ప్రతిపక్షం, ఆగస్టు 17, గద్వాల: అత్యవసర సమయాల్లో ఎంతోమంది ప్రాణాలను కాపాడుతూ సేవలందించిన 108 ఎమర్జెన్సీ మెడికల్ టెక్నీషియన్ జహంగీర్ బాషా(27) ఆకస్మికంగా మృతిచెందారు. స్వాతంత్య్ర దినోత్సవం సందర్భంగా అత్యుత్తమ సేవలకు గుర్తింపుగా ప్రశంసా పత్రం అందుకున్న 24 గంటల్లోనే ఆయన గుండెపోటుతో కన్నుమూయడం తీవ్ర విషాదాన్ని నింపింది.
గద్వాల జిల్లాలోని చెనుగోనుపల్లికి చెందిన జహంగీర్ బాషా 108 అత్యవసర సేవల్లో ఎమర్జెన్సీ మెడికల్ టెక్నీషియన్గా పనిచేస్తున్నారు. ప్రమాదాలు, అనారోగ్య పరిస్థితులు, అత్యవసర వైద్య అవసరాలు ఎదురైన సమయంలో బాధితులకు తక్షణ వైద్య సహాయం అందించడంలో ఆయన కీలక పాత్ర పోషించారు. అనేక సందర్భాల్లో సమయస్ఫూర్తితో స్పందించి బాధితులను ఆసుపత్రులకు తరలిస్తూ ప్రాణాలను కాపాడేందుకు కృషి చేశారు.
ఆయన అందించిన సేవలను గుర్తించిన అధికారులు స్వాతంత్య్ర దినోత్సవం సందర్భంగా ఆగస్టు 15న ప్రత్యేకంగా సత్కరించారు. జిల్లా కలెక్టర్ చేతుల మీదుగా ప్రశంసా పత్రాన్ని అందుకున్నారు. సేవలో అత్యుత్తమ ప్రతిభ కనబరిచినందుకు లభించిన ఈ గౌరవంతో కుటుంబ సభ్యులు, సహచరులు ఆనందం వ్యక్తం చేశారు.
అయితే ఈ సంతోషం ఎంతోకాలం నిలవకుండానే కుటుంబంలో తీవ్ర విషాదం నెలకొంది. అవార్డు అందుకున్న మరుసటి రోజే జహంగీర్ బాషా గుండెపోటుకు గురయ్యారు. కుటుంబ సభ్యుల వివరాల ప్రకారం ఆదివారం అర్ధరాత్రి సుమారు 2.30 గంటల సమయంలో ఆయన మృతిచెందారు.
తన విధుల్లో భాగంగా అత్యవసర పరిస్థితుల్లో ఎందరో బాధితులకు వైద్య సహాయం అందించి వారి ప్రాణాలను కాపాడిన జహంగీర్ బాషా.. చివరకు తన ప్రాణాలను మాత్రం కాపాడుకోలేకపోయారంటూ కుటుంబ సభ్యులు కన్నీరుమున్నీరయ్యారు. ఆయన మృతి పట్ల 108 సిబ్బంది, సహచరులు, స్థానికులు తీవ్ర దిగ్భ్రాంతి వ్యక్తం చేశారు.
ప్రాణాపాయంలో ఉన్నవారికి ఆపద్బాంధవుడిగా నిలిచిన యువకుడు.. తన సేవలకు అవార్డు అందుకున్న ఒక్క రోజులోనే ప్రాణాలు కోల్పోవడం స్థానికంగా తీవ్ర విషాదాన్ని కలిగించింది.
