ప్రతిపక్షం, ఆగస్టు 16, హైదరాబాద్: తెలంగాణలో స్మార్ట్ రేషన్ కార్డులపై ప్రధాని నరేంద్ర మోదీ ఫొటో ముద్రించాలన్న బీజేపీ డిమాండ్పై మంత్రి ఎన్. ఉత్తమ్ కుమార్ రెడ్డి స్పందించారు. రాష్ట్రంలో పేదలకు పంపిణీ చేస్తున్న సన్నబియ్యానికి కేంద్ర ప్రభుత్వం పూర్తిస్థాయిలో నిధులు భరిస్తే.. రేషన్ కార్డులపై ప్రధాని మోదీ ఫొటో పెట్టే అంశాన్ని పరిశీలిస్తామని స్పష్టం చేశారు.
కేంద్ర ప్రభుత్వం ప్రస్తుతం రాష్ట్రానికి దొడ్డు బియ్యం మాత్రమే అందిస్తోందని మంత్రి తెలిపారు. తెలంగాణ ప్రభుత్వం సన్నబియ్యం పంపిణీ కోసం ప్రత్యేకంగా నిధులు ఖర్చు చేస్తోందని పేర్కొన్నారు. పేదలకు నాణ్యమైన బియ్యం అందించాలనే ఉద్దేశంతో రాష్ట్ర ప్రభుత్వం ఈ కార్యక్రమాన్ని అమలు చేస్తోందన్నారు.
స్మార్ట్ రేషన్ కార్డుల విషయంలో రాజకీయాలు చేయడం సరికాదని ఉత్తమ్ కుమార్ రెడ్డి హితవు పలికారు. పేదల కడుపు నింపే రేషన్ కార్డులను రాజకీయ వివాదాలకు వేదికగా మార్చవద్దని సూచించారు. లబ్ధిదారులకు ఆహార భద్రత కల్పించడమే ప్రభుత్వ ప్రధాన లక్ష్యమని స్పష్టం చేశారు.
కేంద్ర ప్రభుత్వం అమలు చేస్తున్న పథకాలకు సంబంధించిన కార్డులు లేదా పథకాల్లో ప్రధాని ఫొటోలు పెట్టుకోవడాన్ని తాము వ్యతిరేకించడం లేదని మంత్రి తెలిపారు. అయితే రాష్ట్ర ప్రభుత్వం స్వయంగా నిధులు భరిస్తున్న పథకాల విషయంలో కూడా కేంద్రం తమ వాటా ఉందన్నట్లుగా ప్రచారం చేయడం సరికాదని వ్యాఖ్యానించారు.
సన్నబియ్యం పంపిణీకి అయ్యే మొత్తం వ్యయాన్ని కేంద్రం భరిస్తే ప్రధాని ఫొటో విషయాన్ని పరిశీలించేందుకు తమకు ఎలాంటి అభ్యంతరం లేదని ఉత్తమ్ స్పష్టం చేశారు. ఈ అంశంపై బీజేపీ, కాంగ్రెస్ మధ్య రాజకీయ విమర్శలు కొనసాగుతున్న నేపథ్యంలో మంత్రి వ్యాఖ్యలు ప్రాధాన్యం సంతరించుకున్నాయి.
