ప్రతిపక్షం, సెప్టెంబర్ 06: ఆంధ్రప్రదేశ్ కాంగ్రెస్ కమిటీ అధ్యక్షురాలు వైఎస్ షర్మిల ఇంట త్వరలో పెళ్లి సందడి నెలకొననుంది. ఆమె కుమార్తె వైఎస్ అంజలి రెడ్డి వివాహం నిశ్చయమైనట్లు షర్మిల సోషల్ మీడియా వేదికగా వెల్లడించారు. ఈ విషయాన్ని ఆమె స్వయంగా ప్రకటిస్తూ కాబోయే జంటకు సంబంధించిన ఫొటోలను పంచుకున్నారు.
కర్నూలు జిల్లాకు చెందిన సోమలా సుబ్బారెడ్డి, పద్మారెడ్డి దంపతుల కుమారుడు డాక్టర్ రఘురామ్ రెడ్డితో తన కుమార్తె అంజలి రెడ్డి వివాహం జరగనున్నట్లు షర్మిల తెలిపారు. అంజలి రెడ్డి, రఘురామ్ రెడ్డి ఇద్దరూ అమెరికా పౌరులని ఆమె పేర్కొన్నారు. అయితే వీరి స్వస్థలం కర్నూలు జిల్లా అని వెల్లడించారు.
తన కుమార్తె జీవితంలో కొత్త అధ్యాయం ప్రారంభం కానున్న నేపథ్యంలో షర్మిల సంతోషం వ్యక్తం చేశారు. కాబోయే వధూవరుల ఫొటోలను సోషల్ మీడియా ద్వారా అభిమానులు, పార్టీ శ్రేణులు, శ్రేయోభిలాషులతో పంచుకున్నారు.
అంజలి రెడ్డి, డాక్టర్ రఘురామ్ రెడ్డి వివాహం త్వరలో జరగనుందని తెలిపిన షర్మిల.. కాబోయే జంటకు అందరి ఆశీస్సులు, ప్రేమాభిమానాలు కావాలని కోరారు. దీంతో షర్మిల కుటుంబంలో పెళ్లి సందడి ప్రారంభం కావడంపై అభిమానులు, రాజకీయ వర్గాల నుంచి శుభాకాంక్షలు వెల్లువెత్తుతున్నాయి.
ఇప్పటికే షర్మిల తన కుమార్తె వివాహానికి సంబంధించిన విషయాన్ని అధికారికంగా వెల్లడించడంతో వివాహ వేడుకలు, తేదీ తదితర వివరాలపై ఆసక్తి నెలకొంది. అయితే వివాహ తేదీ, వేదికకు సంబంధించిన పూర్తి వివరాలను ఆమె వెల్లడించలేదు.
