ప్రతిపక్షం, ఆగస్టు 22: లండన్ పర్యటనలో ఉన్న తెలంగాణ ముఖ్యమంత్రి ఎ. రేవంత్ రెడ్డి రాష్ట్రంలో విద్య, పరిశోధన, నైపుణ్యాభివృద్ధి రంగాలను మరింత విస్తరించే దిశగా కీలక ప్రయత్నాలు చేస్తున్నారు. తెలంగాణ రైజింగ్ ప్రతినిధి బృందంతో కలిసి శుక్రవారం 900 ఏళ్ల చరిత్ర కలిగిన ప్రపంచ ప్రఖ్యాత ఆక్స్ఫర్డ్ యూనివర్సిటీని సందర్శించిన సీఎం.. హైదరాబాద్లో ఆక్స్ఫర్డ్ విద్యా కార్యక్రమాలు, పరిశోధన కేంద్రాలను ఏర్పాటు చేసే అవకాశాలను పరిశీలించాలని యూనివర్సిటీ ప్రతినిధులను ఆహ్వానించారు.
ఆక్స్ఫర్డ్ యూనివర్సిటీకి చెందిన బ్లోవాట్నిక్ స్కూల్ ఆఫ్ గవర్నమెంట్ ప్రొఫెసర్ మాయా ట్యూడర్, బేలియోల్ కాలేజీ ప్రొఫెసర్ ఫైసల్ దేవ్జీతో సీఎం సమావేశమయ్యారు. ఈ సందర్భంగా తెలంగాణ రైజింగ్ విజన్ను వారికి వివరించారు. హైదరాబాద్ను ప్రపంచస్థాయి విద్యా కేంద్రంగా తీర్చిదిద్దేందుకు రాష్ట్ర ప్రభుత్వం చేపడుతున్న కార్యక్రమాలు, యువతకు అంతర్జాతీయ స్థాయి విద్య, పరిశోధన, నైపుణ్యాభివృద్ధి అవకాశాలు కల్పించాలన్న లక్ష్యాలను వివరించారు.
ఆక్స్ఫర్డ్ యూనివర్సిటీకి హైదరాబాద్లో ప్రత్యేక కేంద్రాన్ని ఏర్పాటు చేసే అవకాశాలను పరిశీలించాలని రేవంత్ రెడ్డి కోరారు. ఎగ్జిక్యూటివ్ ఎడ్యుకేషన్ కార్యక్రమాలు, ప్రత్యేక పరిశోధన సామర్థ్యాలు, అంతర్జాతీయ విద్యా అనుభవాన్ని తెలంగాణకు తీసుకురావడం ద్వారా రాష్ట్ర యువత, ఉద్యోగ నిపుణులకు ప్రపంచస్థాయి అవకాశాలు అందుబాటులోకి వస్తాయని పేర్కొన్నారు.
కేంద్ర ప్రభుత్వ జాతీయ విద్యా విధానం కింద విదేశీ విశ్వవిద్యాలయాలకు భారత్లో ఉన్న అవకాశాలపై ముఖ్యమంత్రి కార్యాలయ సలహాదారు, ఎక్స్అఫీషియో ప్రత్యేక ప్రధాన కార్యదర్శి కె. రామకృష్ణారావు ఆక్స్ఫర్డ్ ప్రతినిధులకు ప్రజెంటేషన్ ఇచ్చారు. హైదరాబాద్, తెలంగాణలో అంతర్జాతీయ విద్యా సంస్థలు ఏర్పాటు చేసుకునేందుకు ఉన్న అనుకూల పరిస్థితులు, అందుబాటులో ఉన్న అవకాశాలు, ప్రయోజనాలను వివరించారు.
తెలంగాణ ప్రభుత్వంతో కలిసి పనిచేసేందుకు ప్రొఫెసర్లు మాయా ట్యూడర్, ఫైసల్ దేవ్జీ సానుకూలంగా స్పందించినట్లు అధికారులు తెలిపారు. విద్య, పరిశోధన, నైపుణ్యాభివృద్ధి రంగాల్లో భాగస్వామ్యానికి ఉన్న అవకాశాలపై చర్చించారు. డిసెంబర్ 7, 8, 9 తేదీల్లో హైదరాబాద్లో నిర్వహించనున్న తెలంగాణ రైజింగ్ గ్లోబల్ సమ్మిట్కు ఆక్స్ఫర్డ్ ప్రతినిధులను కూడా సీఎం బృందం ఆహ్వానించింది.
అనంతరం రేవంత్ రెడ్డి చారిత్రక సోమర్విల్ కాలేజీని సందర్శించారు. అక్కడ విద్యాభ్యాసం చేసిన మాజీ ప్రధానమంత్రి ఇందిరా గాంధీ చిత్రపటాన్ని తిలకించారు. ఈ చిత్రపటాన్ని 2002లో సోనియా గాంధీ సోమర్విల్ కాలేజీకి బహూకరించారు.
విద్యా రంగంతో పాటు క్రీడా మౌలిక వసతుల అభివృద్ధిపైనా సీఎం దృష్టి సారించారు. జీఎంఆర్ గ్రూప్ నిర్వహిస్తున్న యుటిలిటా బౌల్ను సందర్శించిన రేవంత్ రెడ్డి.. సంస్థ కార్పొరేట్ చైర్మన్ కిరణ్ కుమార్ గ్రంథి, గ్లోబల్ స్పోర్ట్స్ విభాగం ప్రతినిధులతో సమావేశమయ్యారు. అక్కడి గోల్ఫ్ కోర్స్, క్రీడా మౌలిక వసతులు, హోటల్ తదితర సదుపాయాలను పరిశీలించారు.
తెలంగాణలో ప్రపంచస్థాయి క్రీడా మౌలిక వసతుల ఏర్పాటుకు పెట్టుబడులు పెట్టి రాష్ట్ర ప్రభుత్వంతో భాగస్వాములు కావాలని జీఎంఆర్ ప్రతినిధులను సీఎం ఆహ్వానించారు. విద్య, పరిశోధన, క్రీడా రంగాల్లో అంతర్జాతీయ సంస్థలతో భాగస్వామ్యాలు పెంచడం ద్వారా తెలంగాణను ప్రపంచస్థాయి కేంద్రంగా తీర్చిదిద్దాలన్న లక్ష్యాన్ని ప్రభుత్వం ముందుకు తీసుకెళ్తోంది.
ఇదిలా ఉండగా, లండన్లో తన పర్యటనలో భాగంగా రేవంత్ రెడ్డి ఎమిరేట్స్ స్టేడియాన్ని కూడా సందర్శించనున్నారు. ఆర్సెనల్, కోవెంట్రీ మధ్య జరిగే ఇంగ్లిష్ ప్రీమియర్ లీగ్ మ్యాచ్ను వీక్షించనున్నారు. తెలంగాణ రైజింగ్ 2047 విజన్లో భాగంగా అంతర్జాతీయ విద్యా సంస్థలు, పెట్టుబడిదారులు, క్రీడా సంస్థలతో సంబంధాలను బలోపేతం చేయడమే లక్ష్యంగా సీఎం విదేశీ పర్యటన కొనసాగుతోంది.
