ప్రతిపక్షం, ఆగస్టు 27: జీ గ్రూప్ వ్యవస్థాపకుడు సుభాష్ చంద్రకు సంబంధించిన రూ.22 వేల కోట్లకు పైగా ఉన్న దివాలా వ్యవహారంపై విజయ్ మాల్యా చేసిన వ్యాఖ్యలు చర్చనీయాంశంగా మారాయి. ఈ కేసును కేవలం రూ.6.5 కోట్లు చెల్లించి పరిష్కరించుకునేందుకు జాతీయ కంపెనీ లా ట్రైబ్యునల్ అనుమతించిందన్న వార్తలపై మాల్యా స్పందించారు.
సామాజిక మాధ్యమ వేదిక ఎక్స్లో స్పందించిన మాల్యా.. ఈ వార్త నిజమైతే సుభాష్ చంద్రను అభినందించాల్సిందేనని వ్యాఖ్యానించారు. అయితే రుణాల వసూళ్ల విషయంలో తనకు, ఇతరులకు మధ్య వ్యవస్థ సమానంగా వ్యవహరించలేదని అసంతృప్తి వ్యక్తం చేశారు.
తాను తీసుకున్న సుమారు రూ.6,203 కోట్ల రుణానికి సంబంధించి తన నుంచి రూ.14,100 కోట్లను వసూలు చేశారని మాల్యా పేర్కొన్నారు. అదే సమయంలో భారీ మొత్తాల్లో రుణాలు తీసుకున్న పలువురు వ్యక్తులు తక్కువ మొత్తాలు చెల్లించి తమ సమస్యలను పరిష్కరించుకున్నారని ఆయన వ్యాఖ్యానించారు.
భారత్లో రుణాల రికవరీ వ్యవస్థలో సమానత్వం లేదని మాల్యా ఆరోపించారు. రుణాల వసూళ్ల విషయంలో అందరికీ ఒకే విధమైన నిబంధనలు, ప్రమాణాలు వర్తించాల్సిన అవసరం ఉందని ఆయన అభిప్రాయపడ్డారు. ఈ వ్యవహారంపై మీడియా కూడా తగిన స్థాయిలో ప్రశ్నలు సంధించడం లేదని విమర్శించారు.
అయితే సుభాష్ చంద్రకు సంబంధించిన దివాలా పరిష్కారంలో అసలు మొత్తం ఎంత, పరిష్కార నిబంధనలు ఏమిటి, ఏ ఆస్తులు లేదా బకాయిలు ఇందులో భాగమయ్యాయి అనే అంశాలపై పూర్తి వివరాలు వెలువడాల్సి ఉంది. ఈ నేపథ్యంలో మాల్యా చేసిన వ్యాఖ్యలు మరోసారి దేశంలో రుణాల వసూళ్లు, దివాలా పరిష్కార ప్రక్రియపై చర్చకు దారితీశాయి.
