ప్రతిపక్షం, నవంబర్ 02: రామ్‌లీలా మైదాన్‌లో ప్రతిపక్ష కూటమి నిర్వహించిన సభపై కేంద్ర మంత్రి కిరణ్ రిజిజు కాంగ్రెస్ పార్టీని లక్ష్యంగా చేసుకుని తీవ్ర విమర్శలు చేశారు. సభకు భారీగా జనం హాజరైనట్లు చూపించేందుకు కాంగ్రెస్ నాయకులు కృత్రిమ మేధస్సు (ఏఐ) సాయంతో రూపొందించిన ఫొటోలను సామాజిక మాధ్యమాల్లో ప్రచారం చేస్తున్నారని ఆయన ఆరోపించారు. అయితే, సభాస్థలి మొత్తం జనంతో నిండిపోయినట్లు చూపించాలనే ప్రయత్నంలో రూపొందించిన ఏఐ ఫొటో కూడా సరిగ్గా లేదని ఎద్దేవా చేశారు. కనీసం నకిలీ ఫొటోలను కూడా సరిగ్గా తయారు చేయడం కాంగ్రెస్ నాయకులకు రావడం లేదంటూ వ్యంగ్యాస్త్రాలు సంధించారు.
ప్రతిపక్షాలు నిర్వహించిన సభకు ప్రజల నుంచి భారీ స్పందన వచ్చిందని ప్రచారం చేసుకునేందుకు కాంగ్రెస్ నేతలు ప్రయత్నిస్తున్నారని కిరణ్ రిజిజు విమర్శించారు. ఈ క్రమంలో పెద్దపల్లి కాంగ్రెస్ ఎంపీ గడ్డం వంశీతో పాటు మరికొందరు కాంగ్రెస్ నాయకులు సామాజిక మాధ్యమాల్లో పోస్టు చేసిన ఫొటోను ఆయన తన ఖాతాలో షేర్ చేశారు. ఆ ఫొటోలో సభా ప్రాంగణం జనసందోహంతో నిండిపోయినట్లు కనిపిస్తున్నప్పటికీ, దానిని ఏఐ సాయంతో సృష్టించినట్లు ఆయన అభ్యంతరం వ్యక్తం చేశారు. వాస్తవ పరిస్థితులను ప్రజలకు చూపించకుండా, కృత్రిమ చిత్రాలతో సభ విజయవంతమైందని నమ్మించే ప్రయత్నం చేస్తున్నారంటూ కాంగ్రెస్ తీరును తప్పుబట్టారు.
రాజకీయాల్లో ప్రజల మద్దతు పొందడం కంటే, సామాజిక మాధ్యమాల్లో తప్పుడు ప్రచారానికి ప్రాధాన్యత ఇస్తున్నారనే విధంగా కాంగ్రెస్ నాయకులపై కిరణ్ రిజిజు విమర్శలు గుప్పించారు. సభకు ఎంతమంది వచ్చారు? ప్రజల స్పందన ఎలా ఉంది? అనే విషయాలను వాస్తవాల ఆధారంగా తెలియజేయాల్సిన నాయకులు, ఏఐ ఫొటోలతో ప్రచారం చేసుకోవడం ఏమిటని ప్రశ్నించేలా ఆయన వ్యాఖ్యలు చేశారు. ఫేక్ ప్రచారం చేయాలన్నా కనీసం దాన్ని నమ్మేలా రూపొందించాలి కదా అంటూ కాంగ్రెస్‌పై సెటైర్లు వేశారు. ఈ వ్యవహారాన్ని ప్రస్తావిస్తూ ఆయన చేసిన వ్యాఖ్యలు రాజకీయ వర్గాల్లో చర్చనీయాంశంగా మారాయి.
