- తెలంగాణలో కళాకారులకు అన్యాయమా?
- మూడేళ్లుగా పారితోషికాల కోసం ఎదురుచూపులు.
- సీఎం జోక్యం కోరుతున్న వేలాది మంది కళాకారులు
ప్రతిపక్షం బ్యూరో, ఉత్తర తెలంగాణ, ఆగస్టు 06: దేశంలో జానపద, సాంప్రదాయ, సాంస్కృతిక కళలకు నిలయంగా పేరొందిన తెలంగాణ రాష్ట్రంలోనే కళాకారులు తమకు రావాల్సిన పారితోషికాల కోసం మూడేళ్లుగా నిరీక్షించాల్సిన పరిస్థితి నెలకొనడం తీవ్ర ఆందోళనకు గురిచేస్తోంది. ప్రభుత్వ ఆధ్వర్యంలో నిర్వహించిన రాష్ట్ర, జాతీయ, జిల్లా స్థాయి అధికారిక కార్యక్రమాల్లో పాల్గొని తమ ప్రతిభను చాటిన వేలాది మంది కళాకారులకు ఇప్పటికీ బిల్లులు చెల్లించకపోవడంపై కళారంగం తీవ్ర అసంతృప్తి వ్యక్తం చేస్తోంది.రాష్ట్ర ప్రభుత్వం నిర్వహించిన పలు సాంస్కృతిక ఉత్సవాలు, జాతీయ పండుగలు, ప్రభుత్వ సంక్షేమ కార్యక్రమాలు, అవగాహన సదస్సులు, అధికారిక వేడుకల్లో జానపద, ఒగ్గుకథ, బుర్రకథ, డప్పు, కోలాటం, లంబాడి, గుస్సాడి, పెరిని, చిందు యక్షగానం, హరికథ తదితర కళారూపాల ద్వారా ప్రదర్శనలు ఇచ్చిన కళాకారులకు ఇప్పటికీ పారితోషికాలు అందలేదని కళా సంఘాలు ఆరోపిస్తున్నాయి.
కళాకారుల వర్గాల సమాచారం ప్రకారం, గత మూడు సంవత్సరాలుగా నిర్వహించిన కార్యక్రమాలకు సంబంధించిన బిల్లులు సాంస్కృతిక శాఖ ద్వారా సిద్ధం చేసి ఆర్థిక శాఖకు పంపించినప్పటికీ, అక్కడే ఫైళ్లు పెండింగ్లో ఉన్నాయని తెలుస్తోంది. బడ్జెట్కు సంబంధించిన ప్రక్రియ పూర్తయినా, ఆర్థిక శాఖ నుంచి తుది అనుమతులు రాకపోవడంతో బిల్లుల చెల్లింపులు నిలిచిపోయాయని అధికారులు చెబుతున్నట్లు కళాకారులు పేర్కొంటున్నారు.ఇటీవల సాంస్కృతిక శాఖ డైరెక్టర్ కూడా బిల్లులను ఆర్థిక శాఖకు పంపించి నెలలు గడిచినా క్లియరెన్స్ రాలేదని పేర్కొన్నట్లు సమాచారం. ఆర్థిక శాఖ అనుమతి వచ్చిన వెంటనే బటన్ నొక్కి కళాకారుల బ్యాంకు ఖాతాల్లో నిధులు జమ చేస్తామని అధికారులు హామీ ఇస్తున్నప్పటికీ, ఆ ప్రక్రియ మాత్రం ముందుకు సాగడం లేదని కళాకారులు ఆవేదన వ్యక్తం చేస్తున్నారు.
ఈ ఆలస్యం కారణంగా గ్రామీణ ప్రాంతాలకు చెందిన వేలాది మంది జానపద కళాకారులు తీవ్ర ఆర్థిక సంక్షోభాన్ని ఎదుర్కొంటున్నారు. కళనే జీవనాధారంగా నమ్ముకుని కుటుంబాలను పోషిస్తున్న అనేక మంది కళాకారులు అప్పులపాలయ్యారని, కొందరు ప్రత్యామ్నాయ ఉపాధి కోసం వలస వెళ్లాల్సిన పరిస్థితి ఏర్పడిందని కళా సంఘాల నాయకులు చెబుతున్నారు. కార్యక్రమాల్లో పాల్గొని తమ వంతు బాధ్యతను నిర్వర్తించినప్పటికీ, పారితోషికం కోసం నెలలు కాదు, సంవత్సరాల తరబడి కార్యాలయాల చుట్టూ తిరగాల్సి వస్తోందని వారు వాపోతున్నారు.కళలను పరిరక్షించడంలో, ప్రోత్సహించడంలో తెలంగాణ దేశానికే ఆదర్శంగా నిలుస్తోందని ప్రభుత్వం తరచూ చెబుతున్నప్పటికీ, ఆ కళలను సజీవంగా ఉంచుతున్న కళాకారులకే న్యాయం జరగకపోవడం బాధాకరమని పలువురు అభిప్రాయపడుతున్నారు. ఒకవైపు కళలను ప్రోత్సహించే కార్యక్రమాలు నిర్వహిస్తూ, మరోవైపు కళాకారులకు రావాల్సిన పారితోషికాలను సంవత్సరాల తరబడి నిలిపివేయడం వల్ల ప్రభుత్వంపై కళాకారుల్లో నిరాశ పెరుగుతోందని వారు పేర్కొంటున్నారు.
ఈ నేపథ్యంలో ముఖ్యమంత్రి రేవంత్ రెడ్డి స్వయంగా జోక్యం చేసుకుని పెండింగ్ బిల్లుల విడుదలకు తక్షణ చర్యలు తీసుకోవాలని, ఆర్థిక శాఖకు స్పష్టమైన ఆదేశాలు జారీ చేసి కళాకారుల ఖాతాల్లో వెంటనే బకాయిలు జమ అయ్యేలా చూడాలని తెలంగాణ వ్యాప్తంగా ఉన్న వివిధ కళా సంఘాలు, జానపద కళాకారులు, సాంస్కృతిక సంస్థలు విజ్ఞప్తి చేస్తున్నాయి.ప్రభుత్వం కళాకారుల శ్రమకు తగిన గౌరవం ఇవ్వాలంటే మాటల్లో మాత్రమే కాకుండా, వారి కష్టార్జిత పారితోషికాలను సకాలంలో చెల్లించే విధానం అమలు చేయాలని వారు కోరుతున్నారు. మూడేళ్లుగా పెండింగ్లో ఉన్న బిల్లులను అత్యవసరంగా విడుదల చేసి, భవిష్యత్తులో ఇలాంటి పరిస్థితులు పునరావృతం కాకుండా ప్రత్యేక చెల్లింపు వ్యవస్థను రూపొందించాలని కళారంగం ప్రభుత్వానికి విజ్ఞప్తి చేస్తోంది.
