డిజిటల్ పేమెంట్ ద్వారా టికెట్ కొనుగోలు..
ప్రతిపక్షం, స్టేట్బ్యూరో హైదరాబాద్, మార్చి 21: అన్ రిజర్వ్డ్ రైల్వే టికెట్ల కొనుగోలును దక్షిణమధ్య రైల్వే మరింత సులభతరం చేసింది. క్యూఆర్ కోడ్ ద్వారా టికెట్లు కొనుగోలు చేసే సదుపాయాన్ని అందుబాటులోకి తెచ్చింది. ఫోన్ పే, గూగుల్ పే తదితర పేమెంట్ యాప్ ల సహాయంతో టికెట్లను కొనుగోలు చేసే విధానాన్ని దక్షిణమధ్య రైల్వే ప్రవేశపెట్టింది. తొలిదశలో సికింద్రాబాద్ డివిజన్ పరిధిలోని 14 స్టేషన్లలోని 31 కౌంటర్లలో ఈ సౌకర్యం ప్రవేశపెట్టింది. వ్యాపార సౌలభ్యాన్ని మెరుగుపరుచుకోవడంతోపాటు నగదు లావాదేవీల సౌలభ్యాన్ని సులభతరం చేయడానికి దక్షిణమధ్య రైల్వే డిజిటల్ చెల్లింపులను ప్రోత్సహిస్తున్నది.
అదేవిధంగా టికెట్లకు సరిపడా చిల్లర సమస్య తలెత్తకుండా ఉండటానికి ఈ నిర్ణయం తీసుకున్నది. కొత్తగా శ్రీకారం చుట్టిన ఈ విధానంలో కౌంటర్ల వద్ద ప్రయాణీకుల గమ్యస్థానాలతో కూడిన చార్జీల వివరాలు ఉంచబడుతాయి. ఇందులో బయలుదేరే స్టేషన్, చేరుకునే స్టేషన్, ప్రయాణపు తరగతి వివరాలు, పెద్దలు లేదా పిల్లలు,టికెట్ల సంఖ్య తెలిపే వివరాల చార్జీలు ఉంటాయి. వీటితోపాటు క్యూ ఆర్ కోడ్ కూడా డిస్ ప్లే బోర్డులో కనిపిస్తుంది. ప్రయాణీకులు తమ మొబైల్ ఫోన్లో ఉన్న పేమెంట్ యాప్ ద్వారా దీనిని స్కాన్ చేసి, చార్జి చెల్లించిన వెంటనే టికెట్ జనరేట్ అవుతుంది. తొలిదశలో భాగంగా సికింద్రాబాద్ డివిజన్ లోని సికింద్రాబాద్, హైదరాబాద్, కాజీపేట, బేగంపేట, వరంగల్, మంచిర్యాల, లింగంపల్లి, హైటెక్ సిటి, జేమ్స్స్ట్రీట్, మహబూబాబాద్, బెల్లంపల్లి, సిర్పూర్ కాగజ్ నగర్, వికారాబాద్ స్టేషన్లలో క్యూ ఆర్ కోడ్ ద్వారా అన్ రిజర్వ్ డ్ టికెట్లు కొనుగోలు చేసే సదుపాయం కల్పించారు.
