ప్రతిపక్షం, జూలై 30: తెలంగాణలో కురుస్తున్న ఎడతెరిపి లేని వర్షాలు సాధారణ జనజీవనాన్ని తీవ్రంగా ప్రభావితం చేస్తున్నాయి. హైదరాబాద్తో పాటు పలు జిల్లాల్లో గత మూడు రోజులుగా కొనసాగుతున్న భారీ వర్షాలతో రహదారులు జలమయమవగా, పలు ప్రాంతాల్లో ట్రాఫిక్కు తీవ్ర అంతరాయం ఏర్పడుతోంది. ఈ పరిస్థితుల్లో విద్యార్థులు పాఠశాలలకు వెళ్లడంలో ఇబ్బందులు ఎదుర్కొంటున్నారు.
భారీ వర్షాల కారణంగా బుధవారం కొన్ని ప్రైవేట్ పాఠశాలలు స్వచ్ఛందంగా సెలవు ప్రకటించాయి. అయితే రాష్ట్రవ్యాప్తంగా ప్రభుత్వం అధికారికంగా సెలవులు ప్రకటించకపోవడంతో తల్లిదండ్రులు ఆందోళన వ్యక్తం చేస్తున్నారు.
ఇదిలా ఉండగా, వాతావరణ శాఖ నేడు రాష్ట్రంలోని పలు ప్రాంతాల్లో అత్యంత భారీ వర్షాలు కురిసే అవకాశం ఉందని హెచ్చరికలు జారీ చేసింది. ఈ నేపథ్యంలో విద్యార్థుల భద్రతను దృష్టిలో ఉంచుకుని ప్రభుత్వం అన్ని జిల్లాల్లో లేదా వర్ష ప్రభావిత ప్రాంతాల్లో విద్యాసంస్థలకు సెలవు ప్రకటించాలని తల్లిదండ్రులు, ప్రజా సంఘాలు, పలువురు సామాజిక మాధ్యమాల ద్వారా డిమాండ్ చేస్తున్నారు.
ముఖ్యంగా లోతట్టు ప్రాంతాలు, వాగులు, చెరువుల సమీపంలో నివసించే విద్యార్థులు పాఠశాలలకు చేరుకోవడం ప్రమాదకరంగా మారిందని వారు పేర్కొంటున్నారు. భారీ వర్షాల నేపథ్యంలో విద్యార్థుల ప్రాణ భద్రతకు ప్రాధాన్యం ఇవ్వాలని కోరుతున్నారు.
అయితే రాష్ట్ర ప్రభుత్వం లేదా జిల్లా కలెక్టర్లు అధికారికంగా సెలవులు ప్రకటిస్తే మాత్రమే అవి అమల్లోకి వస్తాయి. వాతావరణ పరిస్థితులను నిరంతరం సమీక్షిస్తున్న అధికారులు, అవసరమైతే జిల్లాల వారీగా నిర్ణయాలు తీసుకునే అవకాశముందని సమాచారం. ప్రస్తుతం తల్లిదండ్రులు, విద్యార్థులు జిల్లా యంత్రాంగం నుంచి వచ్చే అధికారిక ప్రకటనల కోసం ఎదురుచూస్తున్నారు.
