ప్రతిపక్షం, నవంబర్ 14: చిన్నారుల జీవితాల్లో భద్రత, ఆరోగ్యం, విద్య, ఆనందం నిండినప్పుడే సమాజం నిజమైన అభివృద్ధి సాధించినట్లవుతుందని మహిళా, శిశు సంక్షేమ శాఖ మంత్రి డాక్టర్ దనసరి అనసూయ సీతక్క అన్నారు. ప్రతి బిడ్డకు ప్రేమతో కూడిన వాతావరణం, పోషకాహారం, నాణ్యమైన విద్య అందించడంతో పాటు వారి హక్కులను కాపాడటం ప్రభుత్వ ప్రధాన బాధ్యతగా భావిస్తున్నామని వెల్లడించారు. ముఖ్యమంత్రి రేవంత్ రెడ్డి నాయకత్వంలో బాలల సంక్షేమం కోసం పలు కార్యక్రమాలను అమలు చేస్తున్నట్లు తెలిపారు. హైదరాబాద్ బంజారాహిల్స్‌లోని బాబు జగ్జీవన్ రామ్ భవన్‌లో మహిళా, శిశు సంక్షేమ శాఖ ఆధ్వర్యంలో నిర్వహించిన బాలల దినోత్సవ వేడుకల్లో మంత్రులు సీతక్క, దామోదర రాజనర్సింహ, పొన్నం ప్రభాకర్ పాల్గొన్నారు. ఈ సందర్భంగా బాలల ఆరోగ్యం, రక్షణ, పోషకాహారం, దత్తత ప్రక్రియలను మెరుగుపరిచే పలు కార్యక్రమాలకు శ్రీకారం చుట్టారు.
పండిట్ జవహర్‌లాల్ నెహ్రూ జన్మదినాన్ని పురస్కరించుకుని జరుపుకునే బాలల దినోత్సవం సందర్భంగా చిన్నారులకు మంత్రి శుభాకాంక్షలు తెలిపారు. పిల్లలే దేశానికి భవిష్యత్తు అనే నెహ్రూ ఆశయాన్ని ప్రతి ఒక్కరూ ఆచరణలో పెట్టాలని సూచించారు. నెహ్రూ, డాక్టర్ బీఆర్ అంబేద్కర్ వంటి మహనీయులు దేశ నిర్మాణానికి చేసిన సేవలు, సమాజంలో సమానత్వం, ప్రజాస్వామ్య విలువల స్థాపనకు చేసిన కృషి తరతరాలకు స్ఫూర్తిగా నిలుస్తాయని పేర్కొన్నారు. మనిషి జీవితంలో సంపాదించే పేరు కంటే సమాజానికి చేసే సేవే ఎక్కువ కాలం గుర్తుండిపోతుందని వ్యాఖ్యానించారు. చిన్నారుల సంక్షేమం కోసం తీసుకునే నిర్ణయాలు దేశ భవిష్యత్తును ప్రభావితం చేస్తాయని అన్నారు.
బాలలపై వేధింపులు, బాల్యవివాహాలు, చిన్నారుల అక్రమ రవాణా, దుర్వినియోగం వంటి సమస్యలను అరికట్టేందుకు ప్రభుత్వం నిరంతరం కృషి చేస్తోందని సీతక్క తెలిపారు. ఎలాంటి ఆపదలో ఉన్నా పిల్లలకు తక్షణ సహాయం అందేలా రక్షణ వ్యవస్థను బలోపేతం చేస్తున్నామని చెప్పారు. బాలల దినోత్సవం సందర్భంగా నాలుగు ముఖ్యమైన కార్యక్రమాలను ప్రారంభించినట్లు వెల్లడించారు. పోషకాహార లోపంతో బాధపడుతున్న సామ్, మామ్ చిన్నారుల ఆరోగ్య పరిస్థితిని ఎప్పటికప్పుడు పరిశీలించేందుకు కృత్రిమ మేధ ఆధారిత పర్యవేక్షణ వ్యవస్థను అందుబాటులోకి తీసుకొచ్చినట్లు వివరించారు. దీని ద్వారా పోషకాహార లోపం ఉన్న పిల్లలను గుర్తించి, వారి పరిస్థితికి అనుగుణంగా అవసరమైన చర్యలు చేపట్టేందుకు వీలవుతుందని తెలిపారు.
బాల్యవివాహాల నిర్మూలన లక్ష్యంగా వంద రోజుల ప్రత్యేక అవగాహన ప్రచార కార్యక్రమాన్ని కూడా ప్రారంభించారు. చిన్న వయసులో వివాహాలు జరగడం వల్ల బాలికల చదువు మధ్యలోనే ఆగిపోవడంతో పాటు ఆరోగ్యం, భవిష్యత్తుపై తీవ్ర ప్రభావం పడుతుందని మంత్రి ఆందోళన వ్యక్తం చేశారు. తల్లిదండ్రులు, గ్రామస్థులు, ప్రజాప్రతినిధులు బాల్యవివాహాలను ప్రోత్సహించకుండా వాటిని అడ్డుకునేందుకు ముందుకు రావాలని కోరారు. బాలల సంరక్షణ, దత్తత సేవలను విస్తరించేందుకు ఆరు కొత్త ప్రత్యేక దత్తత సంస్థలను ఏర్పాటు చేస్తున్నట్లు తెలిపారు. హైదరాబాద్, మహబూబ్‌నగర్, మెదక్, రంగారెడ్డి జిల్లాల్లో నాలుగు కొత్త చైల్డ్‌లైన్ సహాయ కేంద్రాలను ప్రారంభిస్తున్నట్లు చెప్పారు. దత్తతకు సంబంధించిన చట్టబద్ధమైన ప్రక్రియలో జాప్యం తగ్గించాల్సిన అవసరం ఉందని, ప్రక్రియ సులభతరం అయితే అక్రమ దత్తతలకు అడ్డుకట్ట వేయవచ్చని అభిప్రాయపడ్డారు.
చిన్నారుల ఆరోగ్య పరిరక్షణలో ఆహార భద్రత కూడా కీలకమని సీతక్క పేర్కొన్నారు. పిల్లలకు అందించే పాలు, ఆహార పదార్థాలు కలుషితం కాకుండా చూడాలని, రసాయనాల ప్రభావం వారి ఆరోగ్యంపై పడకుండా జాగ్రత్తలు తీసుకోవాలని సూచించారు. చిన్నారుల ఆరోగ్యాన్ని దృష్టిలో పెట్టుకుని ప్రభుత్వం తీసుకుంటున్న చర్యలను ప్రస్తావిస్తూ, సురక్షితమైన ఆహారం అందించడం ప్రతి ఒక్కరి బాధ్యత అని స్పష్టం చేశారు. అంగన్వాడీ కేంద్రాల్లో పిల్లల సంరక్షణ విషయంలో సిబ్బంది ప్రత్యేక శ్రద్ధ చూపాలని ఆదేశించారు. చిన్నారులను తమ సొంత కుటుంబ సభ్యుల్లా భావించి, ప్రేమతో చూసుకోవాలని సూచించారు. అమ్మ ఒడిలో లభించే ఆప్యాయతతో పాటు అంగన్వాడీ సిబ్బంది తమ విధులను బాధ్యతగా నిర్వర్తించాలని అన్నారు.
అంగన్వాడీ కేంద్రాల్లో అల్పాహార కార్యక్రమాన్ని మరింత విస్తరిస్తున్నామని, చిన్నారులు, సిబ్బందికి యూనిఫాంలు అందించే చర్యలు చేపడుతున్నామని మంత్రి తెలిపారు. ప్రాథమిక విద్యాభ్యాసానికి ఉపయోగపడే ప్రీ-స్కూల్ కిట్లను కూడా అందిస్తున్నట్లు వివరించారు. గతంలో ప్రారంభమైన అంగన్వాడీ సేవలను మరింత సమర్థంగా నిర్వహిస్తూ పిల్లలకు మెరుగైన పోషకాహారం, విద్య, సంరక్షణ అందించడమే లక్ష్యంగా ముందుకు సాగుతున్నామని చెప్పారు. అంగన్వాడీ కేంద్రాలు చిన్నారులకు కేవలం ఆహారం అందించే ప్రదేశాలుగా కాకుండా వారి శారీరక, మానసిక ఎదుగుదలకు తోడ్పడే కేంద్రాలుగా ఉండాలని సూచించారు.
బాల సదన్‌లలో ఉంటున్న అనాథ పిల్లలకు అవసరమైన గుర్తింపు పత్రాలను అందించేందుకు ప్రత్యేక చర్యలు చేపట్టినట్లు సీతక్క వెల్లడించారు. రాష్ట్రంలో తొలిసారిగా బాల సదన్‌లలోని చిన్నారులకు ఆధార్, ఆరోగ్య, కుల, జనన ధ్రువీకరణ పత్రాలతో పాటు యుడిఐడి, అనాథ ధ్రువీకరణ పత్రాలు అందించే కార్యక్రమాన్ని చేపట్టినట్లు తెలిపారు. ఈ పత్రాలు పిల్లలకు విద్య, వైద్యం, ఇతర ప్రభుత్వ సేవలు పొందేందుకు ఉపయోగపడతాయని పేర్కొన్నారు. అనాథ పిల్లలు కూడా ఇతర చిన్నారుల మాదిరిగానే అన్ని అవకాశాలను అందిపుచ్చుకుని గౌరవంగా జీవించేలా ప్రభుత్వం సహకరిస్తుందని చెప్పారు.
బాలల భద్రతను కాపాడటంలో ప్రభుత్వంతో పాటు కుటుంబాలు, పాఠశాలలు, స్వచ్ఛంద సంస్థలు, స్థానిక సమాజం కూడా చురుకుగా వ్యవహరించాలని మంత్రి పిలుపునిచ్చారు. చిన్నారులపై వేధింపులు లేదా దుర్వినియోగం జరిగినప్పుడు మౌనంగా ఉండకుండా సంబంధిత అధికారులకు తెలియజేయాలని సూచించారు. ప్రతి బిడ్డకు సురక్షితమైన బాల్యం కల్పించేందుకు సమిష్టి కృషి అవసరమని స్పష్టం చేశారు. కార్యక్రమంలో బాలల హక్కుల కమిషన్ సభ్యులు చందన, గూగులో సరిత, వచన్, ప్రేమలత అగర్వాల్, మహిళా, శిశు సంక్షేమ శాఖ ప్రత్యేక కార్యదర్శి శృతి ఓజా, కమిషనర్ సంగీత సత్యనారాయణ తదితరులు పాల్గొన్నారు. ఈ వేడుకల్లో చిన్నారులు ప్రదర్శించిన సాంస్కృతిక నృత్యాలు సందర్శకులను ఆకట్టుకోగా, చిల్డ్రన్ హోమ్ పిల్లలు మొబైల్ ఫోన్ల దుర్వినియోగంపై ప్రదర్శించిన నాటకం ప్రత్యేకంగా నిలిచింది.
