ప్రతిపక్షం, అక్టోబర్ 31: శబరిమల అయ్యప్ప స్వామి దర్శనానికి వెళ్లే భక్తులకు ట్రావన్‌కోర్ దేవస్థానం బోర్డు శుభవార్త అందించింది. అయ్యప్ప స్వామి దర్శనం కోసం వచ్చే యాత్రికులకు రూ.2 లక్షల జీవిత బీమా సౌకర్యాన్ని కల్పించాలని నిర్ణయించింది. యాత్ర సమయంలో అనుకోని ప్రమాదాలు లేదా ఇతర కారణాలతో భక్తులు ప్రాణాలు కోల్పోతే వారి కుటుంబాలకు ఆర్థిక భరోసా కల్పించాలనే ఉద్దేశంతో ఈ పథకాన్ని తీసుకొచ్చింది. భారత జీవిత బీమా సంస్థ (ఎల్‌ఐసీ) సహకారంతో ఈ బీమా పథకాన్ని అమలు చేయనున్నారు. ఈ పథకం ద్వారా శబరిమల యాత్రకు వెళ్లే భక్తులకు భద్రతతో పాటు, ఏదైనా అనుకోని ఘటన జరిగితే వారి కుటుంబాలకు ఆర్థికంగా అండ లభించనుంది.
ఈ కొత్త పథకం ప్రకారం శబరిమల యాత్ర సమయంలో భక్తుడు మరణిస్తే, ఆయన కుటుంబానికి లేదా ముందుగా నామినీగా పేర్కొన్న వ్యక్తికి రూ.2 లక్షల బీమా పరిహారం అందుతుంది. ముఖ్యంగా యాత్రికుల కుటుంబాలు అకస్మాత్తుగా ఎదురయ్యే ఆర్థిక ఇబ్బందులను కొంతవరకు అధిగమించేందుకు ఈ నిర్ణయం ఉపయోగపడుతుందని దేవస్థానం బోర్డు భావిస్తోంది. ఇప్పటివరకు భక్తులకు ప్రమాద బీమా సౌకర్యం మాత్రమే అందుబాటులో ఉండగా, తాజాగా జీవిత బీమా పథకాన్ని కూడా ప్రవేశపెట్టడం ప్రత్యేకతగా నిలుస్తోంది. శబరిమల చరిత్రలో యాత్రికుల కోసం జీవిత బీమా సౌకర్యాన్ని అమలు చేయడం ఇదే తొలిసారి కావడం గమనార్హం.
ఈ బీమా పథకానికి సంబంధించిన ప్రీమియం మొత్తాన్ని భక్తుల నుంచి వసూలు చేయకుండా ట్రావన్‌కోర్ దేవస్థానం బోర్డే చెల్లించనుంది. దీంతో యాత్రికులపై ఎలాంటి అదనపు ఆర్థిక భారం పడకుండా బీమా ప్రయోజనం అందనుంది. శబరిమల దర్శనం కోసం ఆన్‌లైన్‌లో వర్చువల్ క్యూ బుకింగ్ చేసుకునే సమయంలోనే భక్తుల వ్యక్తిగత వివరాలతో పాటు వారి నామినీ వివరాలను కూడా సేకరించనున్నారు. ఈ వివరాల ఆధారంగా బీమా సౌకర్యాన్ని వర్తింపజేయనున్నారు.
ప్రతి ఏడాది లక్షలాది మంది భక్తులు అయ్యప్ప స్వామి దర్శనం కోసం శబరిమలకు తరలివస్తుంటారు. కఠినమైన నియమాలు పాటిస్తూ, ఇరుముడితో కొండపైకి వెళ్లే భక్తులు ప్రయాణంలో అనేక ఇబ్బందులు ఎదుర్కొంటుంటారు. ముఖ్యంగా రద్దీ, కొండ మార్గాలు, దీర్ఘ ప్రయాణం వంటి పరిస్థితుల్లో అనుకోని ప్రమాదాలు చోటుచేసుకునే అవకాశం ఉంటుంది. ఇలాంటి సందర్భాల్లో భక్తుల కుటుంబాలకు ఆర్థిక భరోసా కల్పించేందుకు ఈ నిర్ణయం తీసుకున్నట్లు తెలుస్తోంది. దేవస్థానం బోర్డు తీసుకున్న ఈ నిర్ణయం శబరిమల యాత్రకు వచ్చే భక్తులకు అదనపు భద్రత కల్పించడంతో పాటు, వారి కుటుంబాలకు కష్టకాలంలో అండగా నిలవనుంది.
