ప్రతిపక్షం, ఆగస్టు 26: తెలంగాణకు కేంద్ర ప్రభుత్వం కీలక క్రీడా అవకాశాన్ని కల్పించింది. ఈ ఏడాది నిర్వహించనున్న 8వ ఎడిషన్ ఖేలో ఇండియా యూత్ గేమ్స్కు తెలంగాణ ఆతిథ్యం ఇవ్వనుంది. హైదరాబాద్తో పాటు వరంగల్, కరీంనగర్, మహబూబ్నగర్ నగరాల్లో ఈ క్రీడా పోటీలను నిర్వహించేందుకు ఏర్పాట్లు చేస్తున్నారు. దేశవ్యాప్తంగా 6 వేల మందికి పైగా యువ క్రీడాకారులు ఈ పోటీల్లో పాల్గొనే అవకాశం ఉంది.
మొత్తం 25 క్రీడాంశాల్లో పోటీలు నిర్వహించనున్నారు. ఆతిథ్య రాష్ట్రంగా తెలంగాణకు ఒక స్థానిక క్రీడను ప్రతిపాదించే అవకాశం కల్పించారు. దీంతో పాటు మరో కొత్త క్రీడను కూడా ఈసారి పోటీల్లో చేర్చనున్నారు. కేంద్ర క్రీడా మంత్రిత్వ శాఖ సమన్వయంతో రాష్ట్ర ప్రభుత్వం పోటీల నిర్వహణకు అవసరమైన ఏర్పాట్లు చేపడుతోంది.
ఖేలో ఇండియా యూత్ గేమ్స్ నిర్వహణ కోసం కేంద్ర ప్రభుత్వం రూ.22 కోట్లను విడుదల చేసింది. రాష్ట్ర ప్రభుత్వం, భారత క్రీడా ప్రాధికార సంస్థ, జాతీయ క్రీడా సమాఖ్యలు, పాఠశాల క్రీడా సమాఖ్య, కేంద్ర మాధ్యమిక విద్యా మండలి తదితర సంస్థల సమన్వయంతో పోటీలను నిర్వహించనున్నారు.
తెలంగాణకు ఖేలో ఇండియా యూత్ గేమ్స్ను కేటాయించడంపై కేంద్ర బొగ్గు, గనుల శాఖ మంత్రి జి. కిషన్ రెడ్డి హర్షం వ్యక్తం చేశారు. ఈ అవకాశాన్ని కల్పించిన ప్రధాని నరేంద్ర మోదీ, కేంద్ర క్రీడల శాఖ మంత్రి మన్సుఖ్ మాండవీయకు ఆయన ధన్యవాదాలు తెలిపారు. యువతలో ఉన్న క్రీడా ప్రతిభను వెలికితీసేందుకు ఖేలో ఇండియా వంటి కార్యక్రమాలు ఎంతో ఉపయోగపడుతున్నాయని పేర్కొన్నారు.
తెలంగాణలో ఇప్పటికే ఖేలో ఇండియా పథకం కింద పలు క్రీడా మౌలిక సదుపాయాలు అభివృద్ధి చేసినట్లు కిషన్ రెడ్డి తెలిపారు. ఉస్మానియా విశ్వవిద్యాలయం ప్రాంగణంలో సింథటిక్ ట్రాక్, సింథటిక్ టెన్నిస్ కోర్టు, మహిళల కోసం ప్రత్యేక ఈత కొలను వంటి సదుపాయాలను కల్పించినట్లు చెప్పారు. రాష్ట్రంలోని వివిధ ప్రాంతాల్లోనూ క్రీడా వసతులను అభివృద్ధి చేసినట్లు వెల్లడించారు. తెలంగాణలో 33 ఖేలో ఇండియా కేంద్రాలను ఏర్పాటు చేసినట్లు తెలిపారు.
ఖేలో ఇండియా పథకం ద్వారా దేశవ్యాప్తంగా యువ క్రీడాకారులకు శిక్షణ, పోటీ అనుభవం, అవసరమైన మద్దతు అందుతోంది. లక్ష్య ఒలింపిక్ పోడియం పథకం, జాతీయ క్రీడా సమాఖ్యలకు సహాయం, భారత క్రీడా ప్రాధికార సంస్థ కార్యక్రమాల ద్వారా ప్రతిభావంతులైన క్రీడాకారులను ప్రోత్సహిస్తున్నట్లు కేంద్రం పేర్కొంది.
తెలంగాణకు చెందిన అంతర్జాతీయ బాక్సర్ నిఖత్ జరీన్, బ్యాడ్మింటన్ క్రీడాకారిణి పీవీ సింధు వంటి క్రీడాకారులు కేంద్ర పథకాల ద్వారా ప్రయోజనం పొందిన ఉదాహరణలను కిషన్ రెడ్డి ప్రస్తావించారు. అంతర్జాతీయ స్థాయి శిక్షణ, పోటీల్లో పాల్గొనే అవకాశాలు, అవసరమైన సహకారం అందించడం ద్వారా యువ క్రీడాకారులను ఉన్నత స్థాయికి తీసుకెళ్లేందుకు చర్యలు కొనసాగుతున్నాయని తెలిపారు.
ఇదిలా ఉండగా, ఆగస్టు 29న జాతీయ క్రీడా దినోత్సవాన్ని పురస్కరించుకుని ఆగస్టు 27న దేశవ్యాప్తంగా ‘ఖేల్ కీ బాత్, పీఎం కే సాథ్’ పేరుతో ఖేలో ఇండియా సంవాద్ నిర్వహించనున్నారు. దేశంలోని 1,500కుపైగా కళాశాలల్లో ఈ కార్యక్రమాన్ని నిర్వహించనున్నారు. ప్రధాని నరేంద్ర మోదీ యువ క్రీడాకారులు, విద్యార్థులతో వర్చువల్గా సంభాషించి క్రీడలు, ఆరోగ్యం, ఫిట్నెస్తో పాటు దేశ నిర్మాణంలో యువత పాత్రపై మాట్లాడనున్నారు.
