ప్రతిపక్షం, జూలై 23: బీఆర్ఎస్ వర్కింగ్ ప్రెసిడెంట్ కేటీఆర్ ముఖ్యమంత్రి రేవంత్ రెడ్డిపై తీవ్ర విమర్శలు గుప్పించారు. రాష్ట్రానికి జరుగుతున్న అన్యాయాలపై కేంద్ర ప్రభుత్వాన్ని నిలదీయాల్సిన ముఖ్యమంత్రి ప్రధాని నరేంద్ర మోదీ పేరు ప్రస్తావించడానికే భయపడుతున్నారని ఆరోపించారు.
వరంగల్లో మీడియాతో చిట్చాట్ సందర్భంగా మాట్లాడిన కేటీఆర్, పాత కేసుల భయంతోనే సీఎం రేవంత్ కేంద్ర ప్రభుత్వంపై నేరుగా విమర్శలు చేయడం లేదన్నారు. రాహుల్ గాంధీ అరెస్టును నిరసిస్తూ లోక్భవన్ వద్ద కాకుండా కొడంగల్లో ధర్నా నిర్వహించడం రాజకీయ నాటకమని విమర్శించారు.
అమృత్ పథకం, కాంట్రాక్టులు వంటి అంశాల్లో కేంద్రంతో కాంగ్రెస్ ప్రభుత్వం రాజీపడుతోందని కేటీఆర్ ఆరోపించారు. కాంగ్రెస్, బీజేపీ మధ్య అంతర్గత అవగాహన ఉందని పేర్కొంటూ, “కాంగ్రెస్కు ఒక మూట పంపిస్తే బీజేపీకి రెండు మూటలు పంపుతున్నారు” అంటూ వ్యాఖ్యానించారు. ఈ వ్యాఖ్యలు రాష్ట్ర రాజకీయాల్లో చర్చనీయాంశంగా మారాయి.
