ప్రతిపక్షం, జూలై 23: ఢిల్లీలో జరుగుతున్న విద్యార్థుల నిరసనలకు బాలీవుడ్ నటుడు సల్మాన్ ఖాన్ మద్దతు ప్రకటించారు. విద్యార్థులు శాంతియుతంగా చేపట్టిన ఆందోళన హింసాత్మకంగా మారడం బాధాకరమని, ఈ ఘటనల్లో విద్యార్థులు గాయపడటం తీవ్రంగా కలిచివేసిందని ఆయన పేర్కొన్నారు.
సామాజిక మాధ్యమం ద్వారా స్పందించిన సల్మాన్ ఖాన్, మెరుగైన విద్యా వ్యవస్థ కోసం యువత ఒక్కటిగా నిలవడం అభినందనీయమని అన్నారు. విద్యార్థులు తమ హక్కుల కోసం చేస్తున్న ఈ ఉద్యమం సరైన దిశలో ఉందని, వారి ఆందోళనను ప్రభుత్వం సానుకూలంగా పరిగణించి పరిష్కార మార్గాలు చూపుతుందని ఆశాభావం వ్యక్తం చేశారు.
దేశ భవిష్యత్తును తీర్చిదిద్దే యువత ఆకాంక్షలను గౌరవించాలని, ఈ తరం భారతదేశానికి గర్వకారణంగా నిలుస్తుందనే నమ్మకం తనకు ఉందని సల్మాన్ ఖాన్ వ్యాఖ్యానించారు.
ఇదిలా ఉండగా, మాజీ క్రికెటర్ యువరాజ్ సింగ్ కూడా విద్యార్థుల ఉద్యమానికి మద్దతు ప్రకటించిన విషయం తెలిసిందే. ప్రముఖులు వరుసగా మద్దతు తెలుపుతుండటంతో విద్యార్థుల నిరసనలకు మరింత ప్రాధాన్యం ఏర్పడుతోంది.
