ప్రతిపక్షం, ఆగస్టు 29: దాదాపు 23 ఏళ్లపాటు తన జీవితాన్ని పూర్తిగా క్రికెట్కే అంకితం చేశానని భారత మహిళా క్రికెట్ దిగ్గజం మిథాలీ రాజ్ తెలిపారు. క్రికెట్కు ఇచ్చినంత సమయాన్ని వ్యక్తిగత జీవితానికి కేటాయించలేకపోయానని ఆమె పేర్కొన్నారు.
ఓ ఇంటర్వ్యూలో మిథాలీ రాజ్ తన వ్యక్తిగత జీవితం గురించి ఆసక్తికర విషయాలను వెల్లడించారు. కూతురిగా, సోదరిగా, స్నేహితురాలిగా కుటుంబ సభ్యులు, సన్నిహితులతో గడపాల్సిన సమయాన్ని కూడా క్రికెట్ కోసం కేటాయించాల్సి వచ్చిందని చెప్పారు. తన కెరీర్లో ఆటకే అత్యధిక ప్రాధాన్యం ఇచ్చానని తెలిపారు.
ప్రస్తుతం కుటుంబంతో కలిసి సంతోషంగా సమయం గడుపుతున్నానని మిథాలీ పేర్కొన్నారు. క్రికెట్ నుంచి విరామం తీసుకున్న తర్వాత వ్యక్తిగత జీవితానికి కూడా సమయం కేటాయించే అవకాశం లభించిందని చెప్పారు.
తనకు 43 ఏళ్లు వచ్చినప్పటికీ ఇప్పటివరకు పెళ్లి చేసుకోకపోవడంపై కూడా మిథాలీ స్పందించారు. పెళ్లి విషయంలో ఎలాంటి తొందరా లేదని స్పష్టం చేశారు. తనను పూర్తిగా అర్థం చేసుకునే వ్యక్తి దొరికితే మాత్రం వివాహం గురించి ఆలోచిస్తానని తెలిపారు.
తన జీవితాన్ని, తన నిర్ణయాలను అర్థం చేసుకుని గౌరవించే వ్యక్తి ఎంతో ముఖ్యమని మిథాలీ అభిప్రాయపడ్డారు. క్రికెట్ కెరీర్ కారణంగా వ్యక్తిగత జీవితంలో కొన్ని విషయాలను త్యాగం చేయాల్సి వచ్చినప్పటికీ, ప్రస్తుతం కుటుంబంతో ఆనందంగా గడుపుతున్నానని ఆమె చెప్పుకొచ్చారు.
