ప్రతిపక్షం, ఆగస్టు 05: లోక్సభ ప్రతిపక్ష నాయకుడు రాహుల్ గాంధీ ప్రధాని నరేంద్ర మోదీపై తీవ్ర ఆరోపణలు చేశారు. ఢిల్లీలో విద్యార్థులతో కలిసి నిర్వహించిన మీడియా సమావేశంలో మాట్లాడుతూ, పదిహేనేళ్ల బాలికతో ప్రధాని మోదీ బలవంతంగా క్షమాపణ చెప్పించుకున్నారని విమర్శించారు. గూండాలను వారి ఇళ్లకు పంపించి ఒత్తిడి తెచ్చి క్షమాపణలు చెప్పించే పరిస్థితి తీసుకొచ్చారని ఆరోపించారు.
ఈ వ్యవహారాన్ని తీవ్రంగా ఖండించిన రాహుల్ గాంధీ, “ఇదంతా పూర్తిగా అర్థరహితం” అని వ్యాఖ్యానించారు. తమ అభిప్రాయాలను వ్యక్తం చేసినందుకు విద్యార్థులు ఎవరికీ క్షమాపణ చెప్పాల్సిన అవసరం లేదని స్పష్టం చేశారు. ప్రజాస్వామ్యంలో భిన్నాభిప్రాయాలను వ్యక్తపరచడం ప్రతి పౌరుడి హక్కు అని పేర్కొన్నారు.
విద్యార్థులపై ఒత్తిడి తీసుకురావడం సరైన విధానం కాదని రాహుల్ అన్నారు. ప్రభుత్వానికి వ్యతిరేకంగా మాట్లాడిన వారిని భయపెట్టే ప్రయత్నాలు జరుగుతున్నాయని ఆరోపించారు. యువత గొంతును అణిచివేయడం ప్రజాస్వామ్య స్ఫూర్తికి విరుద్ధమని పేర్కొన్నారు.
ఈ సందర్భంగా ప్రధాని మోదీతో పాటు కేంద్ర హోంమంత్రి అమిత్ షాపైనా రాహుల్ విమర్శలు గుప్పించారు. విద్యార్థులు ఎదుర్కొంటున్న సమస్యలపై నేరుగా స్పందించే ధైర్యం వారికి లేదని, మీడియా ఎదుట స్వేచ్ఛగా ప్రశ్నలకు సమాధానం చెప్పే సాహసం కూడా చేయడం లేదని వ్యాఖ్యానించారు.
కాంగ్రెస్ పార్టీ విద్యార్థుల హక్కులకు అండగా నిలుస్తుందని, వారిపై అన్యాయంగా తీసుకునే చర్యలను వ్యతిరేకిస్తూనే ఉంటామని రాహుల్ గాంధీ స్పష్టం చేశారు.
