ప్రతిపక్షం, నవంబర్ 01: హైదరాబాద్ నగరంలో రానున్న రోజుల్లో నీటి కొరత ఏర్పడే అవకాశాలు ఉండటంతో జలమండలి కీలక నిర్ణయం తీసుకుంది. నగరంలో అందుబాటులో ఉన్న నీటి వనరులపై ఒత్తిడిని తగ్గించేందుకు శుద్ధి చేసిన మురుగునీటిని మానవేతర అవసరాలకు సరఫరా చేయాలని నిర్ణయించింది. నవంబర్ 1 నుంచి ఈ ప్రత్యేక సరఫరా కార్యక్రమాన్ని ప్రారంభించనుంది. ఎల్‌నినో ప్రభావంతో రాష్ట్రంలోని అనేక ప్రాంతాల్లో వర్షాభావ పరిస్థితులు నెలకొనడం, భూగర్భ జలమట్టాలు తగ్గిపోవడం, జలాశయాల్లో నీటి నిల్వలు పడిపోవడం అధికారులను ఆందోళనకు గురిచేస్తున్నాయి. ముఖ్యంగా హైదరాబాద్‌కు తాగునీటిని అందించే మంజీరా, సింగూర్ జలాశయాల్లో నీటి నిల్వలు తగ్గుతున్న నేపథ్యంలో భవిష్యత్తులో నగరానికి నీటి ఇబ్బందులు ఎదురుకాకుండా ముందస్తు చర్యలు చేపడుతున్నారు. ఈ క్రమంలో తాగునీటిని ఇతర అవసరాలకు వినియోగించకుండా, ప్రత్యామ్నాయంగా శుద్ధి చేసిన మురుగునీటిని ఉపయోగించేలా ప్రణాళిక రూపొందించారు.
జలమండలి ఎండీ అశోక్ రెడ్డి వెల్లడించిన వివరాల ప్రకారం, నగరంలో రోజుకు 646 ఎంఎల్‌డీ శుద్ధి చేసిన నీటిని ట్యాంకర్ల ద్వారా వివిధ ప్రాంతాలకు సరఫరా చేయనున్నారు. ఈ విధానం ద్వారా తాగునీటి అవసరాలపై సుమారు 20 శాతం వరకు ఒత్తిడి తగ్గించవచ్చని అధికారులు అంచనా వేస్తున్నారు. ప్రస్తుతం నగరంలో జలమండలి ఆధ్వర్యంలో మొత్తం 45 మురుగునీటి శుద్ధి కేంద్రాలు పనిచేస్తున్నాయి. నివాస గృహాలు, పరిశ్రమల నుంచి వెలువడే మురుగునీటిని ఈ కేంద్రాల్లో శుద్ధి చేసి తిరిగి వినియోగించుకునేలా ఏర్పాట్లు ఉన్నాయి. అయితే ఇప్పటివరకు ఈ నీటిని పూర్తిస్థాయిలో ఉపయోగించుకోకపోవడంతో గణనీయమైన పరిమాణంలో నీరు మూసీ నదిలోకి విడుదలవుతోంది. ఈ నీటిని నిర్మాణ రంగం, భవనాల క్యూరింగ్, తోటల నిర్వహణ, స్విమ్మింగ్ పూల్స్, ఇతర పారిశ్రామిక అవసరాలకు వినియోగించుకోవచ్చని అధికారులు భావిస్తున్నారు.
శుద్ధి చేసిన నీటి సరఫరా కోసం నగరవ్యాప్తంగా 27 ఫిల్లింగ్ కేంద్రాలను గుర్తించారు. వీటి ద్వారా ట్యాంకర్లకు నీటిని నింపి వినియోగదారులకు అందించనున్నారు. తొలి విడతలో 21 ప్రత్యేక గ్రీన్ ట్యాంకర్లను సిద్ధం చేశారు. ఈ నీటిని సరఫరా చేసేందుకు వినియోగదారుల నుంచి నీటి ధర కాకుండా ప్రధానంగా రవాణా ఛార్జీలు వసూలు చేయాలని జలమండలి నిర్ణయించింది. ట్యాంకర్ పరిమాణం, ప్రయాణించే దూరాన్ని బట్టి ధరలను ఖరారు చేసింది. ఐదు వేల లీటర్ల ట్యాంకర్‌కు తొలి నాలుగు కిలోమీటర్ల వరకు రూ.400 వసూలు చేయనుండగా, ఆ తర్వాత ప్రతి కిలోమీటరుకు రూ.55 అదనంగా చెల్లించాలి. పది వేల లీటర్ల ట్యాంకర్‌కు తొలి నాలుగు కిలోమీటర్ల వరకు రూ.800, ఆ తర్వాత ప్రతి కిలోమీటరుకు రూ.65 నిర్ణయించారు. అలాగే 20 వేల లీటర్ల ట్యాంకర్‌కు తొలి నాలుగు కిలోమీటర్లకు రూ.1,600, ఆ తర్వాత ప్రతి కిలోమీటరుకు రూ.80 వసూలు చేయనున్నారు.
నగరంలో నిర్మాణ రంగానికి ఈ శుద్ధి చేసిన నీటిని విస్తృతంగా వినియోగించే అవకాశం ఉందని అధికారులు అంచనా వేస్తున్నారు. మూడు కార్పొరేషన్లు, హెచ్‌ఎండీఏ పరిధిలో నిర్మాణ అనుమతులు పొందిన భవనాల క్యూరింగ్, ఇతర అవసరాల కోసం ప్రతిరోజూ సుమారు 140 ఎంఎల్‌డీ నీరు అవసరమవుతుందని గుర్తించారు. అదేవిధంగా ట్రై కార్పొరేషన్లు, ఔటర్ రింగ్ రోడ్డు, హెచ్‌ఎండీఏ, హెచ్‌ఎంఆర్‌ఎల్ పరిధిలోని పార్కులు, పచ్చదనం పెంపు, ల్యాండ్‌స్కేపింగ్ అవసరాలకు రోజుకు 12.47 ఎంఎల్‌డీ నీరు వినియోగిస్తున్నట్లు అంచనా వేశారు. ఈ అవసరాలకు శుద్ధి చేసిన మురుగునీటిని ఉపయోగించడం ద్వారా తాగునీటి వృథాను గణనీయంగా తగ్గించవచ్చని భావిస్తున్నారు.
ఇక నగరంలోని స్విమ్మింగ్ పూల్స్‌కు కూడా శుద్ధి చేసిన నీటిని సరఫరా చేయాలని అధికారులు ప్రణాళిక రూపొందించారు. జీహెచ్‌ఎంసీ పరిధిలో 62, మల్కాజిగిరి మున్సిపల్ కార్పొరేషన్ పరిధిలో 91, సైబరాబాద్ మున్సిపల్ కార్పొరేషన్ పరిధిలో 307 స్విమ్మింగ్ పూల్స్ ఉన్నట్లు గుర్తించారు. వీటికి ప్రస్తుతం సుమారు 115 మిలియన్ లీటర్ల మంచినీరు వినియోగిస్తున్నట్లు అధికారులు పేర్కొన్నారు. స్విమ్మింగ్ పూల్స్‌లో ప్రతిరోజూ కొంత నీటిని మార్చాల్సి ఉండటంతో అందుకు సుమారు 11.30 ఎంఎల్‌డీ నీరు అవసరమవుతోంది. ఈ అవసరాలకు శుద్ధి చేసిన నీటిని వినియోగిస్తే తాగునీటి ఆదాకు మరింత అవకాశం ఉంటుందని జలమండలి భావిస్తోంది.
శుద్ధి చేసిన నీటి నాణ్యత విషయంలో ఎలాంటి రాజీ ఉండదని అధికారులు స్పష్టం చేస్తున్నారు. నీటిలోని పీహెచ్, టీడీఎస్, ఫీకల్ కోలిఫాం తదితర ప్రమాణాలను ఎప్పటికప్పుడు పరిశీలించేలా ఏర్పాట్లు చేశారు. నీటి నాణ్యత వివరాలు రియల్ టైమ్‌లో అందుబాటులో ఉండేలా చర్యలు తీసుకుంటున్నారు. ప్రత్యేక బృందాలు నిరంతరం నాణ్యతను పర్యవేక్షించడంతో పాటు, కాలుష్య నియంత్రణ మండలి ఆధ్వర్యంలో నెలవారీ పరీక్షలు నిర్వహించనున్నారు. నిర్దేశిత ప్రమాణాలకు అనుగుణంగా ఉన్న నీటిని మాత్రమే సంబంధిత అవసరాలకు సరఫరా చేయాలని అధికారులు నిర్ణయించారు.
మొత్తంగా హైదరాబాద్‌లో భవిష్యత్తులో తాగునీటి కొరత తీవ్రం కాకుండా ఉండేందుకు జలమండలి ఈ ప్రత్యామ్నాయ నీటి సరఫరా విధానాన్ని అమల్లోకి తీసుకొస్తోంది. నిర్మాణ సంస్థలు, పారిశ్రామిక యూనిట్లు, పార్కుల నిర్వహణ సంస్థలు, స్విమ్మింగ్ పూల్స్ నిర్వాహకులు శుద్ధి చేసిన నీటిని వినియోగించుకోవాలని అధికారులు సూచిస్తున్నారు. నగరంలో రోజువారీ నీటి అవసరాలను తీర్చేందుకు తాగునీటి వనరులపై ఆధారపడటాన్ని తగ్గించి, అందుబాటులో ఉన్న నీటిని సమర్థంగా వినియోగించుకోవడమే ఈ కార్యక్రమం ప్రధాన ఉద్దేశం. రానున్న రోజుల్లో ఈ విధానం ఎంతవరకు విజయవంతమవుతుంది? నగర నీటి అవసరాలపై ఎంతమేర ఒత్తిడి తగ్గుతుంది? అనేది కీలకంగా మారింది.
