ప్రతిపక్షం, సెప్టెంబర్ 01: సామాజిక మాధ్యమాల్లో కనిపించే ప్రకటనల విషయంలో ఆండ్రాయిడ్ ఫోన్ వినియోగదారులు అత్యంత అప్రమత్తంగా ఉండాలని నేషనల్ సైబర్క్రైమ్ థ్రెట్ అనలిటిక్స్ యూనిట్ హెచ్చరించింది. ముఖ్యంగా ఇన్స్టాగ్రామ్, ఫేస్బుక్లలో అశ్లీల కంటెంట్, వినోదం వంటి పేర్లతో కనిపించే యాప్ ప్రకటనలను నమ్మి క్లిక్ చేయడం ద్వారా సైబర్ నేరగాళ్లు వినియోగదారులను మోసం చేస్తున్నట్లు తెలిపింది.
కొన్ని ప్రకటనల్లో ఆకర్షణీయమైన కంటెంట్ను చూపిస్తూ ప్రత్యేక యాప్ను డౌన్లోడ్ చేసుకోవాలని సూచిస్తున్నారని అధికారులు పేర్కొన్నారు. ఆయా ప్రకటనలపై క్లిక్ చేసిన తర్వాత అధికారిక యాప్ స్టోర్కు బదులుగా అనుమానాస్పద వెబ్సైట్లకు తీసుకెళ్లి, ఏపీకే ఫైళ్లను డౌన్లోడ్ చేయించే ప్రయత్నం జరుగుతున్నట్లు గుర్తించారు. ఇలాంటి ఫైళ్లను ఫోన్లో ఇన్స్టాల్ చేసుకోవడం వల్ల ప్రమాదం మరింత పెరిగే అవకాశం ఉందని హెచ్చరించారు.
నైట్ ప్లే, రీలూప్, రివో, నెక్సో, విక్సా వంటి కొన్ని యాప్లను ఈ తరహా అనుమానాస్పద ప్రచారాలతో ముడిపెట్టి సైబర్ భద్రతా సంస్థలు హెచ్చరికలు జారీ చేసినట్లు సమాచారం. అయితే వినియోగదారులు యాప్ పేరు చూసి మాత్రమే నమ్మకుండా, దాని మూలం, అనుమతులు, ప్రచురణకర్త వివరాలను తప్పనిసరిగా పరిశీలించాలని సూచిస్తున్నారు.
ముఖ్యంగా ఏపీకే ఫైల్ను ఫోన్లో ఇన్స్టాల్ చేసే సమయంలో అడిగే అనుమతుల విషయంలో జాగ్రత్తగా ఉండాలని అధికారులు చెబుతున్నారు. అవసరం లేని అనుమతులు ఇచ్చినట్లయితే యాప్కు ఫోన్లోని వివిధ సమాచారాన్ని యాక్సెస్ చేసే అవకాశం లభించవచ్చు. దీంతో వ్యక్తిగత సమాచారం, ఫొటోలు, సందేశాలు, పరికరంలోని ఇతర సున్నితమైన వివరాలు ప్రమాదంలో పడే అవకాశం ఉంటుంది.
కొన్ని సందర్భాల్లో ఇలాంటి హానికరమైన యాప్లు ఫోన్పై నియంత్రణ సాధించేందుకు ప్రయత్నించవచ్చని సైబర్ నిపుణులు హెచ్చరిస్తున్నారు. అందువల్ల సామాజిక మాధ్యమాల్లో కనిపించే ప్రతి ప్రకటనను నమ్మకుండా, ముఖ్యంగా తెలియని వెబ్సైట్ నుంచి యాప్ను డౌన్లోడ్ చేయాలని సూచించే ప్రకటనలకు దూరంగా ఉండాలని సూచిస్తున్నారు.
ఆండ్రాయిడ్ వినియోగదారులు సాధ్యమైనంత వరకు యాప్లను అధికారిక యాప్ స్టోర్ నుంచే డౌన్లోడ్ చేసుకోవాలని, తెలియని మూలాల నుంచి వచ్చే ఏపీకే ఫైళ్లను ఇన్స్టాల్ చేయకూడదని అధికారులు సూచిస్తున్నారు. ఇప్పటికే అనుమానాస్పద యాప్ను ఇన్స్టాల్ చేసి ఉంటే దానికి ఇచ్చిన అనుమతులను పరిశీలించి, అవసరమైతే వెంటనే తొలగించాలని సూచించారు. సామాజిక మాధ్యమాల్లో ఒక్క క్లిక్ కూడా వ్యక్తిగత సమాచారానికి, ఆర్థిక భద్రతకు ముప్పుగా మారే అవకాశం ఉన్నందున వినియోగదారులు అప్రమత్తంగా వ్యవహరించాల్సిన అవసరం ఉంది.
