ప్రతిపక్షం, నవంబర్ 12: మనిషి జీవితంలో సంతోషం, బాధ, ఆందోళన, భయం వంటి భావాలు సహజం. అయితే కొన్నిసార్లు మనసులో పదేపదే ప్రతికూల ఆలోచనలు రావడం వల్ల ప్రశాంతత దెబ్బతింటుంది. చిన్న విషయాలకే ఎక్కువగా ఆలోచించడం, భవిష్యత్తులో ఏదైనా చెడు జరుగుతుందేమోనని ఆందోళన చెందడం, ఇతరులతో తమ జీవితాన్ని పోల్చుకోవడం వంటి అలవాట్లు మానసిక ఒత్తిడిని పెంచుతాయి. ఇలాంటి ఆలోచనల నుంచి బయటపడటానికి కొన్ని చిన్న చిన్న మార్పులు చేసుకోవాలని నిపుణులు సూచిస్తున్నారు. ముఖ్యంగా ప్రతికూల ఆలోచన వచ్చిన వెంటనే దానిని నిజమని నమ్మకుండా, అది కేవలం మనసులో కలిగిన ఒక ఆలోచన మాత్రమేనని గుర్తించాలి. ప్రతి ఆలోచన వాస్తవం కాకపోవచ్చనే విషయాన్ని అర్థం చేసుకుంటే అనవసరమైన భయాలు, ఆందోళనలను కొంతవరకు తగ్గించుకోవచ్చు.
అలాగే భవిష్యత్తులో ఏం జరుగుతుందోనని పదేపదే ఆలోచిస్తూ సమయాన్ని వృథా చేసుకోకుండా, ప్రస్తుతం చేయాల్సిన పనులపై దృష్టి పెట్టాలి. రేపటి గురించి అతిగా ఆలోచించడం వల్ల ఈరోజు చేయాల్సిన పనులపై ఏకాగ్రత తగ్గుతుంది. అందుకే ఒక్కో పనిని ప్రణాళిక ప్రకారం పూర్తి చేసుకుంటూ ముందుకు సాగడం మంచిది. ఇతరులతో తమ జీవితాన్ని పోల్చుకోవడం కూడా ప్రతికూల ఆలోచనలకు ఒక కారణంగా మారుతుంది. ప్రతి ఒక్కరి జీవితం, పరిస్థితులు, లక్ష్యాలు వేర్వేరుగా ఉంటాయి. ఇతరులు సాధించిన విజయాలను చూసి తమను తాము తక్కువగా భావించకుండా, నిన్నటి కంటే ఈరోజు కొంత మెరుగ్గా ఉండేందుకు ప్రయత్నించాలి.
శారీరక ఆరోగ్యంపై శ్రద్ధ పెట్టడం కూడా మానసిక ప్రశాంతతకు ఎంతో ఉపయోగపడుతుంది. ప్రతిరోజూ కనీసం 30 నిమిషాల పాటు నడక, వ్యాయామం చేయడం అలవాటు చేసుకోవాలి. శారీరక శ్రమ వల్ల ఒత్తిడి తగ్గడానికి, మానసిక స్థితి మెరుగుపడటానికి సహాయపడుతుంది. అలాగే ఒంటరిగా కూర్చొని అనవసరమైన ఆలోచనల్లో మునిగిపోకుండా కుటుంబ సభ్యులు, స్నేహితులు, మనకు ఇష్టమైన వారితో మాట్లాడాలి. మనసులో ఉన్న బాధలను, ఆందోళనలను నమ్మకమైన వ్యక్తులతో పంచుకోవడం వల్ల కొంత ఉపశమనం లభిస్తుంది. మనకు ఇష్టమైన పనులు చేయడం, సంగీతం వినడం, పుస్తకాలు చదవడం వంటి అలవాట్లు కూడా మనసును ప్రశాంతంగా ఉంచేందుకు దోహదపడతాయి.
మరో ముఖ్యమైన విషయం నిద్ర. సరైన నిద్ర లేకపోతే అలసట, చిరాకు, ఏకాగ్రత లోపం, ఆందోళన వంటి సమస్యలు పెరిగే అవకాశం ఉంటుంది. అందుకే ప్రతిరోజూ నిర్ణీత సమయంలో నిద్రపోవడం, తగినంత విశ్రాంతి తీసుకోవడం అవసరం. నిద్రకు ముందు మొబైల్ ఫోన్ వినియోగాన్ని తగ్గించడం, ప్రశాంతమైన వాతావరణంలో ఉండటం మంచిది. ప్రతికూల ఆలోచనలు నిరంతరం వేధిస్తూ రోజువారీ జీవితాన్ని ప్రభావితం చేస్తుంటే మానసిక ఆరోగ్య నిపుణుల సలహా తీసుకోవడం కూడా మంచిది. చిన్న చిన్న మంచి అలవాట్లను క్రమం తప్పకుండా పాటిస్తే మనసును ఆరోగ్యంగా ఉంచుకోవడంతో పాటు జీవితాన్ని మరింత సానుకూల దృక్పథంతో ముందుకు తీసుకెళ్లవచ్చు.
