*ప్రభుత్వ ఆసుపత్రికి రెండు ఎకరాల భూమి ఇచ్చి ప్రజల గుండెల్లో నిలిచిన భూతరాజు రామయ్య.
*చండూరు ప్రభుత్వ ఆసుపత్రికి పునాది వేసిన మహాదాత – ఆయన భూమిలోనే నేడు వందలాది మందికి వైద్యం.
*చిత్రపటానికి పూలమాలలు వేసి నివాళి – ఆసుపత్రిలో రోగులకు పండ్లు, బ్రెడ్ పంపిణీ చేసిన కుటుంబ సభ్యులు.
*ప్రభుత్వ వైద్యాధికారి డాక్టర్ మాసరాజు ఆధ్వర్యంలో సేవా కార్యక్రమం – ఆదర్శంగా దాత కుటుంబం.
ప్రతిపక్షం చండూరు అక్టోబర్ 24: ఆస్తి ఇస్తే తరగుతుంది, దానం చేస్తే చరిత్రగా మిగులుతుందని నిరూపించిన మహనీయుడు భూతరాజు రామయ్య. చండూరు ప్రభుత్వ ఆసుపత్రి నిర్మాణానికి సొంత రెండు ఎకరాల విలువైన భూమిని నిస్వార్థంగా దానం చేసి, చండూరు మండల ప్రజల గుండెల్లో చిరస్థాయిగా నిలిచిపోయారు.చండూరులో ప్రభుత్వ ఆసుపత్రి లేని రోజుల్లో ప్రజలు వైద్యం కోసం నల్గొండకు వెళ్లాల్సిన దుస్థితి ఉండేది. ఆ కష్టాన్ని గమనించిన భూతరాజు రామయ్య తన రెండు ఎకరాల భూమిని ప్రభుత్వ ఆసుపత్రి నిర్మాణానికి దానం చేశారు. ఆ భూమిలోనే నేడు ప్రభుత్వ ఆసుపత్రి నడుస్తూ, రోజూ వందలాది మంది పేద ప్రజలకు వైద్య సేవలు అందిస్తోంది. ఆయన చేసిన త్యాగం వల్లే చండూరుకు ఒక ప్రభుత్వ ఆసుపత్రి దక్కింది.ఆ మహనీయుడి 45వ వర్ధంతిని శుక్రవారం కుటుంబ సభ్యులు ఘనంగా నిర్వహించారు. ఆయన చిత్రపటానికి పూలమాలలు వేసి, ఘనంగా నివాళులర్పించారు. ఆయన సేవలు చిరస్మరణీయమని, ఆయన ఆశయాలను కొనసాగిస్తామని కుటుంబ సభ్యులు తెలిపారు.
వర్ధంతి సందర్భంగా కుటుంబ సభ్యులు సేవా కార్యక్రమాలు చేపట్టారు. చండూరు ప్రభుత్వ ఆసుపత్రిలో చికిత్స పొందుతున్న రోగులకు పండ్లు, బ్రెడ్ పంపిణీ చేశారు. మానవ సేవే మాధవ సేవ అని చాటారు.ఈ కార్యక్రమంలో ప్రభుత్వ ఆసుపత్రి వైద్యాధికారి డాక్టర్ మాసరాజు, ఆసుపత్రి సిబ్బంది, భూతరాజు రామయ్య కుటుంబ సభ్యులు, బంధుమిత్రులు, స్థానికులు పెద్ద సంఖ్యలో పాల్గొన్నారు.భూతరాజు రామయ్య లాంటి దాతలు నేటి తరానికి ఆదర్శమని, ఆయన పేరును చండూరు చరిత్రలో ఎప్పటికీ గుర్తుంచుకుంటారని వైద్యాధికారి డాక్టర్ మాసరాజు ఈ సందర్భంగా కొనియాడారు.
