ప్రతిపక్షం, ఆగస్టు 28, హైదరాబాద్: తెలంగాణలో అంగన్వాడీ కేంద్రాల్లో ఖాళీగా ఉన్న పోస్టులను త్వరితగతిన భర్తీ చేసేందుకు ప్రభుత్వం చర్యలు చేపట్టింది. రాష్ట్రవ్యాప్తంగా ఖాళీగా ఉన్న 15,982 అంగన్వాడీ పోస్టులను సెప్టెంబరు నెలలోగా భర్తీ చేయాలని ప్రభుత్వం అధికారులను ఆదేశించింది. జిల్లా స్థాయిలోనే నియామక ప్రక్రియను పూర్తి చేయాలని స్పష్టం చేసింది.
అంగన్వాడీ కేంద్రాల్లో ఖాళీగా ఉన్న టీచర్, హెల్పర్ పోస్టులను భర్తీ చేయడం ద్వారా కేంద్రాల నిర్వహణను మరింత పటిష్టం చేయడంతో పాటు చిన్నారులకు మెరుగైన సేవలు అందించేందుకు ప్రభుత్వం ఈ నిర్ణయం తీసుకుంది. నియామక ప్రక్రియలో అర్హత కలిగిన అభ్యర్థులను ఇంటర్వ్యూ ద్వారా ఎంపిక చేయాలని అధికారులకు సూచించింది.
ప్రభుత్వం జారీ చేసిన వివరాల ప్రకారం.. జోన్-1 పరిధిలో 1,853 అంగన్వాడీ టీచర్ పోస్టులు, 7,737 హెల్పర్ పోస్టులు ఖాళీగా ఉన్నాయి. అదే విధంగా జోన్-2 పరిధిలో 1,247 టీచర్ పోస్టులు, 5,145 హెల్పర్ పోస్టులు భర్తీ చేయాల్సి ఉంది. మొత్తంగా రెండు జోన్లలో కలిపి 15,982 పోస్టులను భర్తీ చేయనున్నారు.
అంగన్వాడీ టీచర్, హెల్పర్ పోస్టులకు అర్హత కలిగిన అభ్యర్థుల ఎంపికలో పారదర్శకత పాటించాలని ప్రభుత్వం ఆదేశించింది. అభ్యర్థుల ఇంటర్ విద్యార్హతలో సాధించిన మార్కులకు 70 శాతం వెయిటేజీ ఇవ్వనున్నారు. అదనంగా నిర్వహించే ఇంటర్వ్యూకు 10 శాతం వెయిటేజీ కేటాయించారు.
అలాగే సామాజిక, కుటుంబ పరిస్థితులను పరిగణనలోకి తీసుకుని ప్రత్యేక కేటగిరీలకు కూడా వెయిటేజీ ఇవ్వాలని నిర్ణయించారు. విధవ అభ్యర్థులకు 5 శాతం, అనాథ అభ్యర్థులకు 10 శాతం, దివ్యాంగ అభ్యర్థులకు 5 శాతం వెయిటేజీ ఇవ్వనున్నారు. ఈ విధంగా విద్యార్హత, ఇంటర్వ్యూ, ప్రత్యేక కేటగిరీల ఆధారంగా అభ్యర్థుల ఎంపిక ప్రక్రియను పూర్తి చేయనున్నారు.
జిల్లా స్థాయిలో నియామక ప్రక్రియను వేగంగా చేపట్టి సెప్టెంబరు నెలలోగా పోస్టులన్నింటినీ భర్తీ చేయాలని ప్రభుత్వం స్పష్టం చేసింది. అంగన్వాడీ కేంద్రాల్లో సిబ్బంది కొరత లేకుండా చూడటం ద్వారా చిన్నారులు, గర్భిణులు, బాలింతలకు అందించే సేవలు మరింత సమర్థవంతంగా కొనసాగించేందుకు అవకాశం ఉంటుందని అధికారులు భావిస్తున్నారు.
