ప్రతిపక్షం, నవంబర్ 03: జియో ఐపీఓతో వ్యాపార రంగంలో మరింత దూకుడు ప్రదర్శిస్తున్న రిలయన్స్ ఇండస్ట్రీస్ తాజాగా ఎఫ్‌ఎంసీజీ (వినియోగ వస్తువుల) విభాగంపై ప్రత్యేకంగా దృష్టి సారించింది. ఇప్పటికే పలు రంగాల్లో తన వ్యాపారాన్ని విస్తరించిన సంస్థ ఇప్పుడు బిస్కెట్ల మార్కెట్‌లోకి అడుగుపెట్టింది. ఇందులో భాగంగా రిలయన్స్ కన్జ్యూమర్ ప్రొడక్ట్స్ ద్వారా తొమ్మిది రకాల బిస్కెట్ ఉత్పత్తులను మార్కెట్‌లోకి విడుదల చేసింది. పవర్ అప్, బటర్ బ్లిస్ వంటి పేర్లతో కొత్త ఉత్పత్తులను అందుబాటులోకి తీసుకొచ్చింది. విభిన్న రుచులు, ప్యాక్ సైజులతో వినియోగదారులను ఆకర్షించడమే లక్ష్యంగా ఈ బిస్కెట్లను రూపొందించింది.
కొత్తగా విడుదల చేసిన బిస్కెట్ల ధరలను సామాన్య వినియోగదారులకు అందుబాటులో ఉండేలా నిర్ణయించినట్లు తెలుస్తోంది. ప్యాకెట్ పరిమాణాన్ని బట్టి కనీస ధర రూ.5 నుంచి గరిష్ఠంగా రూ.125 వరకు ఉండనుంది. తక్కువ ధరలో లభించే చిన్న ప్యాకెట్ల నుంచి పెద్ద కుటుంబ ప్యాకెట్ల వరకు వివిధ రకాల ఎంపికలను అందుబాటులోకి తీసుకురావడం ద్వారా అన్ని వర్గాల వినియోగదారులకు చేరువ కావాలని రిలయన్స్ భావిస్తోంది. ఇప్పటికే దేశీయంగా బిస్కెట్ల మార్కెట్‌లో బలమైన స్థానాన్ని సంపాదించుకున్న ప్రముఖ కంపెనీలకు ఈ కొత్త ప్రవేశంతో పోటీ పెరిగే అవకాశం ఉంది.
మరోవైపు తన ఉత్పత్తులకు మరింత ప్రచారం కల్పించేందుకు రిలయన్స్ ప్రత్యేక మార్కెటింగ్ వ్యూహాలను కూడా అనుసరిస్తోంది. ఇందులో భాగంగా తమిళ స్టార్ హీరో అజిత్‌కు చెందిన రేసింగ్ టీమ్‌తో ఒప్పందం కుదుర్చుకుంది. ఈ భాగస్వామ్యం ద్వారా యువతతో పాటు క్రీడాభిమానులకు తన బ్రాండ్‌ను మరింత చేరువ చేయాలని సంస్థ ప్రణాళికలు రూపొందిస్తోంది. జియో, రిటైల్, ఎఫ్‌ఎంసీజీ వంటి విభాగాల్లో వ్యాపారాన్ని విస్తరిస్తున్న రిలయన్స్ తాజాగా బిస్కెట్ల రంగంలోకి ప్రవేశించడం దేశీయ వినియోగ వస్తువుల మార్కెట్‌లో ఆసక్తికర పరిణామంగా మారింది.
