ప్రతిపక్షం, నవంబర్ 18: దేశంలోని విమానాశ్రయాల్లో భద్రతా విధుల నిర్వహణలో కీలక మార్పులు తీసుకురావాలని కేంద్ర ప్రభుత్వం యోచిస్తున్నట్లు తెలుస్తోంది. విమానాశ్రయాల్లో ప్రస్తుతం విధులు నిర్వహిస్తున్న కేంద్ర పారిశ్రామిక భద్రతా దళం (సీఐఎస్ఎఫ్) సిబ్బంది సంఖ్యను తగ్గించి, కొన్ని సాధారణ భద్రతా విధులకు ప్రైవేటు భద్రతా సిబ్బందిని నియమించే దిశగా అడుగులు వేస్తున్నట్లు సమాచారం. ఈ విషయాన్ని ప్రభుత్వ వర్గాలను ఉటంకిస్తూ ఎన్డీటీవీ వెల్లడించినట్లు తెలుస్తోంది.
ప్రస్తుతం విమానాశ్రయాల్లో భద్రతకు సంబంధించిన పలు బాధ్యతలను సీఐఎస్ఎఫ్ సిబ్బంది నిర్వహిస్తున్నారు. అయితే ఇకపై ఆయుధాలు అవసరం లేని సాధారణ విధులు, ఇతర సహాయక భద్రతా పనులను ప్రైవేటు భద్రతా సిబ్బందికి అప్పగించే అవకాశం ఉంది. విమానాశ్రయాల వద్ద అత్యంత కీలకమైన భద్రతా బాధ్యతలు, సున్నితమైన ప్రాంతాల పర్యవేక్షణ, ఉగ్రవాద ముప్పులను ఎదుర్కొనే విధులు మాత్రం సీఐఎస్ఎఫ్ ఆధీనంలోనే కొనసాగనున్నట్లు సమాచారం. అంటే సీఐఎస్ఎఫ్ను పూర్తిగా తప్పించడం కాకుండా, దాని సిబ్బందిని మరింత కీలకమైన భద్రతా విధులపై కేంద్రీకరించాలన్నది ఈ ప్రతిపాదన వెనుక ఉద్దేశంగా కనిపిస్తోంది.
ఈ మార్పు వెనుక విమానాశ్రయాల నిర్వహణ వ్యయాన్ని తగ్గించాలన్న ఉద్దేశం ఉన్నట్లు సమాచారం. సీఐఎస్ఎఫ్ సిబ్బంది నియామకం, నిర్వహణకు అయ్యే ఖర్చు ఎక్కువగా ఉండటంతో ఆర్థిక భారం తగ్గించాలని విమానాశ్రయాల నిర్వాహకులు ప్రభుత్వాన్ని కోరినట్లు నివేదికలు పేర్కొంటున్నాయి. ఈ ఖర్చు ప్రయాణికులపై అదనపు భారం కాకుండా చూడాలన్న ఆలోచన కూడా ఈ ప్రతిపాదనలో ఉన్నట్లు తెలుస్తోంది.
బ్యూరో ఆఫ్ సివిల్ ఏవియేషన్ సెక్యూరిటీ (బీసీఏఎస్) కొత్త భద్రతా మార్గదర్శకాలను రూపొందించినట్లు, వాటి ప్రకారం విమానాశ్రయాల్లో సిబ్బంది అవసరాలను సమీక్షించి దశలవారీగా మార్పులు చేపట్టనున్నట్లు వార్తా కథనాలు వెల్లడించాయి. విమానాశ్రయం ఉన్న ప్రాంతం, ప్రయాణికుల రద్దీ, విమానాల రాకపోకలు, భద్రతా అవసరాలను బట్టి సిబ్బంది సంఖ్యను నిర్ణయించనున్నారు. ప్రైవేటు భద్రతా సిబ్బందికి అవసరమైన శిక్షణ ఇచ్చిన తర్వాతే విధుల్లోకి తీసుకునే అవకాశం ఉంది.
ప్రస్తుతం దేశంలోని మొత్తం 119 విమానాశ్రయాల్లో 74 విమానాశ్రయాలకు సీఐఎస్ఎఫ్ భద్రత కల్పిస్తుండగా, మిగిలిన 45 విమానాశ్రయాల్లో రాష్ట్ర పోలీసు సిబ్బంది భద్రతా విధులు నిర్వహిస్తున్నారు. కొత్త మార్గదర్శకాలు అమల్లోకి వస్తే విమానాశ్రయాల్లో భద్రతా సిబ్బంది విధుల విభజనలో మార్పులు చోటుచేసుకోనున్నాయి. అయితే సీఐఎస్ఎఫ్ సిబ్బందిని విమానాశ్రయాల నుంచి తగ్గించినంత మాత్రాన ఉద్యోగాల కోత ఉండదని, అవసరమైన ఇతర విభాగాలకు వారిని బదిలీ చేసే అవకాశం ఉందని నివేదికలు పేర్కొంటున్నాయి. ఈ ప్రతిపాదనకు సంబంధించిన తుది ఆమోదం, విమానాశ్రయాల వారీగా సిబ్బంది సంఖ్యపై స్పష్టత రావాల్సి ఉంది.




























