ప్రతిపక్షం, ఆగస్టు 27: రవితేజ నటించిన ‘ఇరుముడి’ సినిమాను వివాదాలు వెంటాడుతున్నాయి. చిత్రంలో ప్రభుత్వ పాఠశాల, ఉపాధ్యాయుడి పాత్రను చూపించిన తీరుపై ఉపాధ్యాయ సంఘాలు అభ్యంతరం వ్యక్తం చేస్తున్నాయి. ప్రభుత్వ పాఠశాల ఉపాధ్యాయుడిని ప్రతికూలంగా, క్రూరమైన వ్యక్తిగా చిత్రీకరించడం సరికాదని సంఘాల ప్రతినిధులు పేర్కొంటున్నారు.
ఇప్పటికే ఏపీటీఎఫ్ సినిమా సన్నివేశాలపై అభ్యంతరం వ్యక్తం చేయగా.. తాజాగా యూటీఎఫ్ కూడా నిరసన తెలిపింది. సినిమాలో ప్రభుత్వ పాఠశాల వాతావరణం, విద్యార్థుల దుస్తులు, ఉపాధ్యాయుడి పాత్రను చూపించిన విధానం సమాజంలో ప్రభుత్వ ఉపాధ్యాయులపై తప్పుడు అభిప్రాయం కలిగించేలా ఉందని ఆ సంఘం పేర్కొంది.
లక్షలాది మంది ప్రభుత్వ ఉపాధ్యాయులు విద్యార్థులకు విద్యను అందించేందుకు పనిచేస్తున్నారని, వారిని కించపరిచేలా పాత్రలను చిత్రీకరించడం సరికాదని యూటీఎఫ్ నాయకులు అభిప్రాయపడ్డారు. ఇలాంటి సన్నివేశాల వల్ల ఉపాధ్యాయుల ఆత్మగౌరవంతో పాటు ప్రభుత్వ పాఠశాలల్లో చదువుతున్న విద్యార్థుల గౌరవం కూడా దెబ్బతింటుందని విమర్శించారు.
సినిమా స్వేచ్ఛ పేరుతో ఒక వృత్తి లేదా వర్గాన్ని అవమానించేలా చిత్రీకరణ చేయకూడదని ఉపాధ్యాయ సంఘాలు స్పష్టం చేశాయి. వివాదాస్పదంగా ఉన్న సన్నివేశాలను వెంటనే తొలగించాలని, చిత్రబృందం ఈ అంశంపై స్పందించాలని డిమాండ్ చేశాయి.
ఈ వివాదం నేపథ్యంలో ‘ఇరుముడి’ చిత్రబృందం ఎలాంటి నిర్ణయం తీసుకుంటుందనేది ఆసక్తికరంగా మారింది. సినిమా విడుదల తర్వాత ఉపాధ్యాయ సంఘాల నుంచి వరుసగా అభ్యంతరాలు వ్యక్తమవుతుండటంతో ఈ అంశంపై మరింత చర్చ జరిగే అవకాశం కనిపిస్తోంది.
