హైదరాబాద్, ప్రతిపక్షం స్టేట్బ్యూరో: గత పదేళ్లపాటు తెలంగాణ రాజకీయాలతో పాటు పాలనను శాసించిన బీఆర్ఎస్ పార్టీ ఇబ్బందుల్లో అల్లాడిపోతోంది. రాష్ట్ర సాధన ఉద్యమం నుంచి గత ఏడాది డిసెంబర్ వరకు యావత్ దేశ రాజకీయాలనే శాసించే విధంగా ఎదిగిన బీఆర్ఎస్కు లోక్సభ ఎన్నికల సమయంలో అడుగడుగున ఇబ్బందులు వెంటాడుతున్నాయి. గత పదేళ్ల పాలనలో అంతా సాఫీగా సాగిందను కొంటున్న సమయంలో ఆ పార్టీకి చెందిన సీనియర్లు, ఎమ్మెల్యేలు, వారి కుటుంబాలకు చెందిన వ్యక్తులు భూ కబ్జాలకు పాల్పడ్డారంటూ ప్రతి నిత్యం వార్తలు వినిపిస్తున్నాయి. దీనితో పాటు గులాబిబాస్ తనయ ఎమ్మెల్సీ కవిత ఢిల్లీ మద్యం కుంబకోణంలో ఈడీ అరెస్ట్ చేయడం, ఆమెను ఇప్పట్లో ఈ కేసు నుంచి ఈడీ వదలని పరిస్థితి నెలకొంది. ఓ పక్క కేంద్ర ప్రభుత్వం ఈడీ ధర్యాప్తులు, మరో పక్క అధికారంలో ఉన్నసమయంలో ఫోన్ట్యాపింగ్కేసు రోజు రోజుకు ఓ మలుపు తిరుగుతుండడం, ఈ కేసులో ఇద్దరు మంత్రులకు నేడో రేపో సిట్ 41ఐపీసీ కింద నోటీసులు జారీ చేయాలని నిర్ణయించడంతో బీఆర్ఎస్ నేతలు ఉక్కిరి బిక్కిరి అవుతున్నారు.
అసెంబ్లీ ఎన్నికల ఓటమి నుంచి తేరుకుని లోక్సభ ఎన్నికల్లో సత్తా చాటేందుకు ఓ పక్క రెడీ అవుతుంటే, కాళ్లకు బంధాలు వేసే విధంగా ఈడీ, ఫోన్ ట్యాపింగ్, భూ కబ్జాల కేసులతో పార్టీ నేతలు బెంబెలెత్తుతున్నారు. ఈ కేసుల నుంచి ఎలా తప్పించుకోవాలని ఓ పక్క గులాబిబాస్ న్యాయనిపుణులతో సంప్రదింపులు జరుపుతున్నారు. ఎన్నికల్లో పార్టీని ఇబ్బందులకు గురిచేసేందుకు బీజేపీ, కాంగ్రెస్పార్టీలు అక్రమంగా కేసులు బనాయిస్తూ ఇబ్బందులకు గురిచేస్తున్నాయంటూ ప్రజల ముందుకు వెళ్లాలని ఆ పార్టీ నిర్ణయించింది. అయితే పార్టీకి చెందిన కీలక నేతలు, ఎమ్మెల్యేలు, మంత్రుల ఫోన్లు కూడా ట్యాపింగ్ చేసినట్లు విచారణలో వెల్లడయ్యింది. దీంతో పలువురు మాజీ మంత్రుల, టీఆర్ఎస్ ఎమ్మెల్యేలు సైతం తమ ఫోన్లు ట్యాపింగ్ చేశారా..? చేసి ఉండోచ్చన్న ఆందోళన వ్యక్తం చేస్తున్నారు. తాము రోజు వారీ కార్యక్రమాలతో పాటు కొన్నిసెటిల్మెంట్లు కూడా చేశామని, ఈ విషయం ఫోన్ ట్యాపింగ్లో దొరికితే తమపై కూడా కేసులు నమోదు అవుతాయంటూభయం పుట్టుకుంది. దీనితో పాటు ట్యానిక్ మధ్యం షాపుల అడ్డగోలు అనుమతులు, షాపుల్లో జీఎస్టీ వసూళ్లు తదితర అంశాలపై ఏసీబీ విచారణ కొనసాగుతోంది. ఈ కేసులో ప్రధాన సూత్రదారులు బయట పడాల్సి ఉందంటున్నారు. ఈ కేసులో మాజీ సీఎం కేసీఆర్ బంధువుల హస్తం ఉన్నట్లు సమాచారం.
పోన్ట్యాపింగ్లో కీలక నేతలు..
ఫోన్ట్యాపింగ్ వ్యవహారంలో తీగ లాగితే డొంక కదిలినల్లు రోజు రోజుకు కొత్త కొత్త పేర్లు వినిపిస్తున్నాయి. త్వరలోనే కీలక నేతల పేర్లు సైతం బయట పడే అవకాశం ఉండడంతో ఆ పార్టీ అధినాయకత్వం ఉక్కిరి బిక్కిరి అవుతోంది. బీఆర్ఎస్లో కొనసాగితే తమపై కూడా కేసులు తప్పవంటూ పలువురు మాజీ ఎమ్మెల్యేలతో పాటు ప్రస్తుతం గెలిచిన కొంత మంది ఎమ్మెల్యేలు పక్కచూపులు చూస్తున్నారు. ముఖ్యంగా వీరంతా కాంగ్రెస్పార్టీలో చేరాలని నిర్ణయించుకున్నారన్న వార్తలు వినిపిస్తున్నాయి. గెలిచిన ఎమ్మెల్యేలు పార్టీ వీడుతారన్న వార్తలు గుప్పుమంటుండడంతో గులాబిబాస్ ప్రత్యామ్నాయంపై ఆలోచిస్తున్నట్లు సమాచారం.
మరో పక్క బీఆర్ఎస్, బీజేపీలు ఒక్కటే అని, ఎన్నికల్లో లబ్ధిపొందేందుకు కలిసి నాటకాలకు తెరలేపారంటూ సీఎం రేవంత్రెడ్డి వ్యాఖ్యలపై కూడా పార్టీలో చర్చకు దారితీస్తున్నది. ఓ పక్క బీఆర్ఎస్ ఎమ్మెల్సీ కవితపై ఈడీ కేసు నమోదు చేసి జైలుకు పంపితే మరో పక్క బీజేపీ, బీఆర్ఎస్ దోస్తానా అన్న ఆరోపణలు ఆ పార్టీ నిద్వంధంగా ఖండించకపోవడంపై పలువురు అసంతృప్తి వ్యక్తం చేస్తున్నారు. లోక్సభ ఎన్నికల్లో కాంగ్రెస్పార్టీని తెలంగాణలో దెబ్బకొట్టేందుకు ప్రధాని నరేంద్రమోడీ ఎత్తుగడలో భాగంగానే కవిత ఆరెస్ట్ చేశారన్న వార్తలు గ్రామాలకు పాకింది.
ఆరోపణలు ఎదుర్కొంటున్న నేతలు..
భూ కబ్జా ఆరోపణలు ఎదుర్కొంటున్న నేతల్లో ఆ పార్టీ ముఖ్యనేత, రాజ్యసభ సభ్యుడు కె.కేశవరావు తనయ మేయర్ విజయలక్ష్మి, మాజీ మంత్రి మల్లారెడ్డి, రాజ్యసభ మాజీ సభ్యుడు సంతోష్కుమార్తో పాటు పలువురు నేతలున్నారు. వీరితో పాటు పలువురు బీఆర్ఎస్ నేతలు ధరణిని ఉపయోగించుకొని సర్కారు భూమిని వేల ఎకరాలు తమ పేరున పట్టా చేస్తుకున్నట్లు ఆరోపణలు వ్యక్తం అవుతున్నాయి. ముఖ్యంగా గులాబి బాస్ కేసీఆర్ అన్న కుమారుడు కన్నారావు వేల ఎకరాల భూములను కబ్జా చేసినట్లు కాంగ్రెస్ ప్రభుత్వం గుర్తించింది.
ఈయన గతంలో బీఆర్ఎస్ మంత్రులనే బెదిరించిన వీడియోలు ప్రస్తుతం సోషల్ మీడియాలో చక్కర్లు కొడుతున్నాయి. ఇటీవల కాంగ్రెస్లో చేరిన ఖైరతాబాద్ ఎమ్మెల్యే దానం నాగేందర్పై కూడా భూ కబ్జా ఆరోపణలు వచ్చిన విషయం తెలిసిందే!. ఈ కేసుల నుంచి బయటపడేదెప్పుడంటూ పార్టీ ముఖ్యనేతలు సైతం ఆందోళన వ్యక్తం చేస్తున్నారు. ఏదీ ఏమైనప్పటికి లోక్సభ ఎన్నికల ప్రచారంలోనూ ఇబ్బందులు తప్పవన్న ఆందోళన వ్యక్తం అవుతోంది. వీటన్నింటిని అధిగమించి లోక్సభ ఎన్నికల్లో అభ్యర్థుల గెలుపు కోసం గులాబిబాస్ ఎలాంటి వ్యూహాన్ని రచిస్తారో వేచిచూడాల్సిందే మరీ!
