ప్రతిపక్షం, జూలై 20: ప్రపంచంలో మనుషుల జోక్యం లేకుండానే ప్రకృతి తనదైన ప్రపంచాన్ని నిర్మించుకున్న ఎన్నో ప్రాంతాలు ఉన్నాయి. కెనడాలోని సేబుల్ ఐలాండ్ అలాంటి అరుదైన ప్రదేశాల్లో ఒకటి. నోవా స్కోటియా తీరానికి ఆగ్నేయంగా అట్లాంటిక్ మహాసముద్రంలో ఉన్న ఈ ఇసుక ద్వీపం.. ఒకవైపు వందలాది నౌకల ప్రమాదాలకు సాక్ష్యంగా నిలిస్తే.. మరోవైపు వందలాది అడవి గుర్రాలకు స్వేచ్ఛా నివాసంగా మారింది.
సుమారు 42 కిలోమీటర్ల పొడవు, కొన్ని ప్రాంతాల్లో 1.5 కిలోమీటర్ల కంటే తక్కువ వెడల్పు కలిగిన ఈ ద్వీపం చంద్రవంక ఆకారంలో ఉంటుంది. పూర్తిగా ఇసుకతో ఏర్పడిన ఈ ప్రాంతంలో రహదారులు, పట్టణాలు, శాశ్వత మానవ నివాసాలు లేవు. సముద్ర అలలు, బలమైన గాలులు, తుఫానుల కారణంగా ఇక్కడి ఇసుక దిబ్బలు తరచూ మారుతూ ఉంటాయి.
‘అట్లాంటిక్ స్మశానవాటిక’గా గుర్తింపు
సేబుల్ ఐలాండ్ను ‘అట్లాంటిక్ స్మశానవాటిక’గా పిలుస్తారు. దట్టమైన పొగమంచు, బలమైన సముద్ర ప్రవాహాలు, అనూహ్యంగా మారే ఇసుక దిబ్బలు, తీవ్ర తుఫానుల కారణంగా గత కొన్ని శతాబ్దాల్లో 350కు పైగా నౌకలు ప్రమాదాలకు గురైనట్లు చారిత్రక రికార్డులు చెబుతున్నాయి. ఇసుక దిబ్బలను ఢీకొని అనేక నౌకలు సముద్రంలో మునిగిపోయాయి.
అయితే అదే ప్రమాదకరమైన ప్రాంతంలో దాదాపు 500 అడవి గుర్రాలు ఎలాంటి మానవ సహాయం లేకుండా స్వేచ్ఛగా జీవిస్తున్నాయి. ద్వీపంలోని గడ్డి, మొక్కలను ఆహారంగా తీసుకునే ఈ గుర్రాలు.. వర్షపు నీటిపై ఆధారపడి తమ జీవనాన్ని కొనసాగిస్తున్నాయి.
శతాబ్దాలుగా కొనసాగుతున్న గుర్రాల జీవనం
చరిత్రకారుల అంచనా ప్రకారం.. 18వ శతాబ్దంలో యూరోపియన్ వలసవాదులు కొన్ని గుర్రాలను ఈ ద్వీపానికి తీసుకువచ్చి వదిలివేసినట్లు తెలుస్తోంది. కాలక్రమేణా అవే పెరిగి ప్రస్తుత అడవి గుర్రాల సమూహంగా మారినట్లు భావిస్తున్నారు. అయితే వాటి అసలు మూలాలపై ఇప్పటికీ పరిశోధనలు కొనసాగుతున్నాయి.
మానవ జోక్యం లేకుండా కఠినమైన వాతావరణ పరిస్థితులను తట్టుకుని ఈ గుర్రాలు తరతరాలుగా జీవిస్తుండటం శాస్త్రవేత్తలను సైతం ఆశ్చర్యపరుస్తోంది. తక్కువ వనరులతో ఎలా మనుగడ సాగిస్తున్నాయనే అంశంపై పరిశోధకులు అధ్యయనాలు చేస్తున్నారు.
సీల్స్కు కూడా ప్రధాన ఆవాసం
సేబుల్ ఐలాండ్ కేవలం అడవి గుర్రాలకు మాత్రమే నిలయం కాదు. అరుదైన పక్షి జాతులు, వివిధ రకాల మొక్కలతో పాటు భారీ సంఖ్యలో సముద్ర సీల్స్ కూడా ఇక్కడ కనిపిస్తాయి. ప్రపంచంలోని అతిపెద్ద గ్రే సీల్స్ కాలనీల్లో ఒకటి ఈ ద్వీపంలోనే ఉండటం విశేషం.
ద్వీపంలోని ప్రత్యేక జీవవైవిధ్యాన్ని కాపాడేందుకు కెనడా ప్రభుత్వం కఠిన నిబంధనలు అమలు చేస్తోంది. సాధారణ పర్యాటకులకు కూడా పరిమిత అనుమతులతోనే ప్రవేశం కల్పిస్తారు. ప్రకృతి సమతుల్యతకు ఎలాంటి నష్టం కలగకుండా ప్రత్యేక రక్షణ చర్యలు తీసుకుంటున్నారు.
వాతావరణ మార్పులు, సముద్ర మట్టం పెరుగుదల, ఇసుక ద్వీపాల పరిణామం, వన్యజీవుల అనుకూలన వంటి అంశాలపై పరిశోధనలకు సేబుల్ ఐలాండ్ ఒక సహజ ప్రయోగశాలగా మారింది. ఒకవైపు వందలాది నౌకల సమాధిగా పేరొందిన ఈ ప్రాంతం.. మరోవైపు శతాబ్దాలుగా స్వేచ్ఛగా జీవిస్తున్న అడవి గుర్రాలకు సురక్షిత ఆశ్రయంగా నిలవడం ప్రకృతి సృష్టించిన అద్భుతాల్లో ఒకటిగా నిలిచింది.
