ప్రతిపక్షం, నవంబర్ 11: విద్యార్థుల భవిష్యత్తుకు పునాదులుగా నిలవాల్సిన పాఠశాలలు, కళాశాలలను వాణిజ్య ప్రయోజనాలకు వేదికలుగా మార్చకుండా చర్యలు తీసుకోవాలని తెలంగాణ ప్రభుత్వం భావిస్తోంది. విద్యా సంస్థల ప్రాంగణాల్లో సినిమా ప్రమోషన్లు, ఇతర ప్రైవేటు వాణిజ్య కార్యక్రమాల నిర్వహణపై నిషేధం విధించే దిశగా కసరత్తు చేస్తున్నట్లు సమాచారం. ఈ మేరకు త్వరలోనే సమగ్ర మార్గదర్శకాలు విడుదల చేసే అవకాశం ఉన్నట్లు తెలుస్తోంది. ఇటీవల కొన్ని విద్యా సంస్థల్లో చోటుచేసుకుంటున్న పరిణామాలు తల్లిదండ్రులు, విద్యావేత్తల్లో ఆందోళన కలిగిస్తున్న నేపథ్యంలో ప్రభుత్వం ఈ అంశంపై దృష్టి సారించినట్లు సమాచారం.
సినిమాల ప్రచారం కోసం విద్యార్థులను కార్యక్రమాల్లో భాగస్వాములను చేయడం, సినిమా వీక్షణ కోసం ప్రత్యేకంగా సెలవులు ప్రకటించడం వంటి చర్యలపై విమర్శలు వ్యక్తమవుతున్నాయి. విద్యార్థులు చదువుపై దృష్టి పెట్టాల్సిన సమయంలో వారిని సినిమా ప్రచార కార్యక్రమాలకు ఉపయోగించుకోవడం ఎంతవరకు సమంజసమనే ప్రశ్నలు తలెత్తుతున్నాయి. మరోవైపు విద్యా సంస్థల ప్రాంగణాల్లో భారీ కార్యక్రమాలు నిర్వహించే సమయంలో తగిన భద్రతా ఏర్పాట్లు చేయకపోవడం కూడా ఆందోళనకు కారణమవుతోంది. ఇటీవల ఓ విద్యా సంస్థలో కార్యక్రమం సందర్భంగా వేదిక కూలి ఒక విద్యార్థిని మృతి చెందడం, పలువురు గాయపడటం ఈ అంశాన్ని మరోసారి చర్చకు తీసుకొచ్చింది. ఇలాంటి ఘటనలు పునరావృతం కాకుండా విద్యార్థుల భద్రతకు ప్రాధాన్యత ఇవ్వాలని ప్రభుత్వం భావిస్తున్నట్లు తెలుస్తోంది.
ప్రభుత్వం ప్రతిపాదిస్తున్న మార్గదర్శకాల ప్రకారం విద్యా సంస్థల ప్రాంగణాలను ప్రధానంగా విద్యా, క్రీడా కార్యక్రమాల నిర్వహణకే వినియోగించాల్సి ఉంటుంది. సినిమా ప్రమోషన్లు, ఇతర ప్రైవేటు వాణిజ్య కార్యక్రమాలకు క్యాంపస్‌లను వేదికలుగా ఉపయోగించడంపై ఆంక్షలు విధించే అవకాశం ఉంది. అయితే విద్యార్థుల్లోని ప్రతిభను వెలికితీసే చిన్నస్థాయి సాంస్కృతిక, కళా కార్యక్రమాలకు అనుమతి ఇచ్చే అంశాన్ని కూడా పరిశీలిస్తున్నట్లు సమాచారం. విద్యార్థుల సృజనాత్మకత, నైపుణ్యాలను ప్రోత్సహించే కార్యక్రమాలకు ఆటంకం కలగకుండా, వాణిజ్య ప్రయోజనాల కోసం విద్యా సంస్థలను ఉపయోగించకుండా నిబంధనలు రూపొందించాలని అధికారులు భావిస్తున్నట్లు తెలుస్తోంది.
అలాగే వందలాది మంది పాల్గొనే విద్యా, క్రీడా, సాంస్కృతిక కార్యక్రమాల నిర్వహణకు ముందస్తు భద్రతా చర్యలు తప్పనిసరి చేసే అవకాశం ఉంది. కార్యక్రమానికి హాజరయ్యే వారి సంఖ్య, వేదిక నిర్మాణ పటిష్టత, విద్యార్థుల రాకపోకలకు సంబంధించిన ఏర్పాట్లు, అగ్నిమాపక భద్రత వంటి అంశాలను ముందుగానే పరిశీలించాల్సి ఉంటుంది. అవసరమైన వివరాలను స్థానిక విద్యాశాఖ అధికారులు, పోలీసులకు సమర్పించేలా నిబంధనలు రూపొందించనున్నట్లు సమాచారం. ప్రభుత్వ మార్గదర్శకాలను ఉల్లంఘించే విద్యా సంస్థలపై ఎలాంటి చర్యలు తీసుకోవాలనే అంశాన్ని కూడా నిబంధనల్లో పొందుపరిచే అవకాశం ఉంది.
మరోవైపు తెలంగాణలో విద్యార్థులను నైపుణ్యాలు, ఆవిష్కరణలు, ఉపాధి రంగాల్లో ప్రోత్సహించేందుకు ప్రభుత్వం యంగ్ ఇండియా స్కిల్స్ యూనివర్సిటీ, అడ్వాన్స్‌డ్ టెక్నాలజీ సెంటర్లు, గూగుల్ ఫర్ స్టార్టప్స్, ఏఐ ఇన్నోవేషన్ హబ్ వంటి కార్యక్రమాలను చేపడుతోంది. కళలు, సంస్కృతిని ప్రోత్సహించే లక్ష్యంతో గద్దర్ ఫిల్మ్ అవార్డులు, యంగ్ ఇండియా ఫిల్మ్ మేకర్ ఛాలెంజ్ వంటి కార్యక్రమాలనూ నిర్వహిస్తోంది. అయితే కొన్ని విద్యా సంస్థలు విద్యార్థులను సినిమా ప్రచార కార్యక్రమాల్లో భాగస్వాములను చేయడం, సినిమా వీక్షణ కోసం సెలవులు ప్రకటించడం వంటి అంశాలపై ప్రభుత్వం అసంతృప్తితో ఉన్నట్లు కథనాలు వెలువడుతున్నాయి. ఈ నేపథ్యంలో విద్యా సంస్థల ప్రాంగణాల వినియోగం, విద్యార్థుల భద్రతకు సంబంధించి స్పష్టమైన నిబంధనలు రూపొందించాలని విద్యాశాఖ అధికారులను ఆదేశించినట్లు సమాచారం. అయితే ఈ మార్గదర్శకాలు ఇంకా అధికారికంగా విడుదల కాలేదు. ప్రభుత్వం నుంచి ఉత్తర్వులు వెలువడిన తర్వాతే నిషేధం పరిధి, మినహాయింపులు, అమలు విధానంపై పూర్తి స్పష్టత రానుంది.
