద్ పోలీస్ కమిషనర్ స్టీఫెన్ రవీంద్ర వెల్లడించారు.
పోలీసుల దర్యాప్తులో ఈ ముఠా దేశంలోని కనీసం 15 నగరాల నుంచి యువతులను ఉద్యోగాలు, అధిక వేతనాలు, మోడలింగ్ అవకాశాల పేరుతో మోసగించి హైదరాబాద్కు తీసుకువచ్చినట్లు తేలింది. అనంతరం వారిని వివిధ ప్రాంతాల్లో ఉంచి కస్టమర్లకు పంపిస్తూ వ్యభిచార కార్యకలాపాలు నిర్వహించినట్లు అధికారులు గుర్తించారు. మొత్తం వ్యవస్థను డిజిటల్ పద్ధతిలో నడిపిస్తూ ప్రత్యేక వెబ్సైట్లు, వాట్సాప్ గ్రూపులు, ఆన్లైన్ ప్రకటనలు, కాల్ సెంటర్ల ద్వారా కస్టమర్లతో సంబంధాలు కొనసాగించినట్లు విచారణలో వెల్లడైంది. చెల్లింపులు కూడా డిజిటల్ మార్గాల ద్వారానే స్వీకరించినట్లు పోలీసులు తెలిపారు.
అరెస్టైన 17 మంది నిందితులకు ఇప్పటికే నమోదైన 39 కేసుల్లో ప్రమేయం ఉన్నట్లు దర్యాప్తులో నిర్ధారణ అయిందని సీపీ తెలిపారు. ఈ నెట్వర్క్కు ఇతర రాష్ట్రాలు లేదా విదేశీ ముఠాలతో సంబంధాలు ఉన్నాయా అనే కోణంలో కూడా విచారణ కొనసాగుతోందన్నారు. ఆర్థిక లావాదేవీలు, సహకరించిన వ్యక్తులు, ఇతర అనుబంధాలపై ప్రత్యేక దర్యాప్తు చేపట్టినట్లు వెల్లడించారు.
రక్షించిన బాధిత మహిళలకు వైద్య సేవలు, కౌన్సెలింగ్, చట్టపరమైన సహాయం, పునరావాస కార్యక్రమాలు అందించేందుకు సంబంధిత ప్రభుత్వ శాఖలు, స్వచ్ఛంద సంస్థలతో కలిసి చర్యలు తీసుకుంటున్నట్లు అధికారులు తెలిపారు. మానవ అక్రమ రవాణా సమాజానికి తీవ్రమైన ముప్పుగా మారుతోందని పేర్కొన్న సీపీ స్టీఫెన్ రవీంద్ర, ఉద్యోగాలు లేదా ఆకర్షణీయమైన ఆఫర్ల పేరుతో వచ్చే అనుమానాస్పద ఆహ్వానాల విషయంలో ప్రజలు అప్రమత్తంగా ఉండాలని సూచించారు. అలాగే ఇలాంటి అక్రమ కార్యకలాపాలపై సమాచారం తెలిసిన వెంటనే పోలీసులకు తెలియజేయాలని విజ్ఞప్తి చేశారు.
